[Angrut] - បទបញ្ជាលោកនាយករដ្ឋមន្ត្រី ហ៊ុន សែន ជុំវិញការដឹកលើសទម្ងន់ និងតទ្រុង
2018-04-21
ទៅកាន់ទំព័រចុះផ្សាយក្នុង Angrut
ព្រៃវែង ៖ ស្ពាន “ត្សឹបាសា” ឫស្ពានអ្នកលឿង ទទួលរងគ្រោះទៀតហើយ ដោយសារតែរថយន្តធុនធំ ដឹកលើសទម្ងន់ រាប់សិបតោន បានបើកចុះចំណោត រ៉េចង្កូតកៀបជាប់នឹងចិញ្ចើមឃឿនស្ពាន ផុងដាច់ថ្នល់កៅស៊ូ ចំនួន២កន្លែង កាលពីម៉ោង១និង២០នាទី រសៀលថ្ងៃទី២០ មេសា ២០១៨ ស្ថិតក្នុងភូមិព្រែកខ្សាយ ឃុំព្រែកខ្សាយ(ក) ស្រុកពាមរក៍ ខេត្តព្រៃវែង ។
សមត្ថកិច្ចមូលដ្ឋានបានអោយដឹងថា នៅមុនពេលកើតហេតុគេឃើញរថយន្តធុនធំ១គ្រឿងម៉ាកហ៊ិនដាយ ពណ៌ខៀវ ពាក់ស្លាកលេខ ព្រះសីហនុ 3A-1787 បើកបរដោយបុរសម្នាក់ ឈ្មោះ ង៉ែត សុភ័ក្រ អាយុ៣៣ឆ្នាំ រស់នៅភូមិពស់ពង ឃុំនរាយ ស្រុកឈូក ខេត្តកំពត ដែលបានបើកដឹកស៊ីម៉ង់ត៍ ក្នុងទិសដៅពីភ្នំពេញ ទៅស្វាយរៀង។ លុះពេលបើកមកដល់ចំណុចខ្សែកាបខាងលើ ចុះចំណោត រថយន្តបានដាច់ទុយោខ្យល់បណ្តាលឲ្យរ៉េចង្កូត កៀបជាប់នឹងចិញ្ចើមឃឿនស្ពាន កូតដាច់ថ្នល់កៅស៊ូ ចំនួន២កន្លែង ។
ជុំវិញករណីនេះ ស្ពាន«ត្សឹបាសា»អ្នកលឿង រងគ្រោះព្រោះរថយន្តកងដឹកជញ្ជូន H.C ដឹងលើសទម្ងន់ មហាជនមានចម្ងល់ថា ស្ថានីយថ្លឹងរថយន្ត នៅសងខាងស្ពានអ្នកលឿង មានទាំងខាងកើតនិងខាងលិច ចុះហេតុអ្វីថ្លឹងមិនឃើញលើសទម្ងន់ ? ទាល់តែបើកផុងកៅស៊ូស្ពាន ទើបដឹងថាដឹកលើសទម្ងន់ ? សង្ស័យជញ្ជីងទាំងពីរខូចទេដឹង ? ជាមួយគ្នានេះ ប្រជាពលរដ្ឋសុំឲ្យមន្ត្រីជំនាញវាសផងថា តើរថយន្តដឹកលើសចំណុះប្រភេទនេះ មានប្រវែង ប៉ុន្មាន ?
កន្លងមកលោកនាយករដ្ឋមន្ត្រី ហ៊ុន សែន បានដាក់បទបញ្ជាថា ៖ គ្រោះថ្នាក់ចរាចរណ៍ នៅប្រទេសយើងនៅតែច្រើន អារឿងរថយន្តដឹកទំនិញ លើសទម្ងន់នេះ ខ្ញុំសូមដាក់ចេញតែម្ដង មើលក្រុមហ៊ុនណាដឹកលើសទម្ងន់ យើងអាចចាប់រថយន្តហើយ បិទក្រុមហ៊ុនតែម្ដង បើអ្នកឯងមិនកែខ្ញុំបិទក្រុមហ៊ុនចោល ។ រឿងកាត់ឡានត ខ្ញុំសូមបញ្ជាក់ចាប់ពី០ម៉ោងយប់នេះ ទៅឡានតទាំងប៉ុន្មាន មិនត្រូវឲ្យមាននៅលើផ្លូវទេ បើមាននៅខេត្តណាចៅហ្វាយខេត្ត នោះត្រូវទទួលខុសត្រូវ បែងចែកគ្នាទទួលខុសត្រូវ ខ្ញុំនឹងតាមមើល ដឹងដៃ ហ៊ុន សែន ហើយបើចង់ដកចៅហ្វាយខេត្ត ចៅហ្វាយស្រុកមិនយូរទេ។ ឲ្យតែមានឡានតខុស ទំនងចាប់បញ្ចូលទ្រុង ទាំងអស់ហើយចាំឲ្យគេលើកគ្នា មកតវ៉ាដល់ផ្ទះហ៊ុនសែន ហើយចាប់បញ្ជូនទៅព្រៃស ទាំងអស់តែម្ដង។
-ខ្ញុំសូមដាក់បទបញ្ជានេះ មិនត្រូវបានលើកលែង រដ្ឋមន្ត្រីក៏ត្រូវអស់ដំណែង អ្នកណាដោះលែងអ្នកនោះមានទោស និយាយគ្នាចេះឆាប់ចប់។ ផ្ដាំទៅអ្នករកស៊ីតឡានទាំងអស់ កុំឡើងលើផ្លូវ នឹងត្រូវចាប់ហើយ អ្នកណាលែងខ្ញុំដាក់អ្នកហ្នឹងហើយ។
-សូមចូលមកខាំមិនក្នុងផេកខ្ញុំ ។ មើលទៅគណៈកម្មការសុវត្ថិភាពចរាចរណ៍ ផ្លូវគោកដាក់ទៅមិនស្ដាប់ឥឡូវ ដាក់កណ្ដាប់ដៃដែកហ៊ុនសែនម្ដង។ អាដឹកលើសចំណុះអាឡាន កាត់តកុំឲ្យមានវត្តមានលើផ្លូវ។ ឡានគេធ្វើត្រូវស្ដង់ដា របស់គេហើយ ។ ចាប់យកទៅដាក់ នៅតុលាការទាំងអស់ទៅ ។
-ចំពោះរថយន្តដឹកជញ្ជូនលើសទម្ងន់ ក្នុងប្រទេសកម្ពុជាទាំងអស់ គឺក្រសួងមន្ទីរពាក់ព័ន្ធនានា ត្រូវជួបប្រជុំជាមួយម្ចាស់ ឬតំណាងក្រុមហ៊ុន ធ្វើការពន្យល់ណែនាំឲ្យបានច្បាស់ អំពីច្បាប់ចរាចរណ៍ និងការដឹកជញ្ជូន និងផ្ទុកទំនិញលើសទម្ងន់ ដែលអាចបង្កផលប៉ះពាល់ដល់ការខូចខាតផ្លូវថ្នល់ និងស្ពាន ព្រមទាំងអាចបង្កគ្រោះថ្នាក់ផ្សេងៗ ដល់ប្រជាពលរដ្ឋធ្វើដំណើរ ។ បើក្រុមហ៊ុនណា មិនគោរពតាមច្បាប់ គឺត្រូវចាប់រថយន្តនោះទុក ហើយនឹងអាចឈានទៅបិទក្រុមហ៊ុននោះតែម្តង ។ យើងត្រូវនិយាយគ្នាអោយច្បាស់អំពីរឿងហ្នឹង” ។
បទបញ្ជាម៉ឺងម៉ាត់ជាថ្មីម្តងទៀត ដែលបញ្ចេញកណ្តាប់ដៃដែកជាលើកទី២ ចំពោះរថយន្តតទ្រុងកែច្នៃខុសលក្ខណៈបច្ចេកទេសដឹកលើសទម្ងន់ ត្រូវបានលោកនាយករដ្ឋមន្ត្រី ហ៊ុន សែន ប្រកាសកាលពីព្រឹកថ្ងៃទី៩ ខែកុម្ភៈ ឆ្នាំ២០១៨ ។
គេនៅចាំបានថា ក្នុងពេលកន្លងមក ក្រសួងសាធារណការ និងដឹកជញ្ជូន សហការជាមួយមន្ត្រីជំនាញពាក់ព័ន្ធ បានធ្វើការងារនេះ ដោយដាក់កម្លាំងជាច្រើនក្រុម រៀបចំជាជញ្ជីងថ្លឹងឡាន នៅតាមផ្លូវជាតិជាច្រើន ដោយមានទាំងក្រុមជញ្ជីងថ្លឹងឡានចល័តថែមទៀត ដើម្បីទប់ស្កាត់ឡានដឹកលើសទម្ងន់។ ក្រៅពីនោះ ក៏មានក្រុមមន្ត្រីជំនាញ ចុះចាប់ឡានតទ្រុង ហើយបានកាត់ឡានទាំងនោះ ព្រមទាំងពិន័យបានប្រាក់រាប់លានថែមទៀត ក្នុង១ខែៗ ។
ក៏ប៉ុន្តែទន្ទឹមនឹងវិធានការកន្លងមកនេះ ក៏មានការលើកឡើងថា យូរៗទៅ មន្ត្រីជំនាញផ្នែកជញ្ជីងថ្លឹង ដែលបង្កើតទីស្នាក់ការតាមផ្លូវជាតិ ព្រមទាំងមន្ត្រីកាន់ជញ្ជីងចល័ត ក៏ដូចជាមន្ត្រីជំនាញខាងចាប់ឡានកាត់ទ្រុង ដែលតខុសបច្ចេកទេស បែរជាយកការងារនេះ ធ្វើជាមុខរបរ រកលុយ ធ្វើមាន ធ្វើបានទៅវិញ ។ ពោលគឺរថយន្តដឹកទំនិញ ដែលតទ្រុងខុសលក្ខណៈបច្ចេកទេស ដឹកជំនិញលើសទម្ងន់ គ្រាន់តែបើកចូលកន្លែងដាក់ជញ្ជីងថ្លឹងនោះ ហើយចាប់ដៃ បង់លុយឲ្យមន្ត្រីប្រចាំការទាំងយប់ ទាំងថ្ងៃ តាមផ្លូវនោះហើយ គឺអាចបន្តដំណើរទៅមុខម៉ាស្រឡាញ់។ ចង់ដាក់ទំនិញលើសប៉ុន្មានតោន ក៏មន្ត្រីជំនាញយើង មិនខ្វល់ដែរ ៕
