(ខេត្តកំពង់ឆ្នាំង)៖ ផ្លូវជនបទក្រាលកៅស៊ូពីរជាន់ប្រភេទ (DBST) ប្រវែងជាង១០០គីឡូម៉ែត្រ និងផ្លូវបេតុងប្រវែង ៣,៤១គីឡូម៉ែត្រ ក្រោមហិរញ្ញប្បទានឥតសំណងរបស់ចិន ជាង៤៧លានដុល្លារ ត្រូវបានដាក់ឱ្យដំណើរការជាផ្លូវការ ក្រោមវត្តមាន ឯកឧត្តម អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ នាថ្ងៃទី១៧ ខែវិច្ឆិកា ឆ្នាំ២០២២។ ឯកឧត្តម អ៊ុក រ៉ាប៊ុន បានសាទរចំពោះសមិទ្ធផលថ្មីទាំង៦ខេត្ត ជាពិសេស បងប្អូនប្រជាពលរដ្ឋ នៅទូទាំងខេត្តកំពង់ឆ្នាំង និងបានអំពាវនាវដល់អាជ្ញាធរមូលដ្ឋាន និងប្រជាពលរដ្ឋ ត្រូវចូលរួមថែរក្សាផ្លូវនេះឱ្យបានល្អ ចូលរួមទប់ស្កាត់ការដឹកលើសទម្ងន់កំណត់ ដើម្បីធានាការប្រើប្រាស់បានយូអង្វែង។ ឯកឧត្តមរដ្ឋមន្រ្ដីរូបនេះ អះអាងថា គោលនយោបាយ របស់រាជរដ្ឋាភិបាលលើវិស័យអភិវឌ្ឍន៍ជនបទ គឺការស្ដារ និងកសាងហេដ្ឋារចនាសម្ព័ន្ធជនបទ ដោយលើកកម្ពស់ផ្លូវជនបទ ពីផ្លូវក្រាលក្រួសក្រហមឱ្យទៅជាផ្លូវក្រាលកៅស៊ូ (DBST) និងផ្លូវបេតុង ដើម្បីធានាការប្រើប្រាស់គ្រប់រដូវកាល សំដៅលើកកម្ពស់កម្រិតជីវភាពរស់នៅ របស់ប្រជាពលរដ្ឋឱ្យកាន់តែប្រសើរឡើងជាលំដាប់។លូវជនបទក្រាលកៅស៊ូពីរជាន់ (DBST) ដែលសម្ពោធនេះ មានប្រវែងសរុប១១៦,៦៣គីឡូម៉ែត្រ និងផ្លូវបេតុងមានប្រវែង៣,៤១ គីឡូម៉ែត្រ ជានិមិត្តរូបតំណាងឱ្យខេត្តគោលដៅទាំង៦ ជំហាន២ ក្រោមហិរញ្ញប្បទានឥតសំណងរបស់ប្រទេសចិន។ គម្រោងផ្លូវខាងលើនេះ បានចាប់ផ្តើមដំណើរការ ពីខែវិច្ឆិកា ឆ្នាំ២០១៩ និងបានបញ្ចប់នៅខែតុលា ឆ្នាំ២០២២ បានចំណាយថវិកាសរុបជាង៤៧លានដុល្លារអាម៉េរិក (៤៧២៣២៧៨៤ដុល្លារ) សម្រាប់ធ្វើការដោះមីន និងយុទ្ធភ័ណ្ឌមិនទាន់ផ្ទុះ និងសេវាទីប្រឹក្សាបច្ចេកទេស ត្រួតពិនិត្យការអនុវត្តគម្រោង និងសម្រាប់ការងារប្រតិបត្តិការគម្រោង។សូមរម្លឹកថា គម្រោង​កែលម្អ​ផ្លូវ​ជនបទ​ជំហាន​ទី២ ក្រោម​ហិរញ្ញប្បទានឥត​សំណង​ពី​រដ្ឋាភិបាល​​ចិន ជា​គម្រោង​របស់​រាជរ​ដ្ឋា​ភិ​បាល​កម្ពុជា គ្រប់គ្រង​ដោយ​ក្រសួង​អភិវឌ្ឍន៍ជនបទ មាន​រយៈពេល៣០ខែ​ចាប់ពី​ថ្ងៃទី០១ ខែធ្នូ ឆ្នាំ២០១៩ ដល់​ថ្ងៃទី៣១ ខែឧសភា ឆ្នាំ២០២២ ដោយ​អនុវត្ត​នៅក្នុង​ខេត្ត​គោលដៅ​ចំនួន៦ គឺ​ខេត្តកំពង់ស្ពឺ ៤ខ្សែ ខេត្តកណ្តាល ៣ខ្សែ ខេត្ត​ត្បូងឃ្មុំ ២ខ្សែ ខេត្តព្រៃវែង ១ខ្សែ ​ខេត្តស្វាយរៀងចំនួន ១ខ្សែ និង​នៅ​ខេត្តកំពង់ឆ្នាំង​មាន​ចំនួន ៦ខ្សែ ប្រវែង​សរុប៣៦គីឡូម៉ែត្រនឹង៥២០ម៉ែត្រ រួមទាំង​សំណង់​រំដោះ​ទឹក​ផងដែរ...៕