ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានណែនាំក្រុមការងារបច្ចេកទេស ក៏ដូចជាមន្ទីរសាធារណការ និងដឹកជញ្ជូនរាជធានី-ខេត្ត ឱ្យអនុវត្តការងាររបស់ខ្លួនជាប់ជាប្រចាំទាក់ទងនឹងការចុះបិទជង្ហុកសំបុកមាន់នៅក្នុងរដូវវស្សា ដែលសំបូរទៅដោយទឹកភ្លៀងធ្លាក់ជោគជាំនាឆ្នាំនេះ ដោយមិនត្រូវទុកផ្លូវនោះចោល បង្កការលំបាកដល់ការធ្វើដំណើររបស់ប្រជាពលរដ្ឋ ជាពិសេសត្រូវសម្រួលការតភ្ជាប់ភ្លាមៗនូវខ្សែផ្លូវទាំងឡាយណាដែលត្រូវទឹកជំនន់ហូរកាត់ផ្តាច់។ ការណែនាំនេះ បានធ្វើឡើងក្នុងកិច្ចប្រជុំប្រចាំសប្តាហ៍ទី១ ខែតុលា ឆ្នាំ២០២២ ដើម្បីពិនិត្យលើវឌ្ឍនភាពការងារ និងទិសដៅសកម្មភាពការងារបន្តរបស់ក្រសួងសាធារណការ និងដឹកជញ្ជូន នាព្រឹកថ្ងៃទី៥ ខែតុលា ឆ្នាំ២០២២។ ក្នុងកិច្ចប្រជុំ លោកទេសរដ្ឋមន្ត្រី ក៏បានសម្តែងនូវការកោតសរសើរដល់ថ្នាក់ដឹកនាំ មន្ត្រីរាជការ និងសមាជិកសមាជិកានៃក្រុមការងារទាំងអស់ ដែលបានខិតខំប្រឹងប្រែងបំពេញការងារតាមជំនាញរបស់ខ្លួនដោយយកចិត្តទុកដាក់ និងប្រកបដោយស្មារតីទទួលខុសត្រូវខ្ពស់ និងបានជំរុញលើកទឹកចិត្តឱ្យមន្រ្តីរាជការទាំងអស់ខិតខំប្រឹងប្រែងបំពេញការងាររបស់ខ្លួនឱ្យកាន់តែសកម្ម និងប្រកបដោយមនសិការបន្តទៀត ដើម្បីនាំយកផលប្រយោជន៍ និងភាពរីកចម្រើនជូនជាតិមាតុភូមិយើង។ សូមបញ្ជាក់ថា ក្នុងកិច្ចប្រជុំនោះ ក៏បានពិភាក្សាផ្លាស់ប្តូរយោបល់យ៉ាងផុសផុល ក្នុងស្មារតីយកចិត្តទុកដាក់ខ្ពស់ សំដៅឱ្យគម្រោងការងារដែលកំពុង និងត្រៀមរៀបចំអនុវត្ត សម្រេចបានដោយជោគជ័យតាមផែនការ ដែលបានគ្រោងទុក។ បន្ថែមពីលើនេះ លោកទេសរដ្ឋមន្ត្រី បានផ្តល់ជាមតិយោបល់ និងអនុសាសន៍ណែនាំល្អៗ ដើម្បីជាជំនួយក្នុងការយកទៅអនុវត្តគម្រោងការងារទាំងអស់ឱ្យកាន់តែមានប្រសិទ្ធភាព និងគុណភាពការងារខ្ពស់ផងដែរ៕