ទីស្តីការក្រសួង៖ រសៀលថ្ងៃព្រហស្បតិ៍ ៣កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ២៧ ខែតុលា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញធ្វើបាឋកថាជូនដល់សិក្ខាកាមជាន់ខ្ពស់ នៃសាលាភូមិន្ទរដ្ឋបាលលើប្រធានបទ ភាពជាអ្នកដឹកនាំ និងនវានុវត្តន៍សេវាសាធារណៈរបស់ក្រសួង ដោយមានការចូលរួមពីសំណាក់ថ្នាក់ ដឹកនាំក្រសួង គណៈគ្រប់គ្រងសាលាភូមិន្ទរដ្ឋបាល និងមន្ត្រីពាក់ព័ន្ធ។ ថ្លែងក្នុងបាឋកថានាឱកាសនេះ ឯកឧត្តមទេសរដ្ឋមន្ត្រី បានលើកឡើងពីលទ្ធផលការងារជាច្រើន ដែលកើតចេញពីការប្រឹងប្រែងរបស់ថ្នាក់ដឹកនាំក្រសួង និងមន្ត្រីគ្រប់ជាន់ថ្នាក់ ដែលសម្រេចបានដោយឆន្ទៈមនសិការការងារខ្ពស់ រួមមាន៖ វិស័យហេដ្ឋារចនាសម្ព័ន្ធផ្លូវ ស្ពាន កំពង់ផែ វិស័យដឹកជញ្ជូនផ្លូវគោក ផ្លូវទឹក ផ្លូវដែក វិស័យភស្តុភារកម្ម និងជាពិសេសប្រព័ន្ធស្វ័យប្រវត្តិកម្ម ព្រមទាំងទំនើបកម្មប្រព័ន្ធបច្ចេកវិទ្យាផ្តល់សេវាសាធារណៈ ដែលកាន់តែនាំមកនូវភាពងាយស្រួលជូនដល់បងប្អូនប្រជាពលរដ្ឋ។ លើសពីនោះទៅទៀត ឯកឧត្តមទេសរដ្ឋមន្ត្រី បានចែករំលែកនូវបទពិសោធន៍ល្អៗជាច្រើន ដែលនាំឱ្យ ឯកឧត្តមទទួលបានជោគជ័យក្នុងភាពជាអ្នកដឹកនាំកន្លងមក ជូនដល់សិក្ខាកាមគ្រប់រូប។ ហើយនៅចុងបញ្ចប់នៃការធ្វើបាឋកថា ឯកឧត្តមទេសរដ្ឋមន្ត្រី ក៏បានបកស្រាយនូវចម្ងល់ និងសំណួរពាក់ព័ន្ធនឹង វិស័យសាធារណការ និងដឹកជញ្ជូន ដែលសិក្ខាកាមបានធ្វើការចោទសួរផងដែរ។ កម្មវិធីបានបញ្ចប់ទៅដោយការធ្វើទស្សនកិច្ចទីតាំងសំខាន់ៗមួយចំនួន ក្នុងក្រសួងសាធារណការ និងដឹកជញ្ជូន ដើម្បីស្វែងយល់បន្ថែមអំពីរបៀបរបបនៃការធ្វើការងាររបស់មន្ត្រីក្នុងការផ្តល់សេវាសាធារណៈជូនប្រជាពលរដ្ឋ៕