កិច្ចប្រជុំអនុគណៈកម្មការសម្របសម្រួលបទអន្តរាគមន៍សម្រាប់ត្រៀមរៀបចំសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ នាព្រឹកថ្ងៃព្រហស្បតិ៍ ៦រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១២ ខែមករា ឆ្នាំ២០២៣ លោកជំទាវ កុយ សុដានី រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំអនុគណៈកម្មការសម្របសម្រួលបទអន្តរាគមន៍សម្រាប់ត្រៀមរៀបចំសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន ដោយមានការចូលរួមពីសមាជិក សមាជិកា នៃអនុគណៈកម្មការចំនួនប្រមាណ៥០រូប។ កិច្ចប្រជុំនេះរៀបចំឡើងក្នុងគោលបំណងពិនិត្យ និងពិភាក្សាលើការជ្រើសរើសប្រធានបទសម្រាប់សន្និបាត ដែលក្នុងនោះប្រធានបទព្រាងចំនួន៣ ត្រូវបានជ្រើសរើស និងត្រៀមដាក់ជូនឯកឧត្តមទេសរដ្ឋមន្ត្រីពិនិត្យសម្រេច និងប្រើប្រាស់សម្រាប់សន្និបាត។ អង្គប្រជុំ បានផ្ដោតការពិភាក្សាលើការរៀបចំសេចក្ដីព្រាងនៃកម្មវិធី និងពិនិត្យលើបទអន្តរាគមន៍ដើម្បីធានាឱ្យបទបង្ហាញនីមួយៗប្រើប្រាស់ពេលវេលាសមស្រប ប្រកបដោយភាពទាក់ទាញ និងក្ដោបបានចំណុចចាំបាច់សំខាន់ៗដែលចង់បង្ហាញទៅកាន់អង្គសន្និបាត។ តាមរយៈកិច្ចប្រជុំនេះ លោកជំទាវរដ្ឋលេខាធិការ បានផ្ដល់អនុសាសន៍ណែនាំក្រុមការងារទាំងអស់ឱ្យខិតខំពន្លឿនការងាររៀបចំបទអន្តរាគមន៍នេះឱ្យបានរួចរាល់តាមពេលវេលាដែលបានកំណត់ និងធ្វើយ៉ាងណាសម្រួចបទអន្តរាគមន៍ទាំងនោះឱ្យបានខ្លី ប្រកបដោយខ្លឹមសារពេញលេញ ដើម្បីញ៉ាំងឱ្យសន្និបាតនាឱកាសនោះអាចសម្រេចបានជោគជ័យ និងទទួលបានលទ្ធផលល្អប្រសើរ៕