កិច្ចប្រជុំក្រុមការងារវិស័យភស្តុភារកម្ម និងសេវាដឹកជញ្ជូនអាស៊ានលើកទី៣២ (LTSSWG) តាមប្រព័ន្ធវីដេអូពីចម្ងាយ ដឹកនាំដោយឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម ក្រសួងសាធារណការ និងដឹកជញ្ជូន ថ្ងៃពុធ ៣កើត ខែអស្សុជ ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែកញ្ញា ឆ្នាំ២០២២ នៅទីស្តីការក្រសួង ឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម នៃក្រសួងសាធារណការ និងដឹកជញ្ជូន និងជាប្រធានដឹកនាំកិច្ចប្រជុំក្រុមការងារវិស័យភស្តុភារកម្ម និងសេវាដឹកជញ្ជូនអាស៊ាន លើកទី៣២ (LTSSWG) ដែលជាផ្នែកមួយក្នុងកិច្ចប្រជុំលើកទី១០២ នៃគណៈកម្មាធិការសម្របសម្រួល អាស៊ានស្ដីពីសេវាកម្ម (102nd Meeting of the ASEAN Coordinating Committee on Services) ដោយមានការចូលរួមពីតំណាងប្រទេសសមាជិកអាស៊ានទាំងអស់ និងលេខាធិការដ្ឋានអាស៊ាន តាមប្រព័ន្ធវីដេអូពីចម្ងាយ។ អង្គប្រជុំបានពិភាក្សា កែសម្រួល រៀបចំផែនការយុទ្ធសាស្រ្ត និងអនុវត្តរបៀបវារៈផ្អែកលើវិសាលភាពការងារដែលផ្ដល់ដោយគណៈកម្មាធិការសម្របសម្រួលអាស៊ានស្ដីពីសេវាកម្មក្នុងទិសដៅពង្រីកសមាហរណកម្មកាន់តែប្រសើរលើវិស័យភស្តុភារកម្ម និងដឹកជញ្ជូនក្នុងតំបន់អាស៊ាន តាមរយៈកម្មវិធីសេរីភាវូបនីយកម្ម ការសម្របសម្រួលនិងកិច្ចសហប្រតិបត្តិការ ការអនុវត្តផែនទីសម្រាប់សមាហរណកម្មសេវាភស្តុភារកម្ម ការអនុវត្តសកម្មភាពកិច្ចសហប្រតិបត្តិការសេដ្ឋកិច្ចពាក់ព័ន្ធនឹងវិស័យភស្តុភារកម្ម និងដឹកជញ្ជូន និងការពង្រីកកិច្ចសហប្រតិបត្តិការផ្នែកភស្តុភារកម្ម និងដឹកជញ្ជូនទាំងវិស័យរដ្ឋ និងវិស័យឯកជន។ ជាលទ្ធផល អង្គប្រជុំបានសម្រេចលើការកែសម្រួលរបៀបវារៈ ផែនការការងារ កែលម្អគេហទំព័រសេវាកម្ម ដឹកជញ្ជូនអាស៊ាន និងការចាត់តាំងក្រុមការងារមន្ត្រីបង្គោលសម្រាប់អនុវត្តការងារបន្តបន្ទាប់៕