លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឆ្លើយតបចម្ងល់របស់ប្រជាពលរដ្ឋ ដែលភាគច្រើនបានចោទសំណួរថា៖ «ហេតុអ្វីបានជាផ្លូវល្បឿនលឿនមិនបំពាក់ភ្លើងបំភ្លឺតាំងពីដើមទីរហូតដល់ចុងទី?»។ លោកបានបញ្ជាក់ដូច្នេះថា៖ នៅបណ្តាប្រទេសនានា អំពូលភ្លើងបំភ្លឺផ្លូវល្បឿនលឿន ត្រូវបានបំពាក់នៅតាមទីតាំងសំខាន់ៗមួយចំនួនប៉ុណ្ណោះដូចជា៖ ផ្លូវប្តូរទិស កន្លែងបង់ប្រាក់ និងកន្លែងឈប់សម្រាក ដើម្បីសន្សំសំចៃការប្រើប្រាស់ថាមពលអគ្គិសនី។ ថ្លែងក្នុងពេលអញ្ជើញចុះពិនិត្យ និងធ្វើដំណើរសាកល្បងនៅពេលយប់លើផ្លូវល្បឿនលឿនភ្នំពេញ-ព្រះសីហនុ ដើម្បីប្រាកដថាការបើកបរលើផ្លូវល្បឿនលឿននៅវេលានេះ ពិតជាធានាបាននូវសុវត្ថិភាពជូនពលរដ្ឋ កាលពីយប់ថ្ងៃទី២២ ខែកញ្ញា ឆ្នាំ២០២២ រដ្ឋមន្រ្តីក្រសួងសាធារណការបានបញ្ជាក់បន្ថែមថា បើទោះបីជាផ្លូវល្បឿនលឿនមួយខ្សែថ្មីរបស់កម្ពុជា មិនមានបំពាក់អំពូលភ្លើងបំភ្លឺយ៉ាងណាក៏ដោយ តែក៏បានបំពាក់ចំណាំងផ្លាតតាមរបាំងខណ្ឌចែកទ្រូងផ្លូវ របារ បង្គោលកំណត់ដែនផ្លូវ និងតាមគំនូសបែងចែកគន្លងផ្លូវ ដើម្បីជាជំនួយឱ្យអ្នកបើកបរយានយន្ត ងាយស្រួលក្នុងការបើកបរផងដែរ។ យ៉ាងណាក៏ដោយ លោក ស៊ុន ចាន់ថុល ក៏បានសង្កត់ធ្ងន់ថា បើសិនជាប្រជាពលរដ្ឋគោរពច្បាប់ចរាចរណ៍ និងបទដ្ឋានសុវត្ថិភាពចរាចរណ៍ផ្លូវល្បឿនលឿន នោះការបើកបរពិតជាមានសុវត្ថិភាព មិនថាពេលយប់ ឬក៏ជាពេលថ្ងៃឡើយ។ គួរជម្រាបថា ចាប់ពីថ្ងៃទី១-៣១ ខែតុលា ឆ្នាំ២០២២ ផ្លូវល្បឿនលឿនភ្នំពេញ-ព្រះសីហនុ ថ្មីដំបូងបង្អស់ក្នុងប្រវត្តិសាស្ត្រកម្ពុជា នឹងត្រូវដាក់ឱ្យដំណើរការសាកល្បងប្រើប្រាស់ដោយឥតគិតថ្លៃ។ ផ្លូវនេះមានប្រវែង ១៨៧,០៥គីឡូម៉ែត្រ ហើយត្រូវបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩។ ផ្លូវល្បឿនលឿននេះ មានតួផ្លូវទទឹង ២៤ម៉ែត្រ មាន ៤គន្លង (២ទៅ ២មក) និងគន្លងឈប់បន្ទាន់ (១ទៅ ១មក) ក្រាលបេតុងកៅស៊ូ (AC) តភ្ជាប់ពីរាជធានីភ្នំពេញទៅដល់សង្កាត់លេខ៣ ក្រុងព្រះសីហនុ ខេត្តព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។ ផ្លូវនេះមានសួនច្បារខណ្ឌកណ្តាល មានផ្លូវបំបែកប្តូរទិស (Inter-Change) ភ្ជាប់មកផ្លូវជាតិលេខ៤ ចំនួន ៦កន្លែង មានកន្លែងឈប់សម្រាក ៣កន្លែង និងចំណតរថយន្ត ១កន្លែងផងដែរ៕