កិច្ចប្រជុំអនុគណៈកម្មការក្រុមការងារបច្ចេកទេសស្ដីពីទឹកកខ្វក់ និងអនាម័យក្នុងទីក្រុងលើកទី៤ “4th Sub-TWG on Urban Wastewater and Sanitation” ទីស្តីការក្រសួង៖ ថ្ងៃចន្ទ ១រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី៦ ខែកុម្ភៈ ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងលោកស្រី Miyahara Ai តំណាងជាន់ខ្ពស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំកម្ពុជា បានអញ្ជើញជាសហប្រធានដឹកនាំកិច្ចប្រជុំអនុគណៈកម្មការក្រុមការងារបច្ចេកទេសស្ដីពីទឹកកខ្វក់ និងអនាម័យក្នុងទីក្រុងលើកទី៤ “4th Sub-TWG on Urban Wastewater and Sanitation” ដោយមានការអញ្ជើញចូលរួមពីថ្នាក់ដឹកនាំក្រសួងសាធារណការ និងដឹកជញ្ជូន តំណាងពីក្រសួង-ស្ថាប័នពាក់ព័ន្ធ តំណាងពីដៃគូអភិវឌ្ឍន៍ មន្ត្រីស្ថានទូត និងមន្ត្រីជំនាញពាក់ព័ន្ធ និងមានការចូលរួមពីមន្ត្រីពាក់ព័ន្ធតាមប្រព័ន្ធវីដេអូពីចម្ងាយផងដែរ។ ជាកិច្ចចាប់ផ្ដើម ឯកឧត្តមរដ្ឋលេខាធិការ បានលើកឡើងអំពីសារៈសំខាន់នៃទឹក និងអនាម័យក្នុងការលើកកម្ពស់សុខភាព និងសុខុមាលភាពសាធារណៈ និងការកំណត់វិស័យទឹកកខ្វក់ជាវិស័យអាទិភាពខ្ពស់ ដូចមានចែងក្នុងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា នីតិកាលទី៦ នៃរដ្ឋសភា ដែលក្នុងនោះរួមមាន៖ ការអភិវឌ្ឍប្រកបដោយចីរភាព និងបរិយាប័ន្ន ការពង្រឹងការគ្រប់គ្រង នគររូបនីយកម្ម ការរៀបចំផែនការមេហេដ្ឋារចនាសម្ព័ន្ធទីក្រុង និងទីប្រជុំជនសំខាន់ៗសម្រាប់គាំទ្រដល់ការអភិវឌ្ឍផ្លូវថ្នល់ ផ្លូវដែក និងផ្លូវទឹក ក៏ដូចជាប្រព័ន្ធផ្គត់ផ្គង់អគ្គិសនី និងទឹកស្អាត ជាពិសេសប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់ផងដែរ។ កិច្ចប្រជុំនេះមានការធ្វើបទបង្ហាញ និងបទអន្តរាគមន៍ពីក្រុមការងារតំណាងពីក្រសួង-ស្ថាប័នពាក់ព័ន្ធ និងតំណាងពីដៃគូអភិវឌ្ឍន៍ ទាក់ទងនឹងវឌ្ឍនភាពការងារគម្រោង គោលនយោបាយ លិខិតបទដ្ឋានគតិយុត្ត បញ្ហាប្រឈមរបស់ខ្លួន និងផែនការយុទ្ធសាស្រ្តក្នុងការជំរុញការអនុវត្តគម្រោងនានាទាក់ទងនឹងបច្ចេកទេសគ្រប់គ្រងទឹកកខ្វក់ និងអនាម័យឱ្យមានប្រសិទ្ធភាព និងប្រកបដោយចីរភាព។ អង្គប្រជុំបានចូលរួមពិភាក្សា និងចែករំលែកយ៉ាងផុសផុលនូវមតិយោបល់លើបញ្ហាប្រឈមនានាដូចជា៖ កត្តាខ្វះខាតធនធានមនុស្សលើវិស័យប្រព័ន្ធទឹកកខ្វក់ និងអនាម័យក្នុងទីក្រុងនៅកម្រិតថ្នាក់ជាតិ និង កម្រិតថ្នាក់ក្រោមជាតិ ដើម្បីគ្រប់គ្រងប្រតិបត្តិការ និងថែទាំប្រព័ន្ធប្រព្រឹត្តកម្មទឹកកខ្វក់។ គួរកត់សម្គាល់ថា៖ តាមការប៉ាន់ស្មាន ក្នុងឆ្នាំ២០២០ ប្រជាជនកម្ពុជាចំនួន៦១,៧១% ដែលរស់នៅក្នុងទីក្រុង និងទីប្រជុំជនសំខាន់ៗ បានទទួលការផ្គត់ផ្គង់ទឹកស្អាតប្រើប្រាស់។ ដោយឡែក អាងប្រព្រឹត្តកម្មទឹកកខ្វក់មេកំពុងដំណើរការគិតត្រឹមឆ្នាំ២០២០ មានចំនួន៤ និងមានសមត្ថភាពសរុបប្រមាណ ៣៧ ៨៥០ ម៉ែត្រគូបក្នុងមួយថ្ងៃ។ បច្ចុប្បន្នមានអាងប្រព្រឹត្តកម្មទឹកកខ្វក់ថ្នាក់ជាតិចំនួន៦បន្ថែមទៀតកំពុងស្ថិតនៅក្រោមការរចនា និងសាងសង់ ហើយរំពឹងថាសមត្ថភាពសរុបនៃដំណើរការប្រព្រឹត្តកម្មទឹកកខ្វក់ នឹងកើនឡើងដល់ ៨២ ៥០០ ម៉ែត្រគូបក្នុងមួយថ្ងៃ៕