"សង្ក្រាន្ត TSI" នឹងត្រូវរៀបចំនៅថ្ងៃទី០៧ ខែមេសា ឆ្នាំ២០២២៣ ខាងមុខ នៅវិទ្យាស្ថាន តេជោសែនសាធារណការ និងដឹកជញ្ជូន !!! ក្រសួងសាធារណការ និងដឹកជញ្ជូន សូមជូនដំណឹងដល់មហាជន ឱ្យបានជ្រាបថា៖ វិទ្យាស្ថាន នឹងរៀបចំព្រឹត្តិការណ៍ «សង្ក្រាន្ត TSI» នៅថ្ងៃទី០៧ ខែមេសា ឆ្នាំ២០២៣ ខាងមុខនេះ ក្រោមអធិបតីភាពដ៏ខ្ពង់ខ្ពស់ ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន។ ព្រឹត្តិការណ៍ «សង្ក្រាន្ត TSI» នេះរៀបចំឡើង ក្នុងគោលបំណងអបអរសាទរ «ពិធីបុណ្យចូលឆ្នាំថ្មី ប្រពៃណីជាតិខ្មែរ» និងដើម្បីចូលរួមអភិរក្សវប្បធម៌ជាតិ ព្រមទាំងបំផុសស្មារតីយុវជនឱ្យមានមោទនភាព និងស្រលាញ់វប្បធម៌ អរិយធម៌ ប្រពៃណី និងទំនៀមទម្លាប់ ដែលជាអត្តសញ្ញាណជាតិ ជាពិសេសដើម្បីប្រមូលថវិកាសប្បុរសធម៌ ជួយសាលាដែលខ្វះខាតនៅតំបន់ដាច់ស្រយាល។ កម្មវិធី នឹងប្រារព្ធធ្វើឡើង ចាប់ពីម៉ោង ០៨:០០ នាទីព្រឹក ដល់ម៉ោង ២១:០០ នាទីយប់ ដោយមានការរៀបចំស្តង់តាំងបង្ហាញ និងលក់ផលិតផល សេវាកម្ម ស្តង់លក់ម្ហូបអាហារ និងភេសជ្ជៈ ស្តង់លក់វត្ថុអនុស្សាវរីយ៍ ព្រមទាំងការលេងល្បែងប្រជាប្រិយ បោះអង្គញ់ លាក់កន្សែង ចោលឈូង ដណ្ដើមស្លឹកឈើ ពង្រាត់កូនក្រមុំ ទាញព្រ័ត្រ និងការរាំកម្សាន្ត ជាដើម។ ព្រឹត្តិការណ៍ «សង្ក្រាន្ត TSI» គឺបើកទទួលសាធារណជនឱ្យចូលរួមដោយសេរី ដើម្បីអបអរពិធីបុណ្យចូលឆ្នាំថ្មីប្រពៃណីជាតិ បង្កើនភាពស្និទស្នាល ផងដែរ។