កិច្ចប្រជុំដើម្បីពិនិត្យពិភាក្សាលើលក្ខណៈបច្ចេកទេសនៃការបង្កើតផ្លាកសញ្ញាថ្មី សម្រាប់បំពាក់នៅតាមតំបន់ការពារធម្មជាតិ និងតំបន់ទេសចរណ៍នានា ទីស្តីការក្រសួង៖ នៅព្រឹកថ្ងៃពុធ ២កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៦ ខែតុលា ឆ្នាំ២០២២ ឯកឧត្តម យិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ដើម្បីពិនិត្យពិភាក្សាលើលក្ខណៈបច្ចេកទេសនៃផ្លាកសញ្ញាថ្មីសម្រាប់បំពាក់នៅតាមតំបន់ការពារធម្មជាតិ និងតំបន់ទេសចរណ៍នានា ដោយមានការចូលរួមពីមន្ត្រីបច្ចេកទេសពាក់ព័ន្ធ។ អង្គប្រជុំបានពិនិត្យ និងពិភាក្សាលើផ្លាកសញ្ញាថ្មីៗដែលក្រសួងបរិស្ថានបានធ្វើការស្នើសុំមកកាន់ក្រសួងសាធារណការ និងដឹកជញ្ជូន មុននឹងចេញសេចក្តីប្រកាសឱ្យប្រើប្រាស់ជាផ្លូវការ និងបានចូលរួមផ្តល់មតិយោបល់កែលម្អ សំដៅធ្វើយ៉ាងណាឱ្យផ្លាកសញ្ញាទាំងនោះបង្ហាញនូវព័ត៌មានច្បាស់លាស់ ងាយយល់ និងត្រឹមត្រូវតាមបទដ្ឋានបច្ចេកទេសទាំងជាតិ និងអន្តរជាតិផងដែរ។ ថ្លែងក្នុងឱកាសនោះ ឯកឧត្តមរដ្ឋលេខាធិការ ប្រធានអង្គប្រជុំ ក៏បានផ្តល់អនុសាសន៍ណែនាំ ក្រុមការងារបច្ចេកទេសឱ្យយកចិត្តទុកដាក់ពន្លឿនការងារនេះ និងរៀបចំកិច្ចប្រជុំអន្តរក្រសួង ជាមួយក្រសួងបរិស្ថាននៅពេលបន្ទាប់ ដើម្បីពិនិត្យសម្រេចរួមគ្នា មុននឹងរៀបចំដាក់ជូន ឯកឧត្តមទេសរដ្ឋមន្ត្រី ចុះហត្ថលេខា។ សូមជម្រាបជូនដែរថា៖ ក្រសួងបរិស្ថានបានរៀបចំបង្កើតនូវផ្លាកសញ្ញា ដើម្បីស្នើសុំមកក្រសួងសាធារណការ និងដឹកជញ្ជូន ធ្វើការពិនិត្យ ហើយគ្រោងយកទៅបំពាក់នៅតាមតំបន់ទេសចរណ៍ តំបន់ឧទ្យានជាតិ និងតំបន់ការពារធម្មជាតិ។ មួយវិញទៀតក្រសួងបរិស្ថាន ក៏បានស្នើសុំឱ្យក្រសួងជួយបំពាក់ផ្លាកសញ្ញា ដែលបានបង្កើតថ្មីនេះដែរ នៅតាមផ្លូវដែលឆ្លងកាត់តំបន់ទេសចរណ៍ តំបន់ឧទ្យានជាតិ និងតំបន់ការពារធម្មជាតិមួយចំនួន ក្នុងព្រះរាជាណាចក្រកម្ពុជាផងដែរ៕