គណៈប្រតិភូកម្ពុជាអញ្ជើញចូលរួមកិច្ចប្រជុំឧត្តមមន្រ្តីដឹកជញ្ជូនអាស៊ានលើកទី៥៤ ប្រព្រឹត្តទៅនៅកោះបាលី ប្រទេសឥណ្ឌូណេស៊ី កោះបាលី ៖ ថ្ងៃសុក្រ ៤-៥រោច ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៤-១៥ ខែតុលា ឆ្នាំ២០២២ ឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម និងជាប្រធានឧត្តមមន្រ្តី ដឹកជញ្ជូនអាស៊ានរបស់កម្ពុជា (ASEAN Senior Transport Official Meeting, STOM) បានដឹកនាំ គណៈប្រតិភូកម្ពុជាអញ្ជើញចូលរួមកិច្ចប្រជុំឧត្តមមន្រ្តីដឹកជញ្ជូនអាស៊ានលើកទី៥៤។ កិច្ចប្រជុំនេះធ្វើឡើងក្នុងគោលបំណង ១) ពិនិត្យឡើងវិញនូវការអនុវត្តផែនការយុទ្ធសាស្រ្តដឹកជញ្ជូន កូឡាឡុំពូរ ២០១៦-២០២៥ (Kuala Lumpur Transport Strategic Plan 2016-2025, KLTSP-2025) ២) កំណត់ទិសដៅ និងផែនការសកម្មភាពសម្រាប់ការអនុវត្តផែនការ KLTSP-2025 នៅក្នុងឆ្នាំ២០២៣ និង ៣) រៀបចំការងារពាក់ព័ន្ធទៅនឹងកិច្ចប្រជុំរដ្ឋមន្រ្តីដឹកជញ្ជូនអាស៊ានលើកទី២៨ ពីថ្ងៃទី១៦-១៧ ខែតុលា ២០២២។ កិច្ចប្រជុំពេញអង្គនៃឧត្តមមន្រ្តីដឹកជញ្ជូនអាស៊ានលើកទី៥៤នេះ បានពិភាក្សាយ៉ាងផុលផុសអំពីចំណុច ខ្លាំង ចំណុចខ្សោយ បញ្ហាប្រឈម និងដំណោះស្រាយនៅគ្រប់វិស័យដឹកជញ្ជូនទាំងអស់រួមមាន៖ ១) ការដឹកជញ្ជូនផ្លូវអាកាស ២) ការដឹកជញ្ជូនផ្លូវទឹក និងផ្លូវសមុទ្រ ៣) ការដឹកជញ្ជូនផ្លូវគោក ៤) ការសម្រប សម្រួលការដឹកជញ្ជូន និង៥) ការដឹកជញ្ជូនប្រកបដោយនិរន្តរភាព។ ជាមួយគ្នានោះ កិច្ចប្រជុំពេញអង្គនេះក៏នឹងត្រៀមពិភាក្សាផងដែរអំពីការងារដែលត្រូវអនុវត្តបន្ត ជាពិសេស កិច្ចសហប្រតិបត្តិការជាមួយដៃគូសន្ទនា នានាដូចជា៖ ជប៉ុន ចិន កូរ៉េ សហគមន៍អ៊ឺរ៉ុបជាដើម ក្នុងគោល បំណងស្វែងរកប្រភពថវិកា និងជំនួយបច្ចេកទេសដើម្បីភាពជោគជ័យក្នុងភារកិច្ច អនុវត្ត KLTSP-2025៕