កិច្ចប្រជុំពិនិត្យលើរបាយការណ៍បឋមនៃការសិក្សាសមិទ្ធិលទ្ធភាព(Pre-Feasibility Study) គម្រោងអភិវឌ្ឍន៍ប្រព័ន្ធលូបង្ហូរទឹក នៅក្រុងសៀមរាប និងក្រុងស្វាយរៀង និងការពិភាក្សាលើកម្មវិធីប្រជុំក្រុមការងារបច្ចេកទេសសម្រាប់ការងារទឹកកខ្វក់ និងអនាម័យក្នុងទីក្រុង “Sub Technical Working Group on Urban Wastewater and Sanitation” ដែលគ្រោងនឹងរៀបចំនៅថ្ងៃទី០៦ ខែកុម្ភៈ ឆ្នាំ២០២៣ ទីស្តីការក្រសួង៖ នារសៀលថ្ងៃអង្គារ ៣កើត ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែមករា ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ពិនិត្យពិភាក្សាលើរបាយការណ៍បឋមនៃការសិក្សាសមិទ្ធិលទ្ធភាព(Pre-Feasibility Study) គម្រោងអភិវឌ្ឍន៍ប្រព័ន្ធលូបង្ហូរទឹក នៅក្រុងសៀមរាប និងក្រុងស្វាយរៀង សិក្សាដោយទីភ្នាក់ងារកិច្ចការទឹកកខ្វក់ជប៉ុន(JS) សម្រាប់អភិវឌ្ឍប្រព័ន្ធលូទឹកកខ្វក់ក្នុងក្រុងទាំងពីរ ដែលគាំទ្រការសិក្សានេះដោយក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន (MLIT Japan) ព្រមទាំងពិភាក្សាលើកម្មវិធីប្រជុំអនុក្រុមការងារបច្ចេកទេសសម្រាប់ការងារទឹកកខ្វក់ និងអនាម័យក្នុងទីក្រុង (SubTWG on Urban Sanitation and Wastewater) ដែលគ្រោងនឹងរៀបចំនៅថ្ងៃទី០៦ ខែកុម្ភៈ ឆ្នាំ២០២៣។ កិច្ចប្រជុំនេះមានការអញ្ជើញចូលរួមពីសំណាក់ ឯកឧត្តមអនុរដ្ឋលេខាធិការ និងឯកឧត្តមអគ្គនាយក និងមន្ត្រីបច្ចេកទេស នៃអង្គភាពជំនាញពាក់ព័ន្ធ។ របាយការណ៍បឋមនៃការសិក្សាសមិទ្ធិលទ្ធភាព គម្រោងអភិវឌ្ឍន៍ប្រព័ន្ធលូបង្ហូរទឹក នៅក្រុងសៀមរាប និងក្រុងស្វាយរៀង បានបង្ហាញជូនអង្គប្រជុំឱ្យបានជ្រាបពីព័ត៌មានសំខាន់ៗ រួមមានដូចជា៖ (១)បច្ចុប្បន្នភាពនៃប្រព័ន្ធលូបង្ហូរទឹកទាំងពីរទីតាំង (២) របាយការណ៍សង្ខេបនៃគម្រោងទាំងពីរទីតាំង (៣) ការរចនាអាងប្រព្រឹត្តកម្មទឹកកខ្វក់ទាំងពីរទីតាំង (៤) ការប៉ាន់ប្រមាណតម្លៃសាងសង់ទាំងពីរទីតាំង (៥) ការកំណត់ថ្លៃ និងការប្រមូលថ្លៃសេវាទាំងពីរទីតាំង (៦) ការប៉ាន់ស្មានបរិមាណទឹកកខ្វក់នៅក្រុងសៀមរាប (៧) ប្លង់ប្រព័ន្ធលូក្នុងក្រុងសៀមរាប (៨) ការប៉ាន់ស្មានសមត្ថភាពនៃប្រព័ន្ធលូក្នុងក្រុងសៀមរាប (៩) ភាពប្រសើរឡើងដែលរំពឹងទុកពីគម្រោង និង (១០) កាលវិភាគសម្រាប់ការអនុវត្តគម្រោងទាំងពីរទីតាំង។ ឯកឧត្តមរដ្ឋលេខាធិការ ប្រធានអង្គប្រជុំ បានផ្តល់អនុសាសន៍ណែនាំ ឱ្យក្រុមការងារលើកជាសំណួរទៅកាន់អ្នកជំនាញ JS ទទួលបន្ទុកលើការសិក្សានេះ ដើម្បីចូលរួមជាធាតុចូល និងបញ្ជាក់បន្ថែមឱ្យបានច្បាស់លាស់នូវចំណុចសំខាន់ៗមួយចំនួន ដែលមិនទាន់ទទួលបានការផ្ទៀងផ្ទាត់ ដើម្បីជាមូលដ្ឋានសម្រាប់ជំនួបពិភាក្សានៅពេលបន្ទាប់ មុននឹងឈានដល់ការសិក្សាសមិទ្ធិលទ្ធភាព។ ដោយឡែកទាក់ទងនឹងកិច្ចប្រជុំក្រុមការងារបច្ចេកទេសសម្រាប់ការងារទឹកកខ្វក់ និងអនាម័យក្នុងទីក្រុង ដែលគ្រោងនឹងរៀបចំនៅថ្ងៃទី០៦ ខែកុម្ភៈ ឆ្នាំ២០២៣ អង្គប្រជុំសម្រេចអនុវត្តតាមផែនការ និងរបៀបវារៈដែលបានគ្រោងទុកក្នុងនោះរួមមាន៖ (១)បច្ចុប្បន្នភាពលើក្របខ័ណ្ឌការងារពាក់ព័ន្ធ និង (២)បច្ចុប្បន្នភាពលើស្ថានភាពគម្រោងដែលកិច្ចប្រជុំ SubTWG នេះនឹងមានការចូលរួមពីសំណាក់អ្នកតំណាងជាន់ខ្ពស់ទីភ្នាក់ងារ JICA, DPs, Embassies, Agencies និងក្រសួងស្ថាប័នពាក់ព័ន្ឋ (LMs) ផងដែរ៕