[VAYO FM] - អ្នកសេដ្ឋកិច្ច៖ កម្ពុជាគួរអភិវឌ្ឍន៍ផ្លូវល្បឿនលឿនបន្ថែមទៀតដើម្បីលើកកម្ពស់វិស័យដឹកជញ្ជូន
2022-10-03
ទៅកាន់ទំព័រចុះផ្សាយក្នុង VAYO FM
ផ្លូវល្បឿនលឿនដំបូងបង្អស់នៅកម្ពុជា ដែលតភ្ជាប់ពីរាជធានីភ្នំពេញទៅកាន់ក្រុងព្រះសីហនុ ខេត្តព្រះសីហនុ ត្រូវបានដាក់ឱ្យដំណើរការសាកល្បងដោយឥតគិតថ្លៃពេញមួយខែ ចាប់ពីថ្ងៃទី០១ ដល់ថ្ងៃទី៣១ ខែតុលា ឆ្នាំ២០២២។
ជុំវិញការដាក់ដំណើរការផ្លូវនេះ លោកបណ្ឌិតគី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានលើកឡើងថា៖ ការដាក់ឱ្យដំណើរការផ្លូវល្បឿនលឿនភ្នំពេញ-ព្រះសីហនុនេះមានន័យថា កម្ពុជាឈានទៅដល់ការអភិវឌ្ឍក្នុងការកាត់បន្ថយថ្លៃដើមលើវិស័យដឹកជញ្ជូនពីតំបន់នានាតាមផ្លូវជាតិសំខាន់ៗទៅកាន់តំបន់កំពង់ផែនាំចេញរបស់កម្ពុជា។ មិនប៉ុណ្ណោះ លោកបណ្ឌិតថា ផ្លូវល្បឿនលឿននេះក៏នឹងជួយជំរុញលើវិស័យទេសចរណ៍ ព្រមទាំងជាតំណភ្ជាប់ដ៏ពិសេសថ្មីមួយដែលអាចជួយលើកមុខមាត់កម្ពុជាថែមទៀត។
ជាមួយគ្នា អ្នកជំនាញសេដ្ឋកិច្ចរូបនេះយល់ឃើញថា កម្ពុជាគួរតែអភិវឌ្ឍន៍ឱ្យមានផ្លូវល្បឿនលឿននេះបន្ថែមទៀត ដើម្បីលើកកម្ពស់លើវិស័យដឹកជញ្ជូន ព្រោះផ្លូវនេះចូលរួមចំណែកបានច្រើនក្នុងការកាត់បន្ថយលើការចំណាយថ្លៃដើម។គួរជម្រាបថា ក្រោយផ្លូវល្បឿនលឿនភ្នំពេញ-ព្រះសីហនុ ត្រូវបានដាក់ឱ្យដំណើរការសាកល្បងនៅថ្ងៃទី០១តុលា មានយានយន្តប្រមាណជិត៩,០០០គ្រឿងបានចរាចរណ៍លើផ្លូវនេះ។ ជាការកត់សម្គាល់ ក្នុងចំណោមយានយន្តដែលបានចរាចរណ៍ទាំងនោះ មិនត្រឹមតែមានអ្នកដំណើរកម្សាន្តជាលក្ខណៈគ្រួសារប៉ុណ្ណោះទេ ប៉ុន្តែក៏មានទាំងយានយន្តដឹកជញ្ជូនដែលស្របតាមលក្ខណៈបច្ចេកទេសបានយកឱកាសនេះក្នុងការដឹកជញ្ជូនទំនិញរបស់ខ្លួនផងដែរ។ នេះបើតាមការបញ្ជាក់របស់ក្រសួងសាធារណការនិងដឹកជញ្ជូន៕
