កិច្ចប្រជុំលើកទី១០ ស្ថាប័នដឹកនាំការអនុវត្តគោលដៅយុទ្ធសាស្រ្តសម្រាប់ហេដ្ឋារចនាសម្ព័ន្ធប្រកបដោយចីរភាព នៃផែនការមេស្តីពីការតភ្ជាប់អាស៊ាន២០២៥ (LIB-SI) ដឹកនាំដោយឯកឧត្ដម ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានប្តូរវេន រាជធានីភ្នំពេញ៖ ថ្ងៃសុក្រ ០៥កើត ខែអស្សុជ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី៣០ ខែកញ្ញា ឆ្នាំ២០២២ ឯកឧត្ដម ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានប្តូរវេន (LIB-SI) បានអញ្ជើញដឹកនាំកិច្ចប្រជុំលើកទី១០ ស្ថាប័នដឹកនាំការអនុវត្តគោលដៅយុទ្ធសាស្រ្តសម្រាប់ហេដ្ឋារចនាសម្ព័ន្ធប្រកបដោយចីរភាព នៃផែនការមេស្តីពីការតភ្ជាប់អាស៊ាន ឆ្នាំ២០២៥ (10th Meeting of the Lead Implementing Body for the Master Plan on ASEAN Connectivity 2025 Strategic Area of Sustainable Infrastructure) ដោយមានការចូលរួមពីឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភស្ដុភារកម្ម រួមជាមួយតំណាង LIB-SIកម្ពុជា ដៃគូរអភិវឌ្ឍន៍ និងតំណាងបណ្តាប្រទេសជាសមាជិកអាស៊ានផ្សេងទៀត នៅសណ្ឋាគារ ហៃយ៉ាត់ រីជិនស៊ី ភ្នំពេញ លើកលែងតែប្រទេសឥណ្ឌូនេស៊ី ម៉ាឡេស៊ី និងមីយ៉ាន់ម៉ា ដែលចូលរួមតាមរយៈប្រព័ន្ធវីដេអូពីចម្ងាយ។ កិច្ចប្រជុំនេះក៏មានការចូលរួមកិច្ចសហការរៀបចំពីក្រសួងការបរទេស និងសហប្រតិបត្តិការអន្តរជាតិ និងក្រសួងសាធារណការ និងដឹកជញ្ជូន ផងដែរ។ កិច្ចប្រជុំនេះមានគោលបំណង ពិភាក្សាលើវឌ្ឍនភាពនៃការអនុវត្តគម្រោងដែលមាននៅក្នុងបញ្ជីគម្រោងអាទិភាពរំកិល (Initial Rolling Priority Pipeline Projects) របស់បណ្តាប្រទេសអាស៊ាន និងការពិនិត្យតាមដានក្របខណ្ឌសម្រាប់ការកែលម្អផលិតភាពហេដ្ឋារចនាសម្ព័ន្ធអាស៊ាន រួមទាំងកញ្ចប់កសាងសមត្ថភាពថ្នាក់តំបន់ជាអាទិភាពលើហេដ្ឋារចនាសម្ព័ន្ធប្រកបដោយចីរភាព។ អង្គប្រជុំបានពិភាក្សាអំពីបញ្ហាប្រឈម និងដំណោះស្រាយក្នុងការជំរុញឱ្យការអនុវត្តគម្រោងទាំងអស់សម្រេចបានទាន់ពេលវេលា និងប្រកបដោយប្រសិទ្ធភាពខ្ពស់។ អង្គប្រជុំក៏បានលើកមកពិភាក្សាផងដែរអំពីបច្ចុប្បន្នភាពរបាយការណ៍ត្រួតពិនិត្យវឌ្ឍនភាព នៃផែនការមេស្តីពីការតភ្ជាប់អាស៊ាន២០២៥ (MPAC 2025) លើកទី៤ ជាពិសេសលើផ្នែកពាក់ព័ន្ធទៅនឹងហេដ្ឋារចនាសម្ព័ន្ធប្រកបដោយចីរភាព និងការត្រៀមរៀបចំសម្រាប់កិច្ចប្រជុំ MPAC 2025 លើកទី៥ ដែលនឹងប្រព្រឹត្តទៅនៅថ្ងៃទី២ ខែតុលា ឆ្នាំ២០២២ ខាងមុខនេះ។ សូមបញ្ជាក់ផងដែរថា៖ កិច្ចប្រជុំនេះនឹងត្រូវធ្វើឡើងប្រទាក់គ្នា(Back-to-Back) ជាមួយនឹងគណៈកម្មាធិការសម្របសម្រួលការតភ្ជាប់អាស៊ាន (ACCC) និង LIB-SI នៅថ្ងៃសៅរ៍ ទី១ ខែតុលា ឆ្នាំ២០២២ និងសន្និសីទស្តីពីការតភ្ជាប់អាស៊ានលើកទី១៤ នៅថ្ងៃច័ន្ទ ទី៣ ខែតុលា ឆ្នាំ២០២២ ដើម្បីពិភាក្សាការអនុវត្តហេដ្ឋារចនាសម្ព័ន្ធប្រកបដោយចីរភាព (MPAC 2025) និងផ្លាស់ប្តូរទស្សនៈលើរបៀបវារៈក្រោយឆ្នាំ២០២៥៕