សិក្ខាកាមជាយុវជន ស.ស.យ.ក អន្ដរវិស័យចំនួន១០០រូប ក្នុងខេត្ដបាត់ដំបង ទទួលបានការបណ្ដុះបណ្ដាលស្ដីពីសុវត្ថិភាពចរាចរណ៍ផ្លូវគោក បាត់ដំបង៖ ថ្ងៃពុធ ១៣រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២១ ខែធ្នូ ឆ្នាំ២០២២ ក្រុមការងារ ស.ស.យ.ក វិស័យសាធារណការ និងដឹកជញ្ជូន សហការជាមួយ ស.ស.យ.ក ខេត្ត និងមន្ទីរសាធារណការ និងដឹកជញ្ជូនខេត្តបាត់ដំបង បានបន្ដបើកវគ្គបណ្តុះបណ្តាលស្តីពី សុវត្ថិភាពចរាចរណ៍ផ្លូវគោក ដល់សមាជិក សមាជិកា ជាយុវជន ស.ស.យ.ក អន្តរវិស័យ ក្នុងខេត្តបាត់ដំបង សរុបចំនួន ១០០រូប។ ប្រធានបទសំខាន់ៗដែលលើកយកមកធ្វើបទបង្ហាញ និងអប់រំផ្សព្វផ្សាយរួមមាន ស្ថានភាពទូទៅនៃគ្រោះថ្នាក់ចរាចរណ៍ផ្លូវគោក សុជីវធម៌ក្នុងការបើកបរ ការប្រើប្រាស់ល្បឿនក្នុងការបើកបរ សិទ្ធិអាទិភាពនៅត្រង់ផ្លូវប្រសព្វ ហានិភ័យនៃការបើកបរក្រោមឥទ្ធិពលនៃគ្រឿងស្រវឹង អត្ថប្រយោជន៍នៃមួកសុវត្ថិភាព ការត្រួតពិនិត្យទោចក្រយានយន្ត កម្មវិធីយល់ដឹងអំពីទ្រឹស្តីនៃការបើកបរលើទូរស័ព្ទដៃ (Cambodia Driving Rules) និងកម្មវិធីថែទាំផ្លូវ (Road Care Mobile App)។ សូមជម្រាបជូនផងដែរថា វគ្គបណ្តុះបណ្តាលនេះធ្វើឡើងក្នុងគោលបំណងអប់រំផ្សព្វផ្សាយស្តីពី សុវត្ថិភាពចរាចរណ៍ផ្លូវគោក ដើម្បីលើកកម្ពស់ការយល់ដឹងអំពីសុវត្ថិភាពចរាចរណ ជូនដល់យុវជនជាសមាជិក ស.ស.យ.ក និងដើម្បីយកចំណេះដឹងនេះទៅអប់រំ ផ្សព្វផ្សាយបន្តដល់យុវជន និងបងប្អូនប្រជាពលរដ្ឋដ៏ទៃទៀតផងដែរ៕