វគ្គបណ្តុះបណ្តាលពី កិច្ចការពារបរិស្ថាន និងសង្គម (Safeguards) និងយេនឌ័រ (Gender) សម្រាប់ការងារជួសជុលធ្វើឱ្យប្រសើរឡើងស្ថានីយបូមទឹកកខ្វក់វត្តចក សាលាកន្សែង និងជន្លង់ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្នុងក្រុងសៀមរាប ហរិញ្ញប្បទានឥណទានដោយធនាគារពិភពលោក សៀមរាប៖ នៅថ្ងៃទី២៦-២៧ ខែមករា ឆ្នាំ២០២៣ លោក លន់ ហេង ប្រធានចាត់ចែងគម្រោង តំណាងលោកអគ្គនាយករង ចៅ សុភៈភិបាល នៃអគ្គនាយកដ្ឋានប្រព័ន្ធចម្រោះទឹកកខ្វក់ និងជានាយកគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) បានអញ្ជើញជាអធិបតីបើកវគ្គបណ្តុះបណ្តាល ស្តីពីកិច្ចការពារបរិស្ថាន និងសង្គម (Safeguards) និងយេនឌ័រ (Gender) ការងារជួសជុលធ្វើឱ្យប្រសើរឡើងស្ថានីយបូមទឹកកខ្វក់វត្តចក សាលាកន្សែង និងជន្លង់ ក្នុងក្រុងសៀមរាប នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ដោយមានការចូលរួមពីក្រុមហ៊ុនទទួលបន្ទុកការងារសាងសង់ និងមន្ត្រីជំនាញពាក់ព័ន្ធ។ គោលបំណងនៃការរៀបចំវគ្គបណ្តុះបណ្តាលនេះ គឺឆ្លើយតបទៅនឹងតម្រូវការរបស់ធនាគារពិភាពលោក ដើម្បីធ្វើការចែករំលែកនូវបទពិសោធន៍ចំណេះដឹងពាក់ព័ន្ធនឹងការអនុវត្តការងារគាំពារបរិស្ថាន និងសង្គម (Social and Environmental Safeguards) និងយេនឌ័រ (Gender) ដល់គ្រប់ក្រុមហ៊ុនសាងសង់ ចាំបាច់ត្រូវអនុលោមតាមស្តង់ដារគាំពារបរិស្ថាន និងសង្គម និងការបញ្រ្ជាបយេនឌ័រ ដូចដែលមានចែងក្នុងកិច្ចសន្យាការងារ ដើម្បីធានាថា៖ (១) ការងារសាងសង់នឹងមិនបង្កជាផលប៉ះពាល់អវិជ្ជមាផ្នែកបរិស្ថាន និងសង្គម ដល់សហគមន៍ និងកម្មករ ឬត្រូវបានកាត់បន្ថយជាអតិបរមា (២) ការលើកកម្ពស់ការបញ្ជ្រាបយេនឌ័រ ការផ្តល់ឱកាសការងារដល់ស្ត្រី ការកាត់បន្ថយការបំពាន ឬអំពើហិង្សាណាមួយដល់ស្រ្តី និង (៣) សម្រេចបាននូវប្រសិទ្ធភាពការងារ ប្រកបដោយទំនួលខុសត្រូវ អំឡុងពេលអនុវត្តការងារ និងក្រោយពេលបញ្ចប់ការសាងសង់។ ជាលទ្ធផល ក្នុងវគ្គបណ្តុះបណ្តាលនេះ បានចែករំលែកនូវចំណេះដឹង បទពិសោធន៍ល្អៗដែលបានអនុវត្តកន្លងមក ធ្វើការពិភាក្សាផ្លាស់ប្តូរមតិយោបល់យ៉ាងផុលផុស រវាងមន្ត្រីជំនាញពាក់ព័ន្ធ ជាមួយក្រុមហ៊ុនសាងសង់ ដែលបានធ្វើការប្តេជ្ញាចិត្ត និងសន្យាគោរពអនុវត្តតាមស្តង់ដារគាំពារបរិស្ថាន និងសង្គម និងការបញ្រ្ជាបយេនឌ័រ ដូចបានចែងកិច្ចសន្យា និងអនុវត្តការងារសម្រេចឱ្យបានទៅតាមផែនការក្នុងរយៈពេល ១២ខែ ដែលគ្រោងនឹងដំណើរការអនុវត្តការងារចាប់ពីខែកុម្ភៈ ឆ្នាំ២០២៣ ខាងមុខនេះ៕