កិច្ចប្រជុំពិភាក្សាលើស្ថានភាពបច្ចុប្បន្នភាពរបស់ការិយាល័យលូទឹក និងស្ថានីយចម្រោះទឹកកខ្វក់ ស្ថិតក្នុងខេត្តសៀមរាប ទីស្ដីការក្រសួង៖ នាព្រឹកថ្ងៃសុក្រ ០៣កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែមីនា ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាបន្តលើស្ថានភាពបច្ចុប្បន្នភាពរបស់ការិយាល័យលូទឹក និងស្ថានីយចម្រោះទឹកកខ្វក់ ខេត្តសៀមរាប ក្នុងនោះក៏មានការអញ្ជើញចូលរួមពីថ្នាក់ដឹកនាំ មន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ និងតំណាងអង្គភាពពាក់ព័ន្ធជាច្រើនរូបផងដែរ។ កិច្ចប្រជុំនេះរៀបចំឡើងក្នុងគោលបំណងដើម្បីត្រួតពិនិត្យស្ថានភាពបច្ចុប្បន្នភាព របស់ការិយាល័យលូទឹក និងស្ថានីយចម្រោះទឹកកខ្វក់នៃមន្ទីរសាធារណការ និងដឹកជញ្ជូន ខេត្តសៀមរាប ព្រមទាំងយកឱកាសនេះដើម្បីប្រមូលធាតុចូលមួយចំនួន ក្នុងការពិនិត្យកែសម្រួលបន្តលើជំពូកទាំង៥ និងប្រការទាំង១២ នៃប្រកាសស្តីពីការបង្កើតអង្គភាពគ្រប់គ្រងប្រព័ន្ធចម្រោះទឹកកខ្វក់ នៃមន្ទីរសាធារណការ និងដឹកជញ្ជូនខេត្តសៀមរាប។ ឯកឧត្តមរដ្ឋលេខាធិការបានលើកទឹកចិត្តដល់សមាជិកអង្គប្រជុំទាំងមូល ជួយលើកជាមតិយោបល់ ដើម្បីធ្វើយ៉ាងណាប្រមូលធាតុចូលឱ្យបានច្រើន ក្នុងការរៀបចំចងក្រងលិខិតបទដ្ឋានគតិយុត្តឱ្យបានគ្រប់ជ្រុងជ្រោយ និងមានប្រសិទ្ធភាពខ្ពស់។ ក្នុងនោះ មន្ត្រីជំនាញគ្រប់ផ្នែកបានផ្តល់ជាមតិយោបល់កែសម្រួលលើចំនុចមួយចំនួន សំដៅឱ្យសមស្របទៅនឹងស្ថានភាព និងទំហំការងារជាក់ស្តែងរបស់អង្គភាពនេះ ធ្វើយ៉ាងណាឱ្យការរៀបចំរចនាសម្ព័ន្ធត្រឹមត្រូវ តាមទំហំការងារដែលមានស្រាប់ ដើម្បីធានាបាននូវខ្ទង់ចំណាយដែលសមស្របនឹងទំហំការងារ៕