អង្គការទ្រទ្រង់សុវត្ថិភាពកម្ពុជា គ្រោងប្រមូលសាលាបង្រៀនបើកបរឯកជនទាំងអស់ ដើម្បីលើកកម្ពស់គុណភាព វិធីសាស្រ្តបង្រៀនជូនគ្រូ និងផ្ដល់ប័ណ្ណបើកបរជូនសិស្ស ប្រកបដោយគុណភាព មានចំណេះជំនាញក្នុងការបើកបរ មានឥរិយាបទ ក្របសិសធម៌ល្អ ពេលបើកបរប្រកបដោយសុវត្ថិភាព។ លោក មាស ចាន់ឌី មន្រ្តីអង្គការទ្រទ្រង់សុវត្ថិភាពកម្ពុជាហៅកាត់ថាCAMSAFE ប្រាប់ Phnom Penh Reporterនៅព្រឹកថ្ងៃទី០៩ សីហានេះថា ដោយមើលឃើញគ្រោះថ្នាក់ចរាចរណ៏នៅតែបង្ករឲ្យមានមនុស្សស្លាប់ជារៀងរាល់ថ្ងៃ CAMSAFE គ្រោងសុំឲ្យសាលាបង្រៀនបើកបរឯកជនទាំងអស់ មកបណ្តុះបណ្តាល ដើម្បីលើកកម្ពស់គុណភាពនាយក នាយិការសាលា គ្រូបង្រៀនបើកបរមួយចំនួនទទួលបានជំនាញសុវត្ថិភាពចរាចរណ៍ពិតប្រាកដ។លោកបន្តថា នៅពេលនេះអង្គការទ្រទ្រង់សុវត្ថិភាពកម្ពុជា កំពុងសិក្សាកម្មវិធីបង្រៀនជូនគ្រូប្រកបដោយគុណភាព មានចំណេះជំនាញក្នុងការបើកបរ មានឥរិយាបទនិង ក្រមសិសធម៌ល្អ ពេលបើកបរប្រកបដោយសុវត្ថិភាព។លោកបន្តថា ដើម្បីសម្រេចបានតាមផែនការជាតិសុវត្ថិភាពចរាចរណ៍កាត់បន្ថយអ្នកស្លាប់ឲ្យបាន៥០%ត្រឹមឆ្នាំ២០២០កម្ពុជាត្រូវលើកកម្ពស់គុណភាពការបង្រៀនបើកបរនិងការផ្ដល់បណ័្ណបើកបរឲ្យបានត្រឹមត្រូវ។លោកបញ្ជាក់ថាសាលាបង្រៀននិងគ្រូបង្រៀនបើកបរ មិនត្រូវគិតថាខ្លួនជោគជ័យដោយគ្រាន់តែឃើញសិស្សប្រឡងជាប់ និងទទួលបានប័ណ្ណបើកបរច្រើននោះទេ តែត្រូវគិតថាសិស្សដែលបានប្រឡងជាប់ ចេញទៅបើកបរ មិនមានគ្រោះថ្នាក់ទើបជាការល្អវាប្រសើរជាង។ លោកបានបញ្ជាក់ថា អង្គការទ្រទ្រង់សុវត្ថិភាពកម្ពុជា បានសហការជាមួយអង្គការបរទេស ដើម្បីសិក្សាការផ្តល់ប័ណ្ណបើកបរ និងគុណភាពសាលាបង្រៀនបើកបរនៅកម្ពុជា ក្នុងគោលបំណងចង់ឲ្យសិស្សចេញពីសាលាបើកបរ បានយល់ដឹង មានជំនាញបើកបរច្បាស់លាស់ និងមានឥរិយាបទ បើកបរប្រកបដោយសុវត្ថិភាព ដែលទាំង៣ចំណុចនេះ គឺដើម្បី ពង្រឹងគុណភាពការបើកបរ មានសុវត្ថិភាពនៅកម្ពុជា។ លោកបានបញ្ជាក់ថា តាមផែនការសកម្មភាពជាតិ សុវត្ថិភាពចរាចរណ៍ផ្លូវគោក រាជរដ្ឋាភិបាលកម្ពុជា អង្គការពាន់ព័ន្ធផ្នែកចរាចរណ៏ បានធ្វើការរួមគ្នាកំណត់កាត់បន្ថយចំនួនអ្នកស្លាប់ដោយសារគ្រោះថ្នាក់ចរាចរណ៍ឲ្យបាន៥០% ត្រឹមឆ្នាំ២០២០ឥឡូវបានខិតមកដល់ជាងពាក់កណ្ដាលផ្លូវហើយ។ការផ្ដោតលើគុណភាព សមត្ថភាពបើកបររបស់អ្នកបើកបរគឺជាសកម្មភាពមួយ ដែលយើងជឿរជាក់ថា វានឹងរួម ចំណែកដ៏សកម្មក្នុងការកាត់បន្ថយចំនួនអ្នកបាត់បង់ជីវិតដោយសារគ្រោះថ្នាក់ចរាចរណ៍ផ្លូវគោកផងដែរ។ គួរបញ្ជាក់ថា៖ បច្ចុប្បន្នកម្ពុជាមានសាលាបើកបរចំនួយ២៦កន្លែងធំៗនៅទូទាំង២៥ រាជធានី- ខេត្ត និងមានជាង១០០សាខានៅតាមបណ្តាខេត្ត៕