ជំនួបពិភាក្សាជាមួយសប្បុរសជន​ ដើម្បីលើកកម្ពស់សុខុមាលភាពប្រជាពលរដ្ឋក្នុងមូលដ្ឋានស្រុកកោះធំ ទីស្ដីការក្រសួង៖ ថ្ងៃសៅរ៍ ២រោច ខែមិគសិរ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី១០ ខែធ្នូ ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានអនុញ្ញាតឱ្យសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ប្រចាំនៅកម្ពុជា (The Church of Jesus Christ of Latter-day Saints) ដឹកនាំដោយលោក ខែល្លី អ័រ ចនសុន (Kelly R. Johnson) ថ្នាក់ដឹកនាំមកពីទីស្នាក់ការប្រចាំតំបន់ នៅទីក្រុងហុងកុង ចូលជួបសម្ដែងការគួរសម និងពិភាក្សាលទ្ធភាពផ្ដល់ការគាំទ្រលើតម្រូវការចាំបាច់សំខាន់ៗសម្រាប់លើកកម្ពស់សុខុមាលភាពប្រជាជន និងតម្រូវការសំខាន់ៗសម្រាប់ដាក់ដំណើរការមន្ទីរពេទ្យស្រុកកោះធំ។ ជំនួបនេះរៀបចំឡើងដើម្បីពិភាក្សាស្វែងរកការគាំទ្រលើតម្រូវការចាំបាច់សំខាន់ៗមុនការដាក់ឱ្យប្រើប្រាស់ជាផ្លូវការមន្ទីរពេទ្យស្រុកកោះធំ ដែលជាមន្ទីរពេទ្យទំនើបមួយទទួលបានការគាំទ្រ និងសហការពីមន្ទីរពេទ្យកាល់ម៉ែតរួមមាន វេជ្ជបណ្ឌិត គ្រូពេទ្យ សម្ភារៈបច្ចេកទេស ព្រមទាំងវគ្គបណ្ដុះបណ្ដាលផ្សេងៗ ដើម្បីលើកកម្ពស់ការថែទាំសុខភាពរបស់ប្រជាពលរដ្ឋក្នុងស្រុកកោះធំ និងស្រុកផ្សេងៗទៀតជុំវិញស្រុកកោះធំ ក្នុងខេត្តកណ្ដាលផងដែរ។ ជាការឆ្លើយតប លោក Kelly R. Johnson ព្រមទាំងក្រុមការងារសន្យានឹងព្យាយាមស្វែងរកការគាំទ្រទាំងធនធានមនុស្ស និងបច្ចេកទេសសំខាន់ៗ ធានាយ៉ាងណាផ្ដល់ជូនប្រជាពលរដ្ឋនូវសេវាថែទាំសុខភាពដ៏សមសម្យ។ ឆ្លៀតក្នុងឱកាសនេះផងដែរ ឯកឧត្តមទេសរដ្ឋមន្ត្រី បានលើកឡើងពីការទទួលស្វាគមន៍រាល់ការគាំទ្រគ្រប់ទម្រង់សម្រាប់ការអភិវឌ្ឍមន្ទីរពេទ្យ ក៏ដូចជាបានថ្លែងអំណរគុណចំពោះសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលបានគិតគូអំពីសុខុមាលភាព និងការបន្តផ្ដល់ជូនសេវាថែទាំសុខភាពបឋមដល់ប្រជាជនកម្ពុជា៕