រយៈពេលពេញមួយឆ្នាំ២០២២ ក្រសួងសាធារណការ បានចុះបញ្ជីផ្លាកលេខពិសេសផ្ទាល់ខ្លួនបានចំនួន៧,១២៥ផ្លាក ដែលរកចំណូលបាន៤៤ប៊ីលានរៀល។ ក្នុងរយៈពេលមួយឆ្នាំដូចគ្នានេះ ក្រសួងក៏បានចុះបញ្ជីផ្លាកលេខពិសេសរាជធានី-ខេត្ត បានចំនួន៣១,៧៥៦ផ្លាក និងរកចំណូលបានជាង៤០ប៊ីលានរៀលផងដែរ។ នេះបើតាមការបញ្ជាក់របស់លោក ស៊ុន ចាន់ថុល រដ្ឋមន្ដ្រីក្រសួងសាធារណការនិងដឹកញ្ជូន ក្នុងកម្មវិធីបិទសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងនាថ្ងៃទី១៦ ខែកុម្ភៈ ឆ្នាំ២០២៣។ពាក់ព័ន្ធនឹងការលក់ផ្លាកលេខពិសេសនេះដែរ បើតាមលោកស្រី កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន ធ្លាប់បានគូសបញ្ជាក់ថា ការដាក់លក់ផ្លាកលេខពិសេសរាជធានី-ខេត្ត និងផ្លាកលេខពិសេសផ្ទាល់ខ្លួន ជូនប្រជាពលរដ្ឋកម្ពុជានាពេលកន្លងមក គឺដើម្បីជាជម្រើសបន្ថែមសម្រាប់ប្រជាពលរដ្ឋអាចជ្រើសរើសលេខ ឬឈ្មោះដែលខ្លួនពេញចិត្ត។ លោកស្រីបានបន្តថា ចំណូលដែលទទួលបានពីការលក់ផ្លាកលេខរថយន្តពិសេសនេះ បានចូលរួមយ៉ាងសំខាន់ និងបានចូលក្នុងថវិកាជាតិទាំងស្រុង ដើម្បីរួមចំណែកក្នុងសេដ្ឋកិច្ចជាតិ ក៏ដូចជាអភិវឌ្ឍផ្នែកហេដ្ឋារចនាសម្ព័ន្ធជាដើម។ ជាការកត់សម្គាល់ ផ្លាកលេខរថយន្តពិសេសដែលអាចដាក់ឈ្មោះខ្លួនឯង ឬដាក់តាមចិត្តចង់ ព្រមទាំងអាចកាន់កាប់បានមួយជីវិតនោះ ត្រូវបានក្រសួងសាធារណការ និងដឹកជញ្ជូន បើកលក់ជាផ្លូវការកាលពីថ្ងៃទី០៧ ខែមករា ឆ្នាំ២០២០។ សូមជម្រាបថា ផ្លាកលេខពិសេសនេះមានតម្លៃចន្លោះពី២លានរៀល រហូតដល់១ពាន់លានរៀល។ ផ្លាកលេខពិសេសផ្ទាល់ខ្លួននេះ ត្រូវបានបោះពុម្ពដោយមានអក្សរ «កម្ពុជា» នៅផ្នែកខាងលើ និងមានការរួមបញ្ចូលគ្នាលេខឡាតាំងឬអក្សរ ចាប់ពី១ខ្ទង់ដល់៨ខ្ទង់ បោះពុម្ពនៅផ្នែកកណ្តាល។ ផ្លាកលេខនេះមាន QR Code នៅផ្នែកខាងស្តាំ ដែលមានបញ្ជាក់ព័ត៌មានស្តីពីរថយន្ត។ ការជ្រើសរើសផ្លាកលេខពិសេសនេះ គឺអាចធ្វើឡើងតាមរយៈការដាក់ពាក្យស្នើសុំទិញ ឬការដាក់ដេញថ្លៃក្នុងប្រព័ន្ធស្វ័យប្រវត្តិកម្មចុះបញ្ជីរថយន្តតាមរយៈគេហទំព័រ vehicle.mpwt.gov.kh៕