ឧត្តរមានជ័យ៖ ដោយអនុវត្តតាមការណែនាំពីឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ បានជំរុញបន្ថែមដល់កម្លាំងមន្រ្តីចរាចរណ៍ និងតាមបណ្តាលក្រុងស្រុកទាំងអស់ ធ្វើយ៉ាង​ណា​ត្រូវបន្តពង្រឹងសកម្មភាពចុះផ្សព្វផ្សាយអប់រំឲ្យបានទំលំទូលាយស្តីពីច្បាប់ចរាចរណ៍ផ្លូវកោគជូនដល់សិស្សានុសិស្សតាមសាលារៀន និងប្រជាពលរដ្ឋ ដើម្បី​ឲ្យបានដឹងកាន់ច្បាស់បន្ថែម​ទៀត​ពី​ច្បាប់​ចរាចរណ៍​ផ្លូវគោក ប្រកបដោយក្រមសីលធម៌​ និងវិជ្ជាជីវៈរបស់ខ្លួនដែលជាមន្រ្តីអនុវត្តច្បាប់។ លោកឧត្តមសេនីយ៍ទោ ហួត សុធី បានឲ្យដឹងថា នៅឆ្នាំ២០២២-២០២៣ នេះមន្រ្តីចរាចរណ៍ផ្លូវគោក​បានធ្វើការអប់រំផ្សព្វផ្សាយ និងឃោសនាអប់រំដោយការចុះអនុវត្តអប់រំច្បាប់ស្តីពីចរាចរណ៍​ផ្លូវគោក​និងអនុក្រឹត្យលេខ៣៩ថ្មី ​បានចំនួន ២៩៥ លើក មានប្រជាពលរដ្ឋបានចូលរួម​សរុបចំនួន​ ១០,៧៩៨នាក់​ ស្រី៥,២៨៨នាក់។ ​ក្នុងនោះ​ចុះអប់រំផ្សព្វផ្សាយច្បាប់ចរាចរតាមគោលដៅ​តាមដងផ្លូវ​បានចំនួន ២៨៥លើក មានអ្នកចូលរួមបានចំនួន៣,៦១៥នាក់ ស្រី១,៤៦៧នាក់ និង​តាម​គ្រឹះស្ថានសិក្សា បាន១០លើក មានអ្នកចូលរួម បានចំនួន ៧,១៨៣នាក់ ស្រី៣,៨២១នាក់​ចុះអប់រំណែនាំដល់ ​អ្នកប្រើប្រាស់​យានយន្តកសិកម្ម​កែច្នៃ ប្រភេទ គោយន្តកន្ត្រៃយ៍ដែល គ្មាន​ភ្លើងសញ្ញា ឬចំណាំងផ្លាតគ្រប់គ្រាន់ តាមគោលដៅលើដងផ្លូវបានចំនួន២៦៤លើក អប់រំ​គោយន្តកន្ត្រៃបានចំនួន១,៤៤០គ្រឿង ដើម្បីយល់ដឹងអំពីច្បាប់ស្តីពីចរាចរណ៍ផ្លូវគោក ។ លោកស្នងការ បានបញ្ជាក់ទៀតថា ការចុះជួយសម្រួលចរាចរណ៍ដល់សិស្សានុសិស្សចេញ​ពី​សាលាបានចំនួន៦២លើកនិងត្រូវបន្តធ្វើជាប់ជាប្រចាំនៅតាមមូលដ្ឋាននានា ដើម្បី​បញ្ចៀស​ការ​កកស្ទះ ក៏ដូចជា​បញ្ចៀស​នូវបញ្ហាគ្រោះថ្នាក់ប្រឈមផ្សេងៗ​ក្នុង​ពេលសិស្សានុសិស្សចេញ​ពី​សាលាផងដែរ។ លោកស្នងការបន្តទៀតថា​ ក្នុងនោះក៏​បានចុះសម្រួលចរាចរណ៍ជូន​ក្បួនថ្នាក់ដឹកនាំ បាន​ចំនួន១៩លើក ចែក​សម្ភារៈ ខិតប័ណ្ណ សៀវភៅ មួក រួមមាន​​មួកបាន ចំនួន៨០មួក ខិតបណ្ណ ចំនួន៣,៦២១សន្លឹក ​សៀវភៅអ្វីអ្នកបើកបរត្រូវយល់​ដឹង​ ចំនួន២,៤៥១ក្បាល ​សៀវភៅ​កំណត់​ល្បឿន ចំនួន៣២៩ក្បាល ​សៀវភៅច្បាប់​ស្តីពីចរាចរណ៍ផ្លូវ​គោក​ ចំនួន១,៤៤៦ក្បាលបិត​ស្ទិកគ័រ​ចំណាំងផ្លាត ​ចំនួន២,៨៨០ស្ទិកគ័រ ៕