ជាដំណឹងដ៏រីករាយមួយសម្រាប់ប្រជាពលរដ្ឋរស់នៅក្នុងខេត្ដកំពត ខេត្ដកែប ក៏ដូចជាពលរដ្ឋដែលចូល​ចិត្ដទៅកម្សាន្ដនៅខេត្ដទាំង២នេះ។ ដោយសារថ្មីៗនេះ រាជរដ្ឋានភិបាលបានបញ្ជាក់ថា នឹងធ្វើការបើកការដ្ឋានសាងសង់ផ្លូវជាតិលេខ ៣៣ និងផ្លូវជាតិលេខ ៣១ នាពេលឆាប់ៗខាងមុខនេះហើយ។ជាក់ស្ដែងនៅថ្ងៃទី១៣ ខែធ្នូ ឆ្នាំ២០២២ កន្លងទៅនេះ ឯកឧត្តម ខាន់ ម៉ាណេរ រដ្ឋលេខាធិការ និងជាប្រធានគណៈកម្មការសម្រាប់រៀបចំពិធីបើកការដ្ឋានលើគម្រោងធ្វើឱ្យប្រសើឡើងវិញផ្លូវជាតិលេខ៣១ និងលេខ៣៣ ព្រមទាំង ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគ្រប់គ្រងគម្រោង (PMU) ផ្លូវជាតិលេខ៣៣ បានអញ្ជើញចុះពិនិត្យស្ថានភាពផ្លូវជាតិទាំងពីរខ្សែនេះ ដើម្បីត្រៀមរៀបចំបើកការដ្ឋានសាងសង់ជាផ្លូវការ។ បន្ទាប់ពីចុះពិនិត្យលើទីតាំងនីមួយៗរួចមក ឯកឧត្តមរដ្ឋមន្ត្រីប្រតិភូទាំងពីរ បានជ្រើសរើយកទីតាំងសម្រាប់រៀបចំពិធីបើកការដ្ឋាន នៅភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត និងបានបន្តដឹកនាំកិច្ចប្រជុំពិភាក្សាបែងចែកតួនាទី និងភារកិច្ចមុនថ្ងៃចាប់ផ្តើម និងថ្ងៃប្រារព្ធពិធីនៅក្នុងកិច្ចប្រជុំ៕