មុនពេលចេញដំណើរទៅបន្តការសិក្សានៅប្រទេសអូស្ត្រាលី និស្សិតជ័យលាភីអាហារូបករណ៍ចំនួន៤៥រូប បានទទួលអនុសាសន៍សំខាន់ៗពីឯកឧត្ដមរដ្ឋលេខាធិការ ឯកឧត្តម ផែង សុវិជ្ជានោ តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល ទីស្តីការក្រសួង៖ ព្រឹកថ្ងៃពុធ ៦រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៤ ខែធ្នូ ឆ្នាំ២០២២ ឯកឧត្តម ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជួបសំណេះសំណាលជាមួយនិស្សិតជ័យលាភីអាហារូបករណ៍ដែលត្រូវបន្ដការសិក្សានៅប្រទេសអូស្ត្រាលីចំនួន៤៥រូប ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។ ជំនួបនេះ ធ្វើឡើងដើម្បីផ្ដល់ជាអនុសាសន៍ ចំណេះដឹង បទពិសោធន៍ និងការអនុវត្តល្អៗ ដែលជាទស្សនទានដ៏មានតម្លៃបំផុតសម្រាប់និស្សិតយកទៅផ្សព្វផ្សាយវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានដឹងបានយល់អំពីកម្ពុជា។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានជំរុញលើកទឹកចិត្តឱ្យបេក្ខជនជ័យលាភីអាហារូបករណ៍ទាំងអស់ព្យាយាមសិក្សាឱ្យអស់ពីលទ្ធភាព ដើម្បីទទួលបានលទ្ធផលល្អប្រសើរ ហើយក្លាយជាទំពាំងដ៏ល្អ មានសមត្ថភាពគ្រប់គ្រាន់ អាចស្នងឫស្សីពិតប្រាកដបាន និងអាចចូលរួមជាមួយរាជរដ្ឋាភិបាលដើម្បីអភិវឌ្ឍសង្គមជាតិឱ្យកាន់តែរីកចម្រើន។ ជាមួយគ្នានោះផងដែរ ឯកឧត្តមរដ្ឋលេខាធិការ បានពាំនាំនូវការផ្ដាំផ្ញើសាកសួរសុខទុក្ខពីសំណាក់ ឯកឧត្តមទេសរដ្ឋមន្ត្រីជូនដល់និស្សិតជ័យលាភីទាំងអស់ និងបានចែករំលែកបទពិសោធន៍ក្នុងនាមជាអតីតនិស្សិតសិក្សានៅប្រទេសអូស្ត្រាលី ក៏ដូចជាជំរុញលើកទឹកចិត្តឱ្យនិស្សិតទាំងអស់ផ្ដោតសំខាន់លើការខិតខំប្រឹងប្រែងរៀនសូត្រទាំងនៅក្នុងសាលា និងទាំងចំណេះដឹងបន្ថែម ដើម្បីចូលរួមអភិវឌ្ឍ ប្រទេសជាតិជាមួយរាជរដ្ឋាភិបាល នៅពេលវិលត្រឡប់មកមាតុប្រទេសវិញ។ បន្ថែមពីលើនេះ ឯកឧត្តមរដ្ឋលេខាធិការ បានជំរុញផងដែរឱ្យនិស្សិតទាំងអស់ចូលរួមផ្សព្វផ្សាយអំពីតថភាពសង្គម ភាពរីកចម្រើនក្រោមដំបូលសុខសន្តិភាពក្រោមការដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ភាពល្អផូរផង់នៃប្រពៃណីជាតិខ្មែរ ទៅកាន់ពិភពលោក និងជាពិសេសត្រូវរក្សាមិត្តភាព និងទំនាក់ទំនងល្អរវាងគ្នា និងគ្នា ដោយប្រកាន់ភ្ជាប់នូវវិន័យ និងការគោរពច្បាប់នៃប្រទេសអូស្ត្រាលីឱ្យបានខ្ជាប់ខ្ជួនផងដែរ។ សូមជម្រាបជូនផងដែរថា និស្សិតអាហារូបករណ៍ចំនួន ៤៥រូប ដែលនឹងត្រូវបន្ដការសិក្សានៅប្រទេសអូស្ត្រាលីរួមមាន៖ ថ្នាក់បណ្ឌិត និងថ្នាក់បរិញ្ញាបត្រជាន់ខ្ពស់ សិក្សាលើមុខជំនាញអប់រំ សេដ្ឋកិច្ច វេជ្ជសាស្ត្រ និងកសិកម្ម៕