(ខេត្តព្រះវិហារ)៖ ខេត្តព្រះវិហារ បានប្រកាសសម្រេចផ្អាកចរាចរណ៍បណ្តោះអាសន្នរថយន្តគ្រប់ប្រភេទ លើកំណាត់ផ្លូវជាតិលេខ៩២ ចាប់ពីចំណុចគីឡូម៉ែត្រលេខ១០០ ដល់គីឡូម៉ែត្រលេខ១០១ ដោយសារស្ថានភាពគ្រោះទឹកជំនន់ទឹកភ្លៀងបានបន្តឡើង រហូតកម្រិតប្រកាសអាសន្ន។ យោងតាមសេចក្តីជូនដំណឹងរបស់ មន្ទីរសាធារណការ និងដឹកជញ្ជូន ខេត្តព្រះវិហារ នាថ្ងៃទី៤ ខែតុលា ឆ្នាំ២០២២នេះ បានបញ្ជាក់ថា៖ «ដោយស្ថានភាពគ្រោះទឹកជំនន់ទឹកភ្លៀង បានបន្តឡើងរហូតកម្រិតប្រកាសអាសន្ន មិនអាចធ្វើចរាចរណ៍បានចំពោះរថយន្តគ្រប់ប្រភេទ លើកំណាត់ផ្លូវជាតិលេខ៩២ ចាប់ពីចំណុចគីឡូម៉ែត្រលេខ១០០ ដល់គីឡូម៉ែត្រលេខ១០១ (ចំណុចក្បាលដំរី) ក្នុងឃុំមរកត ស្រុកជាំក្សាន្ត ខេត្តព្រះវិហារ»។ ហេតុនេះ មន្ទីរសាធារណការ និងដឹកជញ្ជូនខេត្តព្រះវិហារ សូមធ្វើការបិទចរាចរណ៍ទាំងស្រុងជាបណ្តោះអាសន្ន ចំពោះរថយន្តគ្រប់ប្រភេទទាំងអស់ ចាប់ពីថ្ងៃជូនដំណឹងនេះតទៅ រហូតដល់មានសេចក្តីជូនដំណឹងសាជាថ្មី។ គួរបញ្ជាក់ថា ជំនន់ទឹកភ្លៀង បានវាយលុកយ៉ាងខ្លាំងនៅបណ្ដាខេត្តភាគខាងលិចនិងភាគខាងជើងប្រទេសកម្ពុជា នាប៉ុន្មានសប្ដាហ៍កន្លងទៅនេះ ដែលបណ្ដាលឱ្យមនុស្សស្លាប់ និងផ្ទះជាច្រើនខ្នងទៀតរងផលប៉ះពាល់។ ការណ៍នេះបង្កជាក្ដីបារម្ភថា គ្រោះធម្មជាតិនេះនាំឱ្យមានការខូចខាតលើសេដ្ឋកិច្ចកម្ពុជាផងដែរ។ ទន្ទឹមនឹងជំនន់ទឹកភ្លៀងនេះដែរ ក្រសួង​ធនធានទឹក និង​ឧតុនិយម​ នៅថ្ងៃទី៤ ខែតុលា ឆ្នាំ២០២២ ក៏បានអំពាវនាវឱ្យប្រជាពលរដ្ឋ បន្តប្រុងប្រយ័ត្នចំពោះបាតុភូតធម្មជាតិ ដែលអាចកើតមានឡើងជាយថាហេតុ។ ក្រសួង​ធនធានទឹក ក៏បានបញ្ជាក់ទៀតថា៖ ចាប់ពី​ថ្ងៃ​ទី​៥ ដល់​ថ្ងៃ​ទី​១១ ខែតុលា ឆ្នាំ​២០២២ ប្រព័ន្ធសម្ពាធទាប (ITCZ) បន្តអូសបន្លាយកាត់លើកម្ពុជាជាមួយ និងខ្យល់មូសុងនិរតីខ្សោយ។ ទន្ទឹមនោះការជួបប្រសព្វគ្នារវាងទ្រនុងសម្ពាធខ្ពស់ពីប្រទេសចិន (ភាគខាងជើង) និងសម្ពាធទាបដែលរុញពីក្រោមក៏មានឥទ្ធិពលលើកម្ពុជាផងដែរ។ស្ថានភាព​បែប​នេះ​នឹង​ធ្វើ​ឱ្យ​ភ្លៀងនៅតែបន្តធ្លាក់ជាប់ជាបន្តបន្ទាប់នៅលើផ្ទៃប្រទេសកម្ពុជា៕