កិច្ចប្រជុំបើកវគ្គសវនកម្មដោយអាជ្ញាធរសវនកម្មជាតិ ស្តីពីការចុះប្រមូលព័ត៌មាន ដើម្បីរៀបចំផែនការសវនកម្ម និងធ្វើសវនកម្មលើរបាយការណ៍ហិរញ្ញវត្ថុ និងធ្វើសវនកម្មលើកិច្ចប្រតិបត្តិការក្រោមប្រធានបទ “ការគ្រប់គ្រង ការតាមដាន និងត្រួតពិនិត្យការដឹកជញ្ជូនលើសទម្ងន់កម្រិតកំណត់" សម្រាប់ការិយបរិច្ឆេទ ២០២២ ទីស្ដីការក្រសួង៖ ថ្ងៃសុក្រ ១៣កើត ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៣ ខែកុម្ភៈ ឆ្នាំ២០២៣ ឯកឧត្តម សេង ស៊ីហ៊ត់ អនុរដ្ឋលេខាធិការ ក្រសួងសាធារណការ និងដឹកជញ្ជូន និងឯកឧត្តម ឡុង អាទិច្ចបូរា អគ្គលេខាធិការអាជ្ញាធរសវនកម្មជាតិ បានអញ្ជើញដឹកនាំកិច្ចប្រជុំបើកវគ្គសវនកម្មដោយអាជ្ញាធរសវនកម្មជាតិ ស្តីពីការចុះប្រមូលព័ត៌មាន ដើម្បីរៀបចំផែនការសវនកម្ម និងធ្វើសវនកម្មលើរបាយការណ៍ហិរញ្ញវត្ថុ និងធ្វើសវនកម្មលើកិច្ចប្រតិបត្តិការ ក្រោមប្រធានបទ “ការគ្រប់គ្រង ការតាមដាន និងត្រួតពិនិត្យការដឹកជញ្ជូនលើសទម្ងន់កម្រិតកំណត់" សម្រាប់ការិយបរិច្ឆេទ ២០២២ ដោយមានការចូលរួមពីមន្ត្រីជំនាញពាក់ព័ន្ធពីអគ្គនាយកដ្ឋានសវនកម្មក្រសួង និងមន្ត្រីជំនាញអាជ្ញាធរសវនកម្មជាតិ។ កិច្ចប្រជុំនេះរៀបចំឡើងដើម្បីពិនិត្យពិភាក្សា និងបង្ហាញពីគោលបំណងនៃការធ្វើសវនកម្ម ក៏ដូចជាការចុះប្រមូលព័ត៌មាន ដើម្បីរៀបចំផែនការសវនកម្ម ធ្វើសវនកម្មលើរបាយការណ៍ហិរញ្ញវត្ថុ និងកិច្ចប្រតិបត្តិការក្រោមប្រធានបទ៖ ការគ្រប់គ្រង ការតាមដាន និងត្រួតពិនិត្យការដឹកជញ្ជូនលើសទម្ងន់កម្រិតកំណត់របស់ក្រសួងសាធារណការ និងដឹកជញ្ជូន និងអង្គភាពាក់ព័ន្ធសម្រាប់ឆ្នាំ២០២២។ អង្គប្រជុំបានពិភាក្សាលើកិច្ចសហប្រតិបត្តិការ និងការងារដែលបានអនុវត្តក្នុងពេលកន្លងមក ក៏ដូចជាទិសដៅក្នុងការបន្តកិច្ចសហការបន្ថែមលើការងារបច្ចេកទេស ដើម្បីអាចជំរុញឱ្យសវនកម្មសម្រាប់ឆ្នាំ២០២២ នេះទទួលបានលទ្ធផលជាផ្លែផ្កា។ ឆ្លៀតក្នុងឱកាសនោះដែរ ឯកឧត្តមអគ្គលេខាធិការ បានថ្លែងការកោតសរសើដល់ក្រសួងសាធារណការ និងដឹកជញ្ជូន ដែលបានរៀបចំហេដ្ឋារចនាសម្ព័ន្ធបច្ចេកវិទ្យាក្នុងទីស្ដីការក្រសួងប្រកបដោយភាពទំនើប និងការប្រើប្រាស់បច្ចេកវិទ្យាឌីជីថលចូលរួមអភិវឌ្ឍប្រទេសជាតិឱ្យជឿនលឿនទៅមុខ ស្របទៅនឹងរបត់នៃបដិវដ្តឧស្សាហកម្មជំនាន់ថ្មី(៤.០)៕