ក្រោយបញ្ចប់ “កិច្ចប្រជុំពិនិត្យសេចក្តីព្រាងច្បាប់ស្តីពីចរាចរណ៍ផ្លូវគោកថ្មី” ក្រុមការងារសិក្សា និងវិសោធនកម្មច្បាប់ គ្រោងនឹងរៀបចំកិច្ចប្រជុំឆ្លងសេចក្តីព្រាងច្បាប់នេះនៅពេលខាងមុខ ទីស្តីការក្រសួង៖ នាព្រឹកថ្ងៃអង្គារ ១៤រោច ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២២ ខែវិច្ឆិកា ឆ្នាំ២០២២ ឯកឧត្តម តូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានក្រុមការងារសិក្សា និងវិសោធនកម្មច្បាប់ស្តីពីចរាចរណ៍ផ្លូវគោក បានអញ្ជើញដឹកនាំកិច្ចប្រជុំ ដើម្បីពិនិត្យលើសេចក្តីព្រាងច្បាប់ស្តីពីចរាចរណ៍ផ្លូវគោកថ្មី ដោយមានការអញ្ជើញចូលរួមពីសំណាក់ ឯកឧត្តម លោក លោកស្រី ដែលជាសមាជិក សមាជិកាក្រុមការងារ តំណាងក្រសួងមហាផ្ទៃ ក្រសួងយុត្តិធម៌ និងមន្ត្រីជំនាញពាក់ព័ន្ធជាច្រើនរូប។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីធ្វើការពិនិត្យឡើងវិញលើខ្លឹមសារសេចក្តីព្រាងច្បាប់ស្តីពីចរាចរណ៍ផ្លូវគោកថ្មី ឱ្យកាន់តែមានភាពល្អិតល្អន់ និងច្បាស់លាស់ មុននឹងបន្តតាមនីតិវិធីនៃការៀបចំឆ្លងសេចក្តីព្រាងច្បាប់ថ្មីនេះ ក៏ដូចជាកែសម្រួលអត្ថន័យ ពាក្យពេចន៍ ឃ្លាប្រយោគ ឱ្យមានលក្ខណៈគ្រប់ជ្រុងជ្រោយ សំដៅឱ្យអ្នកប្រើប្រាស់ផ្លូវថ្នល់ទាំងអស់គោរពច្បាប់ចរាចរណ៍ឱ្យបានខ្ជាប់ខ្ជួន និងឈានទៅកាត់បន្ថយគ្រោះថ្នាក់ចរាចរណ៍ផ្លូវគោកឱ្យមកនៅកម្រិតទាបបំផុត។ ទន្ទឹមជាមួយគ្នានេះ អង្គប្រជុំបានពិភាក្សាលើវាក្យសព្ទ មាត្រាកែសម្រួលថ្មី និងមាត្រាបន្ថែមថ្មីនៃសេចក្តីព្រាងច្បាប់ស្តីពីចរាចរណ៍ផ្លូវគោកថ្មី និងជាពិសេសការធ្វើតេស្តរកសារធាតុញៀនលើអ្នកបើកបរយានយន្តដឹកជញ្ជូន។ ក្រោយពីបានពិនិត្យពិភាក្សាចប់សព្វគ្រប់ អង្គប្រជុំបានឯកភាពរៀបចំចងក្រងសេចក្តីព្រាងច្បាប់នេះឱ្យបានច្បាស់លាស់ ដើម្បីដាក់ប្រជុំឆ្លងសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ទទួលបន្ទុកជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ដែលនឹងប្រព្រឹត្តទៅនៅថ្ងៃសុក្រ ទី២៥ ខែវិច្ឆិកា ឆ្នាំ២០២២ ខាងមុខនេះ។ ចុងបញ្ចប់នៃកិច្ចប្រជុំ ឯកឧត្តមរដ្ឋលេខាធិការប្រចាំការ បានថ្លែងអំណរគុណយ៉ាងជ្រាលជ្រៅដល់អង្គប្រជុំ និងក្រុមការងារជំនាញដែលបានខិតខំប្រឹងប្រែងជជែកពិភាក្សាផ្តល់ធាតុចូល និងមតិយោបល់យ៉ាងផុលផុសធ្វើឱ្យសេចក្តីព្រាងច្បាប់នេះទទួលបានលទ្ធផលល្អប្រសើរ និងបានផ្តាំផ្ញើរឱ្យក្រុមការងារសហការគ្នាបន្តទៀត ដើម្បីឱ្យសេចក្តីព្រាងច្បាប់ស្តីពីចរាចរណ៍ផ្លូវគោកថ្មីនេះសម្រេចបានតាមការរំពឹងទុក៕