បាត់ដំបង៖ ដើម្បីជួយសម្រួលប្រព័ន្ធរំដោះទឹកចេញពីទីក្រុង ខណៈទឹកភ្លៀងបានភ្លៀងធ្លាក់ជាប់ៗគ្នាបង្កឲ្យលិច តំបន់មួយចំនួននៅក្នុងសង្កាត់ទូលតាឯក និងសង្កាត់អូរចារនោះ មន្ទីរសាធារណៈការ និងដឹកជញ្ជូនខេត្តបាត់ដំបង ជាបន្តបន្ទប់មកដល់ថ្ងៃនេះបាន ធ្វើការស្តារប្រឡាយទឹកកខ្វក់ ជាក់ស្ដែងប្រឡាយទឹកកខ្វក់១ខ្សែ ដើម្បីរំដោះទឹកភ្លៀងដែលដក់លិចផ្លូវនៅក្នុងសង្កាត់ទួលតាឯក និងសង្កាត់អូរចារ ក្រុង-ខេត្តបាត់ដំបង ឲ្យស្ថានភាពនៃជំនន់ទឹកភ្លៀង បានវិលមករកភាពល្អប្រសើរឡើងវិញ។ អភិបាលខេត្តបាត់ដំបង លោក សុខ លូ បានដឹកនាំមន្ទីរជំនាញពាក់ព័ន្ធ រួមជាមួយអាជ្ញាធរក្រុងបាត់ដំបង អាជ្ញាធរសង្កាត់ពាក់ព័ន្ធ និងមន្ត្រីជំនាញសំខាន់ៗជាច្រើនទៀត បានចុះពិនិត្យវាយតម្លៃលើសកម្មភាពការងារ ដែលមន្រ្តីជំនាញរបស់មន្ទីរសាធារណៈការនិងដឹកជញ្ជូនខេត្តបាត់ដំបង កំពុងតែធ្វើការស្ដារប្រឡាយទឹកកខ្វក់១ខ្សែ ស្ថិតនៅក្នុង ភូមិអូរចារ សង្កាត់អូរចារ ដើម្បីកាយបើកមុខទឹកដែលកំពុងតែកកស្ទះដោយសម្រាមបង្កឲ្យមានការលិចផ្លូវលំ ផ្លូវគ្រួសក្រហម និងផ្លូវកៅស៊ូមួយចំនួននៅក្នុងសង្កាត់ទួលតាឯក ក្រុងនិងខេត្តបាត់ដំបង។ ប្រធានមន្ទីរសាធារណៈការ និងដឹកជញ្ជូនខេត្តបាត់ដំបង លោក ព្រួញ រិទ្ធថា បានបញ្ជាក់ថា ការស្តារប្រឡាយ បើកមុខទឹកនេះ គឺដើម្បីជួយសម្រួលជាបណ្តោះអាសន្នប៉ុណ្ណោះ ខណៈដែលប្រឡាយ១ខ្សែនេះស្ទះមុខទឹក បង្កដោយ ទឹកភ្លៀង ដែលកន្លងមកនេះខេត្តបាត់ដំបង មានភ្លៀងធ្លាក់ជោគជាំយ៉ាងខ្លាំងជិតមួយខែធ្វើឲ្យផ្លូវក្នុងក្រុង ទទួលរងការ ខូចខាតយ៉ាងធ្ងន់ធ្ងរ ហើយការចុះពិនិត្យលើសកម្មភាពនៃការស្តារប្រឡាយរំដោះទឹកក្នុងក្រុងនាពេលនេះ បានធ្វើឡើងនៅក្នុងពេលពេលដែលអាជ្ញាធរក្រុងបាត់ដំបង សហការជាមួយមន្ទីរសាធារណការនិងដឹកជញ្ជូនខេត្តបាត់ដំបងបាននាំ យកគ្រឿងចក្រទៅកាយប្រឡាយទឹកកខ្វក់ ដែលមានការកកស្ទះដោយសម្រាម និងកាកសំណល់ផ្សេងៗ បង្កឲ្យមានការលិចទឹកភ្លៀងនៅតំបន់មួយចំនួនក្នុងសង្កាត់ទាំង២នេះ ដោយបានធ្វើការបើកមុខទឹកឲ្យហូរធ្លាក់ទៅកាន់ប្រឡាយមេ មួយកន្លែងទៀតក្នុងភូមិអញ្ចាញ សង្កាត់អូរចារ ដោយមានកាត់ផ្លូវរថភ្លើង បន្តឆ្ពោះទៅកាន់ប្រឡាយកំពង់សីមា ព្រំ ប្រទល់របស់ស្រុកឯកភ្នំនៃខេត្តបាត់ដំបង។ លោក បានបន្តថា ការងារនេះត្រូវបានធ្វើឡើង ដោយផ្តោតសំខាន់ ដើម្បី ធ្វើការត្រួតពិនិត្យពីបញ្ហាប្រឈមកើតឡើងនៅទីនោះ ដែលបានបណ្តាលឲ្យលិចផ្លូវនិងភូមិឋានផ្ទះសម្បែងផ្នែកខ្លះ ក្នុង សង្កាត់ទួលតាឯក និងសង្កាត់អូរចារ ក្រុង-ខេត្តបាត់ដំបង ដោយសារតែការដក់ទឹកភ្លៀង និងគ្មានមុខទឹកហូរចេញពីភូមិ ទៅកាន់ប្រឡាយខាងក្រោម ដែលអាចបង្កឲ្យមានការខូចខាតនូវផ្លូវគ្រួសក្រហម ផ្លូវកៅស៊ូនៅទីនោះ និងមួយផ្នែកទៀត ដោយសារតែប្រព័ន្ធប្រឡាយរំដោះទឹកកខ្វក់នៅទីនេះមិនអាចហូរបាននិងស្ទះមុខទឹក ដោយសារតែកាកសំណល់សម្រាមនិងដោយសារតែមានការចាក់ដីលុបប្រឡាយជំនួសដោយការដាក់លូទឹកមិនត្រឹមត្រូវ ក្នុងនោះក៏មានប្រជាពលរដ្ឋ មួយចំនួននាំគ្នាសាងសង់ផ្ទះរំលោភលើដីចំណីផ្លូវ និងប្រឡាយទៀតផងដែរ។ អភិបាលខេត្តបាត់ដំបង លោក សុខ លូ បានជំរុញឲ្យអាជ្ញាធរក្រុង សង្កាត់ពាក់ព័ន្ធ និងមន្ទីរជំនាញ ត្រូវខិតខំ រួមគ្នាដោះស្រាយនូវបញ្ហាប្រឈមកើតឡើងចំពោះមុខនេះ ពិសេសត្រូវរួមគ្នាបន្តធ្វើការពិនិត្យសិក្សាស្រាវជ្រាវឲ្យបាន ច្បាស់លាស់ ដើម្បីរដ្ឋបាលខេត្តបាត់ដំបង រកដំណោះស្រាយពីបញ្ហាប្រឈមទាំងនេះ និងមិនបន្តឲ្យកើតមានជាថ្មីទៅ ថ្ងៃខាងមុខទៀត។ ក្នុងនោះលោក អភិបាលខេត្តបាត់ដំបង បានអំពាវនាវដល់ប្រជាពលរដ្ឋ សូមវេចខ្ចប់សម្រាមឲ្យ បានត្រឹមត្រូវនិងកុំចោលចូលទៅក្នុងប្រព័ន្ធលូ ឬប្រឡាយរំដោះទឹក និងការចាក់ដីលុបប្រឡាយ ក៏ដូចជាសាងសង់ សំណង់រំលោភលើដីប្រឡាយ ដើម្បីកុំឲ្យមានការកកស្ទះមុខទឹកបង្កឲ្យមានការលិចលំនៅឋាន និងសហគមន៍រស់នៅ របស់ខ្លួន៕