ភ្នំពេញ៖ បច្ចុប្បន្នការដឹកជញ្ជូនទំនិញតាមផ្លូវទឹករបស់កម្ពុជាមានតម្លៃខ្ពស់ជាងប្រទេសជិតខាង ដោយសារកំពង់ផែទឹកជ្រៅខេត្តព្រះសីហនុ មានតែកប៉ាល់ដឹកទំនិញធុនតូចប៉ុណ្ណោះអាចចូលចតបាន ដែលធ្វើឱ្យការដឹកជញ្ជូនទំនិញចេញ-ចូលកម្ពុជា ត្រូវមានការលើកដាក់ផ្ទេរនៅកំពង់ផែប្រទេសដទៃដែលមានកំពង់ផែទឹកជ្រៅ។ ដើម្បីជួយកាត់បន្ថយថ្លៃដឹកជញ្ជូន និងបង្កើនភាពប្រកួតប្រជែងក្នុងវិស័យដឹកជញ្ចូនជាមួយបណ្តាប្រទេសក្នុងតំបន់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី១៦ ខែមីនា ឆ្នាំ២០២៣ បានគូសបញ្ជាក់ថា សម្តេចបានពឹងពាក់ជប៉ុនដើម្បីឱ្យជួយធ្វើទំនើបកម្មកំពង់ផែស្វយ័តក្រុងព្រះសីហនុឱ្យក្លាយជាកំពង់ផែទឹកជ្រៅ ដែលអាចអនុញ្ញាតឱ្យកប៉ាល់ដឹកទំនិញធុនធំអាចចូលចតបាន។ ភាគីជប៉ុន កាលពីពេលកន្លងទៅ ជប៉ុនបានផ្តល់ហិរញ្ញប្បទានជាង២០០លានដុល្លារដល់កម្ពុជា ដើម្បីពង្រីកទំហំចរាចរណ៍ និងលើកកម្ពស់គុណភាពកំពង់ផែស្វយ័តក្រុងព្រះសីហនុនេះ និងបានសន្យាថានឹងជួយកម្ពុជាក្នុងការលើកកម្ពស់គុណភាពកំពង់ផែស្វយ័តក្រុងព្រះសីហនុឱ្យក្លាយជាកំពង់ផែស្នូលរបស់កម្ពុជា ក្នុងការដឹកជញ្ជូនទំនិញចេញ-ចូលកម្ពុជានាពេលអនាគត។ ក្រោយការសាង់សង់ដំណាក់កាលទី១បានបញ្ចប់ នៅក្នុងខែមិថុនា ឆ្នាំ២០២៣ កំពង់ក្រុងព្រះសីហនុនឹងមានជម្រៅទឹករហូតដល់១៤ម៉ែត្រកន្លះ ដែលអាចឱ្យកប៉ាល់ដឹកទំនិញទម្ងន់៦០ម៉ឺនតោនអាចចូលចតបាន។ បើតាមផែនការអភិវឌ្ឍន៍ឆ្នាំ២០២០-២០៣០ ការពង្រីកកំពង់ផែក្រុងព្រះសីហនុគ្រោងធ្វើឡើង៥ជំហាន ដោយជំហានទី១ ពង្រីកដល់ជម្រៅ១៤,៥ម៉ែត្រ ដែលអាចឱ្យនាវាផ្ទុកកុងតឺន័រខ្នាតធំៗចំណុះដល់៦ម៉ឺនតោនអាចចូលចតបាន គ្រោងបញ្ចប់នៅឆ្នាំ២០២៣។ ចំណែកជំហានទី២ និងទី៣ ពង្រីកដល់ជម្រៅ១៦ម៉ែត្រ និង១៧,៥ម៉ែត្រ ខណៈអង្គការ JICA កំពុងសិក្សា។ ជំហានទី៤ និងទី៥ គ្រោងពង្រីកដល់ជម្រៅ១៨,៥ម៉ែត្រ និង១៩ម៉ែត្រ។ ដើម្បីបង្កភាពងាយស្រួលក្នុងការគ្រប់គ្រង និងធានាការធ្វើចរាចរណ៍ដឹកទំនិញចេញចូលកម្ពុជាឱ្យកាន់តែមានភាពងាយស្រួល និងរហ័សជាងមុន ក្រសួងសាធារណការ និងដឹកជញ្ជូនក៏កំពុងតែរៀបចំសេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក និងកំពង់ផែ ដើម្បីជួយធ្វើឱ្យប្រព័ន្ធដឹកជញ្ជូន និងឡូជីស្ទីករបស់កម្ពុជាឱ្យកាន់តែមានភាពល្អប្រសើរ និងប្រកួតប្រជែងបន្ថែមទៀតដែរ៕