លោកង្វៀន ហ៊ុយថាំង ឯកអគ្គរដ្ឋទូតវិសាមញ្ញ និងពេញសមត្ថភាពសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា បានស្នើឱ្យកម្ពុជាជំរុញឱ្យមានការសិក្សាលទ្ធភាពលើការសាងសង់ផ្លូវដែកត្រង់តភ្ជាប់ពីរាជធានីភ្នំពេញ ទៅទីក្រុងហូជីមិញ ប្រទេសវៀតណាម។ លោកស្នើបែបនេះក្នុងឱកាសជួបពិភាក្សាការងារជាមួយលោកស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន នាថ្ងៃទី១៣ ខែតុលា ឆ្នាំ២០២២នេះ។ ទន្ទឹមគ្នានេះលោកង្វៀន ហ៊ុយថាំង ក៏បានស្នើឱ្យមានការសិក្សា និងការអភិវឌ្ឍការតភ្ជាប់ផ្លូវហាយវេ និងផ្លូវល្បឿនលឿនរវាងប្រទេសទាំងពីរ និងជំរុញឱ្យមានការអនុវត្តនីតិវិធីត្រួតពិនិត្យច្រកចេញតែមួយ (Single Window Single Inspection) ដើម្បីកាត់បន្ថយការចំណាយពេលវេលាយូរនៅច្រកទ្វារអន្តរជាតិបាវិត-ម៉ុកបៃ ដែលបណ្តាលឱ្យមានការកកស្ទះ។ ភាគីវៀតណាមក៏បានជំរុញឱ្យមានការតភ្ជាប់វិស័យគមនាគមន៍ក្នុងតំបន់សេដ្ឋកិច្ច និងទេសចរណ៍ និងជាពិសេសជើងហោះហើរត្រង់ពីទីក្រុងសៀមរាប ទៅកាន់ទីក្រុងហាឡុង ដើម្បីជំរុញកំណើនទេសចរណ៍របស់ប្រទេសទាំងពីរ។ ជាការឆ្លើយតបនឹងការលើកឡើងរបស់លោកឯកអគ្គរដ្ឋទូតវៀតណាមទាក់ទិននឹងផ្លូវល្បឿនលឿន លោករដ្ឋមន្រ្តីក្រសួងសាធារណការ បានឱ្យដឹងថា ក្រសួងបានចុះអនុស្សរណៈយោគយល់លើគម្រោងសាងសង់ផ្លូវល្បឿនលឿនភ្នំពេញ-បាវិតរួចរាល់ហើយ គ្រោងនឹងចុះកិច្ចព្រមព្រៀងសម្បទាន និងការបើកការដ្ឋានសាងសង់នាពេលខាងមុខ ហើយសង្ឃឹមថាគម្រោងសាងសង់ផ្លូវល្បឿនលឿនម៉ុកបៃ-ហូជីមិញ នឹងរួចរាល់ដំណាលគ្នាដើម្បីតភ្ជាប់ក្នុងពេលនោះតែម្តង។យ៉ាងណាមិញលោករដ្ឋមន្រ្តី បានលើកឡើងថាចំណុចដែលវៀតណាមបានស្នើប៉ុន្មានចំណុចខាងលើនេះគឺសុទ្ធតែជាចំណុចគន្លឹះល្អៗ ក្នុងការរឹតចំណងមេត្រីភាព និងកិច្ចសហប្រតិបត្តិការរវាងប្រទេសទាំងពីរ ជាពិសេសលើការតភ្ជាប់វិស័យហេដ្ឋារចនាសម្ព័ន្ធដឹកជញ្ជូន សំដៅចូលរួមចំណែកក្នុងការលើកកម្ពស់វិស័យសេដ្ឋកិច្ច និងទេសចរណ៍៕