កម្មវិធីបិទវគ្គបណ្តុះបណ្តាលស្តីពីការដឹកជញ្ជូនទំនិញគ្រោះថ្នាក់ចាប់ពីថ្ងៃទី១៣ ដល់១៧ ខែកុម្ភៈ ឆ្នាំ២០២៣ ទីស្តីការក្រសួង៖ ថ្ងៃសុក្រ ១២រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៧ ខែកុម្ភៈ ឆ្នាំ២០២៣ ឯកឧត្តម វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីភាពក្នុងកម្មវិធីបិទវគ្គបណ្តុះបណ្តាលស្តីពីការដឹកជញ្ជូនទំនិញគ្រោះថ្នាក់ ដែលបានប្រព្រឹត្តទៅរយៈពេលប្រាំថ្ងៃចាប់ពីថ្ងៃទី១៣ ដល់១៧ ខែកុម្ភៈ ឆ្នាំ២០២៣ ក្រោមការសហការឧបត្ថម្ភពីទីភ្នាក់ងារសហប្រតិបត្តិការអន្តរជាតិជប៉ុន(JICA) ដោយមានការចូលរួមពីលោក KOBAYASHI Kenichi តំណាងទីភ្នាក់ងារJICA លោក គង់ សុផល អគ្គនាយករង នៃអគ្គនាយកដ្ឋានដឹកជញ្ជូនផ្លូវគោក លោកបណ្ឌិត PONGNARIN PETCHU អ្នកជំនាញ និងផ្តល់ប្រឹក្សាយោបល់អន្តរជាតិស្តីពីការដឹកជញ្ជូនទំនិញគ្រោះថ្នាក់ និងសិក្ខាកាមដែលជាមន្រ្តីនៃអគ្គនាយកដ្ឋានដឹកជញ្ជូនផ្លូវគោកចំនួន១៦រូបផងដែរ។ ក្នុងឱកាសនោះ ឯកឧត្តមអនុរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះ វត្តមានរបស់លោកបណ្ឌិត PONGNARIN PETCHU អ្នកជំនាញ និងផ្តល់ប្រឹក្សាយោបល់អន្តរជាតិស្តីពីការដឹកជញ្ជូនទំនិញគ្រោះថ្នាក់ ដែលជាគ្រូបង្គោលមានកម្រិតទទួលស្គាលជាអន្តរជាតិ ដែលបានចំណាយពេលវេលាដ៏មានតម្លៃក្នុងការបណ្តុះបណ្តាលមន្រ្តីក្រោមឱវាទក្រសួង ឱ្យក្លាយជាជនបង្គោលសម្រាប់ការបណ្តុះបណ្តាលបន្ត និងបានផ្តាំផ្ញើដល់សិក្ខាកាមទាំងអស់ឱ្យយកចំណេះដឹង និងបច្ចេកទេស ដែលបានសិក្សាពីគ្រូបង្គោល អាចទៅបំពេញការងារប្រកបដោយប្រសិទ្ធភាព និងត្រូវខិតខំស្វែងយល់បន្ថែម ដើម្បីចែករំលែកចំណេះដឹងបន្តដល់មន្រ្តីក្នុងអង្គភាព និងស្ថាប័នឯកជនពាក់ព័ន្ធផងដែរ។ ឯកឧត្តមក៏បានថ្លែងអំណរគុណផងដែរ ចំពោះអង្កការJICA តំណាងដោយលោក Kobayashi ប្រធានក្រុមអ្នកជំនាញការជប៉ុន នៃគម្រោងភស្តុភារកម្មកម្ពុជាជំហានទី២ (CLIP2) ដែលបានផ្តល់ថវិកាទ្រទ្រង់ និងសហការជាមួយអគ្គនាយកដ្ឋានដឹកជញ្ជូនផ្លូវគោក ក្នុងការរៀបចំសិក្ឋាសាលាបណ្តាល និងផ្សព្វផ្សាយការងារដឹកជញ្ជូនទំនិញគ្រោះថ្នាក់នេះឡើង។ ឯកឧត្តម និងតំណាងJICA  បានផ្តាំផ្ញើ និងស្នើឱ្យសិក្ខាកាមទាំងអស់បន្តចូលរួមពិភាក្សា និងជំរុញបញ្ចប់ការរៀបចំប្រកាសក្រសួងស្តីពីការដឹកជញ្ជូនទំនិញគ្រោះថ្នាក់ ការជំរុញអនុវត្តប្រកាសស្តីពីការដឹកជញ្ជូនទំនិញគ្រោះថ្នាក់ដើម្បីចូលរួមចុះបញ្ជី គ្រប់គ្រងយានយន្តដឹកជញ្ជូនទំនិញគ្រោះថ្នាក់ និងអភិវឌ្ឍវិស័យដឹកជញ្ជូនជាទូទៅ និងត្រៀមចូលរួមពិភាក្សាផ្តល់យោបល់ក្នុងការរៀបចំសេចក្តីព្រាងច្បាប់ស្តីពីទំនិញគ្រោះថ្នាក់ ដែលដឹកនាំដោយក្រសួងឧស្សាហកម្មបច្ចេកវិទ្យា និងនវានុវត្ត នាពេលខាងមុខ។ គួរកត់សម្គាល់ថា៖ សិក្ខាកាមទាំងអស់បានស្វែងយល់អំពីកិច្ចព្រមព្រៀងស្តីពីការដឹកជញ្ជូនទំនិញគ្រោះ ថ្នាក់អន្តរជាតិតាមផ្លូវគោក ដែលក្នុងនោះរួមមាន៖ ១) និយមន័យការបែងចែកក្រុមទំនិញគ្រោះថ្នាក់ និង ការប្រើប្រាស់តារាងទំនិញគ្រោះថ្នាក់ ២) ប្រព័ន្ធនៃការវេចខ្ចប់( កញ្ចប់ស៊ីទែន) ប្រភេទរថយន្តសម្រាប់ដឹក និងបរិក្ខារ ៣) ការដាក់ស្លាកសញ្ញាសម្គាល់ទំនិញគ្រោះថ្នាក់ ៤) ឯកសារចាំបាច់ផ្សេងៗសម្រាប់ការដឹក ទំនិញគ្រោះថ្នាក់ ៥) ប្រតិបត្តិការ/វិធានពិសេសៗទាក់ទងនឹងការដឹកជញ្ជូន និងការលើកលែងលើការដឹកជញ្ជូនទំនិញគ្រោះថ្នាក់។ វគ្គបណ្តុះបណ្តាលនេះ បានតម្រូវឱ្យសិក្ខាកាមទាំងអស់ចុះធ្វើកម្មសិក្សានៅក្រុមហ៊ុនដែលពាក់ព័ន្ធនឹងការដឹកជញ្ជូនទំនិញគ្រោះថ្នាក់ ដោយមានការពិភាក្សា​ និងធ្វើបទបង្ហាញជាក្រុម និងបានឆ្លងកាត់ការប្រឡងបញ្ចប់វគ្គ ដែលទទួលបានលទ្ធផលល្អប្រសើរគួរជាទីមោទនៈផងដែរ៕