ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ អញ្ជើញជាអធិបតីដឹកនាំកិច្ចប្រជុំបូកសរុបលទ្ធផលការងារដែលសម្រេចបានសម្រាប់ឆ្នាំ២០២២ និងលើកទិសដៅការងារឆ្នាំ២០២៣ ទីស្តីការក្រសួង៖ ថ្ងៃព្រហស្បតិ៍ ១៤កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៥ ខែមករា ឆ្នាំ២០២៣ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ បានអញ្ជើញដឹកនាំកិច្ចប្រជុំផ្ទៃក្នុងអគ្គនាយកដ្ឋាន ដោយមានការចូលរួមពី លោក លោកស្រីជាអគ្គនាយករង ប្រធាននាយកដ្ឋាន និងបុគ្គលិកមន្រ្តីរាជការក្រោមឱវាទ ដើម្បីពិភាក្សា និងបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ និងពិនិត្យលើបញ្ហាប្រឈមពាក់ព័ន្ធមួយចំនួន និងសំណូមពរនានា។ ជាកិច្ចចាប់ផ្តើម ឯកឧត្តមអគ្គនាយក បានសម្តែងនូវការស្វាគមន៍ដល់ លោក លោកស្រីទាំងអស់ដែលមានវត្តមានក្នុងកិច្ចប្រជុំ និងបានជម្រាបជូនអំពីការងារពាក់ព័ន្ធចំពោះមុខដែលត្រូវជជែកពិភាក្សាផ្លាស់ប្តូរយោបល់ ក្នុងន័យជំរុញឱ្យការអនុវត្តការងារប្រព្រឹត្តទៅបានរលូន និងទទួលបានប្រសិទ្ធភាពខ្ពស់។ បន្ទាប់មក អង្គប្រជុំបានដំណើរការទៅតាមរបៀបវារៈ ដែលបានគ្រោងទុក ដើម្បីពិនិត្យមើលលទ្ធផលអនុវត្តការងារ រួមទាំងបញ្ហាពាក់ព័ន្ធផ្សេងៗ និងសំណូមពរនានា ហើយតាមរយៈការវាយតម្លៃជារួមសម្រាប់ការអនុវត្តពេញមួយឆ្នាំ២០២២ បានបង្ហាញឱ្យឃើញថា លទ្ធផលនៃផែនការសកម្មភាពដែលបានដាក់ចេញសរុបមានចំនួន ១០៩ ក្នុងនោះ សកម្មភាពចំនួន៨០ បានអនុវត្តសម្រេចជោគជ័យ និងសកម្មភាពចំនួន ២៩ បាននិងកំពុងបន្តអនុវត្ត ហើយគ្រោងនឹងបញ្ចប់នៅដើមឆ្នាំ២០២៣។ ជាមួយគ្នានេះ អង្គប្រជុំ ក៏បានលើកយកបញ្ហាពាក់ព័ន្ធមួយចំនួន ក៏ដូចជាសំណូមពរនានា ដែលអង្គភាពក្រោមឱវាទបានស្នើសុំ មកពិភាក្សាដោះស្រាយរួមគ្នា ដើម្បីការអនុវត្តការងារឱ្យកាន់តែទទួលបានវឌ្ឍនភាពបន្ថែមទៀត។ អង្គប្រជុំក៏បានបន្តពិនិត្យ និងអនុម័តលើផែនការសកម្មភាពថ្មីៗចំនួន ១១២ សម្រាប់អនុវត្តនៅឆ្នាំ២០២៣នេះ ដើម្បីចូលរួមចំណែកក្នុងការលើកកម្ពស់ប្រសិទ្ធភាពការងាររដ្ឋបាល ការងារបុគ្គលិក និងអត្ថប្រយោជន៍ផ្សេងៗរបស់មន្រ្តី ការងារហិរញ្ញវត្ថុ និងថវិកា ការងារទំនាក់ទំនង និងកិច្ចសហប្រតិបត្តិការអន្តរជាតិ និងការងារពាក់ព័ន្ធនឹងកិច្ចការច្បាប់ និងនីតិកម្ម ក្នុងន័យគាំទ្រដល់វិស័យសាធារណការ និងដឹកជញ្ជូនឱ្យកាន់តែមានការរីកចម្រើនបន្ថែមទៀត។ ថ្លែងនៅក្នុងកិច្ចប្រជុំ ឯកឧត្តមអគ្គនាយក បានមានប្រសាសន៍ផ្តាំផ្ញើបន្ថែមដល់ បុគ្គលិកមន្រ្តីរាជការនៅក្រោមឱវាទទាំងអស់ សូមបន្តបណ្តុះឆន្ទៈមោះមុត ក្នុងការបំពេញភារកិច្ចដែលបានដាក់ចេញ និងភារកិច្ចដែលថ្នាក់ដឹកនាំប្រគល់ជូន ព្រមទាំងរួបរួមសាមគ្គីភាពគ្នាជាធ្លុងមួយ ក្នុងន័យជំរុញភារកិច្ចការងារទាំងអស់ ឱ្យទទួលបានជោគជ័យប្រកបដោយគុណភាព និងប្រសិទ្ធភាព៕