ឯកឧត្ដមទេសរដ្ឋមន្ត្រី ស៊ុន ចាន់ថុល ដឹកនាំគណៈប្រតិភូក្រសួងចូលរួមពិធីកាន់បិណ្ឌ៥ នៅវត្តសុវណ្ណគិរី (ហៅវត្តពើងបាក់រទេះ) ឋិតក្នុងស្រុកជីក្រែង ខេត្តសៀមរាប សៀមរាប៖ ថ្ងៃព្រហស្បតិ៍ ៥រោច ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៥ ខែកញ្ញា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល បានដឹកនាំគណៈប្រតិភូក្រសួង ចូលរួមក្នុងពិធីកាន់បិណ្ឌ៥ នៅវត្តសុវណ្ណគិរី (ហៅវត្តពើងបាក់រទេះ) ឋិតក្នុងស្រុកជីក្រែង ខេត្តសៀមរាប ដោយមានការចូលរួមពីថ្នាក់ដឹកនាំ មន្ត្រីរាជការក្រសួង និងពុទ្ធបរិស័ទចំណុះជើងវត្តសរុបប្រមាណ១០០នាក់។ ក្នុងពិធីកាន់បិណ្ឌ៥នេះ ឯកឧត្ដមទេសរដ្ឋមន្ត្រី និងមន្ត្រីរាជការក្រសួង បាននាំយកទេយ្យវត្ថុ និងបច្ច័យមួយចំនួនប្រគេនព្រះសង្ឃដែលគង់ចាំព្រះវស្សាអស់ត្រីមាស ព្រមទាំងបានរៀបចំប្រារព្វពិធីតាមបែបសាសនា រាប់បាត្រ ពូនភ្នំខ្សាច់ ដើម្បីឧទ្ទិសកុសលផលបុណ្យជូនដល់បុព្វការីជនទាំងប្រាំពីរសណ្ដាន ដែលបានចែកឋានទៅកាន់បរលោក និងបានបួងសួងសូមឱ្យវត្ថុស័ក្កិសិទ្ធិទាំងពួងតាមជួយថែរក្សាទំនុកបម្រុងចម្រុងចម្រើនដល់មន្ត្រីរាជការនៃក្រសួងសាធារណការ និងដឹកជញ្ជូន ក៏ដូចជាបងប្អូនប្រជាពលរដ្ឋខ្មែរទាំងអស់ ជាពិសេសតាមជួយថែរក្សាប្រទេសជាតិយើងឱ្យមានសុខសន្តិភាព និងការអភិវឌ្ឍរីកចម្រើន។ នៅក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ ឆ្នាំខាល ចត្វាស័ក ព.ស.២៥៦៦ គ្រឹស្តសករាជ ២០២២ នេះ ឯកឧត្តមទេសរដ្ឋមន្ត្រី បានបួងសួងសូមបងប្អូនប្រជាពលរដ្ឋខ្មែរទាំងអស់ជួបប្រទះតែសេចក្តីសុខសេចក្តីចម្រើន សំបូរសប្បាយ និងមានសុវត្ថិភាពក្នុងពេលធ្វើដំណើរ។ គួរកត់សម្គាល់ថា៖ វត្តសុវណ្ណគិរី ស្ថិតនៅក្នុងភូមិអូរ ឃុំខ្វាវ ស្រុកជីក្រែង ខេត្តសៀមរាប មានចម្ងាយប្រមាណ៥០គីឡូម៉ែត្រពីផ្សារកំពង់ក្តីដោយធ្វើដំណើរតាមផ្លូវកៅស៊ូខ្លះ ផ្លូវក្រួសក្រហមខ្លះ និងផ្លូវដីខ្លះ៕