[Kampucheathmey] - ផ្លូវល្បឿនលឿនទៅខេត្តសៀមរាប បញ្ចប់សិក្សាខែកញ្ញា ឈានដល់ការចរចារបើកការដ្ឋានសាងសង់
2023-03-01
ទៅកាន់ទំព័រចុះផ្សាយក្នុង Kampucheathmey
ផ្លូវល្បឿនលឿនទី ៣ ទៅខេត្តសៀមរាប នឹងបញ្ចប់ការសិក្សានៅខែកញ្ញានេះ ដើម្បីឈានទៅចរចាបើកការដ្ឋានសាងសង់។
ថ្លែងប្រាប់បណ្តាញសារព័ត៌មានក្នុងពេលចុះពិនិត្យការសាងសង់ផ្លូវក្រវាត់ក្រុងទី ៣ កាលពីម្សិលមិញនេះ លោក ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានឲ្យដឹងថា សម្រាប់ផ្លូវល្បឿនលឿនភ្នំពេញខេត្តសៀមរាប កំពុងបោះជំហានទៅមុខហើយនឹងបញ្ចប់ការសិក្សានៅខែកញ្ញានេះ។ ការពន្លឿនការសិក្សាឲ្យចប់សព្វគ្រប់ ដើម្បីឈានទៅចុះហត្ថលេខាដំណើរការការដ្ឋានសាងសង់។
លោករដ្ឋមន្រ្តីបានជំរុញឲ្យចេញរូបរាងផ្លូវល្បឿនលឿនទៅសៀមរាបដែលតភ្ជាប់ប៉ូលសេដ្ឋកិច្ចសំខាន់ ២ គឺខេត្តសៀមរាប និងរាជធានីភ្នំពេញ តាមរយៈការធ្វើឲ្យប្រសើរឡើងប្រព័ន្ធហេដ្ឋារចនាសម្ព័ន្ធ ដើម្បីជំរុញកំណើនការអភិវឌ្ឍសេដ្ឋកិច្ចជាតិ។
ក្នុងពិធីសម្ពោធដាក់ឱ្យប្រើប្រាស់ស្ថានីយបញ្ចូលថាមពលយានយន្តអគ្គិសនី និងពិធីប្រគល់-ទទួលយានយន្តអគ្គិសនី នៅទីស្ដីការក្រសួងកាលពីថ្ងៃទី២៩វិច្ឆិកា ឆ្នាំ ២០២២ លោករដ្ឋមន្រ្តីក្រសួងសាធារណការនិងដឹកជញ្ជូនបានបញ្ជាក់ថា មានក្រុមហ៊ុនចំនួន ៤ បានដាក់ពាក្យស្នើដើម្បីសុំសិក្សាគម្រោងសាងសង់ផ្លូវល្បឿនលឿនពីភ្នំពេញទៅសៀមរាប។
តាមរយៈគម្រោងផ្លូវល្បឿនលឿនទៅខេត្តសៀមរាប បើតាមអ្នកវិភាគសេដ្ឋកិច្ចមិនត្រឹមជួយរុញកំណើនភ្ញៀវទេសចរទៅលេងកម្សាន្តអតីតរាជធានីបុរាណនេះ ក៏ដើម្បីក្លាយជាតំបន់ឧស្សាហកម្មដ៏ធំផងដែរនៅថ្ងៃខាងមុខ៕
