ខេត្តកំពង់ឆ្នាំង: កំណាត់ផ្លូវមួយខ្សែមានប្រវែងពីរគីឡូម៉ែត្រ ត្រូវបានធ្វើពិធីបើកការដ្ឋានជួសជុលឲ្យទៅជាផ្លូវកៅស៊ូ DBST ស្ថិតនៅក្នុងភូមិទ្រាជើង ឃុំស្រែថ្មី ស្រុករលាប្អៀរ ពិធីនេះស្ថិតក្រោមអធិបតីភាពលោកស្រី កែ ចាន់មុន្នី អ្នកតំណាងរាស្ត្រ មណ្ឌលកំពង់ឆ្នាំង លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំង ព្រមទាំងមានការចូលរួមពីមន្ត្រីរាជការកងកម្លាំងប្រដាប់អាវុធសិក្សាអនុសិស្ស និងប្រជាពលរដ្ឋជាច្រើនរូបទៀត។ ថ្លែងនៅក្នុងឱកាសនោះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងមានប្រសាសន៍ថា ផ្លូវកៅស៊ូ dbst ដែលបើកការដ្ឋានជួសជុលនៅពេលនេះមានប្រវែង 2655 ម៉ែត្រទទឹង ៦ ម៉ែត្រនិងលូកាត់ទទឹងចំនួន ៧កន្លែង។ ផ្លូវនេះគឺជាគម្រោងអភិវឌ្ឍន៍របស់រដ្ឋបាលខេត្តកំពង់ឆ្នាំងសម្រាប់អភិវឌ្ឍន៍ហេដ្ឋារចនាសម្ព័ន្ធរូបវ័ន្ធ ឲ្យកាន់តែប្រសើរឡើង ដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋ កម្មករ កម្មការិនី សិក្សានុសិស្ស និងការប្រកបមុខរបរដឹកជញ្ជូនកសិផលផ្សេងៗ សំដៅរួមកាត់បន្ថយភាពក្រីក្រ ស្របតាមកម្មវិធីនយោបាយនិងយុទ្ធសាស្ត្រចតុកោណរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុនសែន ជាប្រមុខដឹកនាំប្រកបដោយគតិបណ្ឌិត ។ ផ្លូវមួយខ្សែនេះនឹងបំពាក់អំពូលភ្លើង និងអំពូល ភ្លើង និងអំពូលសឡាចំនួនប្រមាណ ១០០ ដើម ដើម្បីជួយសម្រួលការធ្វើដំណើររបស់បងប្អូននៅពេលយប់ នឹងលើកកម្ពស់សោភណ្ឌភាពក្នុងតំបន់នោះឲ្យកាន់តែប្រសើរឡើងថែមទៀត។ ប្រជាពលរដ្ឋដែលបានចូលរួមក្នុងពិធីបើកការដ្ឋានក៏ដូចជាបងប្អូនរស់នៅតំបន់នោះមានសេចក្តីរីករាយសប្បាយក្រៃលែង និងសូមអរគុណដល់ឯកឧត្តមអភិបាលខេត្តដែលបានគិតគូរយកចិត្តទុកដាក់ សុខទុក្ខ បងប្អូនប្រជាពលរដ្ឋ ៕