សមាជិក ស.ស.យ.ក ស្រុកកោះធំ ខេត្តកណ្ដាល ប្រមាណ៦០០នាក់ ទទួលបានការបណ្ដុះបណ្ដាលស្ដីពីសុវត្ថិភាពចរាចរណ៍ ដែលរៀបចំឡើងដោយ ក្រុមការងារ ស.ស.យ.ក វិស័យសាធារណការ និងដឹកជញ្ជូន កណ្ដាល៖ ថ្ងៃសៅរ៍ ១៥កើត ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១០ ខែកញ្ញា ឆ្នាំ២០២២ ក្រុមការងារ ស.ស.យ.ក វិស័យសាធារណការ និងដឹកជញ្ជូន សហការជាមួយក្រុមការងារយុវជនស្រុកកោះធំ បានបន្ដបើកវគ្គបណ្តុះបណ្តាលច្បាប់ ស្តីពីចរាចរណ៍ផ្លូវគោក ដល់យុវជន ស.ស.យ.ក ស្រុកកោះធំ ខេត្តកណ្តាល ប្រមាណចំនួន ៦០០នាក់។ វគ្គបណ្ដុះបណ្ដាលនេះធ្វើឡើងក្នុងគោលបំណងអប់រំផ្សព្វផ្សាយអំពីច្បាប់ ដល់យុវជន ឱ្យបានយល់ដឹងកាន់តែច្បាស់អំពីច្បប់ ស្តីពីចរាចរណ៍ផ្លូវគោក និងដើម្បីធ្វើការអប់រំផ្សព្វផ្សាយបន្ត។ ប្រធានបទសំខាន់ៗដែលធ្វើបទបង្ហាញនៅកក្នុងវគ្គបណ្ដុះបណ្ដាលនេះ រួមមាន៖ ស្ថានភាពគ្រោះថ្នាក់ចរាចរណ៍ផ្លូវគោក ការប្រើប្រាស់ល្បឿនក្នុងការបើកបរ សិទ្ធិអាទិភាពនៅត្រង់ផ្លូវប្រសព្វ ហានិភ័យនៃការបើកបរក្រោមឥទ្ធិពលនៃគ្រឿងស្រវឹង អត្ថប្រយោជន៍នៃមួកសុវត្ថិភាព ការត្រួតពិនិត្យទោចក្រយានយន្ត និងកម្មវិធីយល់ដឹងអំពីទ្រឹស្តីនៃការបើកបរលើទូរស័ព្ទដៃ (Cambodia Driving Rule)។ សម្រាប់សិក្ខាកាមដែលបានចូលរួមក្នុងវគ្គនេះក៏ទទួលបាននូវឯកសារ សៀវភៅច្បាប់ស្តីពីចរាចរណ៍ផ្លូវគោក សៀវភៅអ្វីដែលអ្នកបើកបរទោចក្រយានយន្តត្រូវយល់ដឹង ខិតបណ្ណ ជំនួយស្មារតីស្តីពីចរាចរណ៍ផ្លូវគោកសម្រាប់ផ្សព្វផ្សាយ ស្ទីកឃ័រចំណាំងផ្លាត និងមួកសុវត្ថិភាពផងដែរ៕