ភ្នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ដ្រៃយ៍ គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) មានប្រសាសន៍ថា សូមគោរពស្នើសុំការណែនាំដ៏ខ្ពង់ខ្ពស់ពីសម្តេចក្រឡាហោម ស ខេង ថា អង្គការសហប្រជាជាតិ បានចង្អុលបង្ហាញនៅគោលដៅចំនួន១២ ដែលជាប្រទេសសមាជិករួមដែរអនុវត្ត។ ឯកឧត្តមបន្តថា គោរពស្នើសុំសម្តេចដើម្បីដាក់គោលដៅទាំង១២នេះ ដើម្បីយកទៅអនុវត្តអោយមានប្រសិទ្ធភាព។ ចំពោះចំណុចបន្ថែមបើយើងពិនិត្យលើរបាយការណ៍លើអាយុនៃយានយន្ត នៅកម្ពុជាយើង យើងឃើញថាយានយន្តនៅកម្ពុជាយើង មានអាយុចាស់ជិត និងជាង១០ឆ្នាំ ប្រហែល៤៤ ឬ៤៥ភាគរយ គឺឡានមានអាយុកាល១០ឆ្នាំជាងជាមធ្យម។ កត្តានេះដែលអាចធ្វើឲ្យមានគ្រោះថ្នាក់ចរាចរណ៍ផងដែរ។ ឯកឧត្តមទេសរដ្ឋមន្ត្រី ស៊ុន ចាន់ថុល មានប្រសាសន៍បន្ថែមថា អគ្គលេខាធិការដ្ឋានយើង សិក្សាអំពីអាយុកាលឡាននៅកម្ពុជាយើង ឬក៏ដូចជាមធ្យមតែម្តង ក៏ដូចជានៅជុំអាស៊ានរបស់យើង ហើយធ្វើរបាយការណ៍ជូនសម្តេច និងគណៈកម្មាធិការជាតិសុវត្ថិភាពចរាចរណ៍ផ្លូវគោក ដើម្បីស្នើសុំ ឡានអាយុចាប់ពី៥ ឬទៅ៧ឆ្នាំ កុំឲ្យនាំចូលមកកម្ពុជាទៀត ដោយសារប្រទេសយើងមិនមែនជាកន្លែងទទួលយកឡានចាស់ៗគេមកចោលនៅកម្ពុជាទេ។ ឯកឧត្តមទេសរដ្ឋមន្ត្រី បញ្ជាក់ថា ឯកឧត្តម ខិតខំប្រឹងប្រែងដែរមិនទាន់បានជោគជ័យ ហើយឯកឧត្តម ក៏បានពិភាក្សាជាមួយឯកឧត្តម សាយ សំអាល រដ្ឋមន្ត្រីក្រសួងបរិស្ថាន អំពីការប៉ះពាល់បរិស្ថាន គ្រាន់តែយើងសិក្សាក្នុងនាមជាគណៈកម្មាធិការជាតិសុវត្ថិភាពចរាចរណ៍ផ្លូវគោក ហើយគោរពស្នើសុំសម្តេចក្រឡាហោមពិនិត្យ ហើយយើងអាចស្នើសុំទៅរាជរដ្ឋាភិបាល ដើម្បីកំណត់អាយុជិវិតឡាន ដែលអាចនាំចូលមកកម្ពុជាយើងបាន។ ឯកឧត្តម ទេសរដ្ឋមន្ត្រី ស៊ុន ចាន់ថុល មានប្រសាសន៍សូមអោយជំរុញការផ្លាស់ប្តូរផ្លាកលេខឡានដែលគ្មានQR Code ពង្រឹងនិតិវីធីនៃការប្រឡងយកបណ្ណបើកបរ ជំរុញការប្រើប្រាស់យានយន្តអគ្គិសនី និងបញ្ចូលការងារកញ្ចប់ថវិកាទាក់ទងនឹងបរិក្ខាសុវត្ថិភាពចរាចរណ៍ និងបរិក្ខាត្រូវបំពាក់តាមថ្នល់ ក្នុងការលើកគម្រោងថវិកាជួសជុលស្ថាបនាផ្លូវថ្នល់ នាពេលអនាគត។ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ដ្រៃយ៍ គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) បានលើកឡើងក្នុងកិច្ចប្រជុំ ឆ្លងលើពង្រាង “ផែនការជាតិទសវត្សរ៍សុវត្ថិភាពចរាចរណ៍ផ្លូវគោក ឆ្នាំ២០២១-២០៣០” ក្រោមអធិបតីភាពដ៏ខ្ពង់ខ្ពស់របស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) នាព្រឹកថ្ងៃចន្ទ ៥កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែវិច្ឆិកា ឆ្នាំ២០២២ ៕