អាជ្ញាធរខេត្តព្រះវិហារប្រកាសពីការបិតការចរាចរណ៍ជាបណ្តោះអាសន្ន​ រថយន្តដឹកទំនិញធុនធ្ងន់គ្រប់ប្រភេទ​ នៅលើកំណាត់ផ្លូវជាតិលេខ៩៥​ ក្នុងភូមិសាស្ត្រស្រុកជ័យសែន​ ខេត្តព្រះវិហារ។ នេះបើយោងតាមសេចក្តីប្រកាសរបស់មន្ទីរសាធារណការ និងដឹកជញ្ជូនខេត្តព្រះវិហារ នៅថ្ងៃទី១០ ខែតុលា ឆ្នាំ២០២២។នៅក្នុងសេចក្តីប្រកាសបានឱ្យដឹងថាដោយសារស្ថានភាពគ្រោះទឹកជំនន់ទឹកភ្លៀង ដងស្ទឹងសែន បានបន្តឡើងដល់កម្រិតប្រកាសអាសន្ន​ ធ្វើឱ្យផ្លូវថ្នល់​ ស្ពាន​ មិនអាចទ្រាំទ្រនឹងរថយន្តដឹកទំនិញធុនធ្ងន់បានទេ។ ហេតុនេះហើយ មន្ទីរសាធារណការនិងដឹជញ្ជូនខេត្តព្រះវិហារ សូមធ្វើការបិទចរាចរណ៍ទាំងស្រុងជាបណ្ដោះអាសន្ន ចំពោះរថយន្តដឹកទំនិញធុនធ្ងន់គ្រប់ប្រភេទ នៅកំណាត់ផ្លូវជាតិលេខ៩៥ ចាប់ពីចំណុចគីឡូម៉ែត្រលេខ៤០ ដល់គីឡូម៉ែត្រលេខ៤១ ដែលស្ថិតក្នុងភូមិពុទ្រា ឃុំពុទ្រា ស្រុកជ័យសែន ខេត្តព្រះវិហារ ចាប់ពីថ្ងៃជូនដំណឹងនេះតទៅ រហូតដល់មានសេចក្តីជូនដំណឹងជាថ្មី។ ដើម្បីថែរក្សាផ្លូវថ្នល់ ស្ពាន កុំឱ្យបាក់ស្រុត និងធានដល់ការធ្វើចរាចរណ៍ប្រកបដោយសុវត្ថិភាពមន្ទីរសាធារណការ និងដឹកជញ្ជូនខេត្តព្រះវិហា សង្ឃឹមយ៉ាងមុតមាំថា ប្រជាពរដ្ឋដែលជាម្ចាស់រថយន្តដឹកទំនិញធុនធ្ងន់ទាំងអស់ នឹងចូលរួមអនុវត្តតាមសេចក្តីជូនដំណឹងខាងលើ៕