MC:អភិបាលខេត្តព្រះសីហនុបានស្នើគណៈកម្មាធិការជាតិសុវត្ថិភាពចរាចរណ៍ផ្លូវគោក ផលិតវីឌីអូអប់រំស្តីពីការប្រើប្រាស់ផ្លូវល្បឿនលឿន ដើម្បីឲ្យប្រជាពលរដ្ឋជាអ្នកប្រើប្រាស់ផ្លូវ មានការយល់ដឹង ពីការប្រើប្រាស់ផ្លូវ និងកាត់បន្ថយការស្លាប់ដោយសារគ្រោះថ្នាក់ចរាចរណ៍។ . ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុឱ្យដឹងថា សព្វថ្ងៃនេះខេត្តព្រះសីហនុ មានភាពរីកចម្រើនគួរឱ្យកត់សម្គាល់លើវិស័យជាច្រើន ជាពិសេសហេដ្ឋារចនាសម្ព័ន្ធ បានធ្វើឱ្យកំណើន យានយន្តនៅក្នុងខេត្តព្រះសីហនុក៏មានការកើនឡើង ហើយគ្រោះថ្នាក់ចរាចរណ៍ក្នុងឆមាសទី១ ឆ្នាំ២០២២នេះ មានការកើនឡើងគួរឱ្យព្រួយបារម្ភ ដែលនេះបញ្ជាក់ឱ្យឃើញពីការចូលរួមពង្រឹងវិធានការ ច្បាប់ចរាចរណ៍ផ្លូវគោកក៏ដូចជាដាក់ចេញយន្តការជាបន្តបន្ទាប់និងផ្សព្វផ្សាយទៅដល់ប្រជាពលរដ្ឋឱ្យយល់ ដឹងពីច្បាប់ចរាចរណ៍ផ្លូវគោកផងដែរ។ មានប្រសាសន៍នៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅ ការងារឆមាសទី២ ឆ្នាំ២០២២ កាលពីថ្ងៃទី១៨ ខែសីហា ឆ្នាំ២០២២ នៅទីស្តីការក្រសួង ឯកឧត្តម គួច ចំរើន បានស្នើដល់គណៈកម្មាធិការជាតិសុវត្ថិភាពចរាចរណ៍ផ្លូវគោក ឱ្យផលិតវីឌីអូអប់រំ ស្តីពី ការប្រើប្រាស់ផ្លូវល្បឿនលឿនដែលទាក់ទងនឹងច្បាប់ចរាចរណ៍ ដើម្បីផ្សាយនៅតាមទូរទស្សន៍ និង ដើម្បីឱ្យ ប្រជាពលរដ្ឋបានយល់ដឹងកាន់តែច្បាស់ ពីការប្រើប្រាស់ផ្លូវល្បឿនលឿនភ្នំពេញ ក្រុងសីហនុ ក្នុងការបើកបរ តាមលក្ខណៈបច្ចេកទេសដែលបានកំណត់ ខណៈផ្លូវល្បឿនលឿនភ្នំពេញ-ព្រះសីហនុនេះ គ្រោងបើកឱ្យ ដំណើរការសាកល្បងនៅខែតុលាខាងមុខនេះ។ «ជាក់ស្ដែងបច្ចុប្បន្ននេះយើងបានសង្កេតឃើញថាប្រជាពលរដ្ឋរបស់យើងអត់យល់ដឹងអំពីការប្រើប្រាស់ល្បឿនលឿនទេហើយការសង្កេតនៅក្នុងការគ្រប់គ្រងការងារគ្រោះថ្នាក់ចរាចរណ៍នេះយើងបានសង្កេតឃើញថាផ្លូវនៅពេលដែលកាន់តែល្អគ្រោះថ្នាក់កើតឡើងគឺកាន់តែបង្កគ្រោះថ្នាក់ធំគឺដល់ការស្លាប់និង ខូចខាតធ្ងន់ធ្ងរ ឥឡូវជាក់ស្តែងនាខេត្តព្រះសីហនុយើងមានផ្លូវដែលល្អនិងផ្លូវអាក្រក់ ជាក់ស្ដែងផ្លូវជាតិ លេខ៣ រាល់ថ្ងៃខូចខាតក្នុងការធ្វើដំណើរ អ៊ីចឹងឆ្នាំ២០២១ គឺគ្មានអ្នកស្លាប់ទេ បើទោះបីថាមានគ្រោះថ្នាក់ តិចតួច ប៉ុន្តែគ្មានអ្នកស្លាប់ត្រូវទាំងអស់ តែដោយឡែកផ្លូវដែលបានកសាងរួចងាយ គឺបើក ល្អងាយស្រួល ក៏ប៉ុន្តែពេលដែលគ្រោះថ្នាក់គឺបង្កឱ្យមានការស្លាប់បាត់បង់អាយុជីវិតនោះគឺថាលឿនឆាប់ឆាប់យើងខ្ញុំមានការព្រួយបារម្ភថានៅពេលខាងមុខនេះប្រសិនបើមានគ្មានការពន្យល់ណែនាំឱ្យបានច្បាស់លាស់ទេអំពីរបៀប របប នៃការប្រើប្រាស់ផ្លូវល្បឿនលឿននេះអាចនឹងបង្កឱ្យ ហើយក៏ឈានទៅដល់ការបាត់បង់អាយុជីវិត អ្នកធ្វើដំណើរច្រើនទៀតផងដែរលើផ្លូវល្បឿនលឿននេះ»។ ឯកឧត្តមបានបន្ថែមទៀតថា ការស្នើទៅដល់គណៈកម្មាធិការជាតិសុវត្ថិភាពចរាចរណ៍ផ្លូវគោកធ្វើស្ពតវីឌីដូអប់រំនេះឡើងក្នុងគោលបំណងចង់ឱ្យប្រជាពលរដ្ឋគាត់យល់ដឹងឱ្យបានកាន់តែច្បាស់ពីផ្លូវល្បឿនលឿននេះ ដោយសារកន្លងមកប្រទេស កម្ពុជាយើងមិនទាន់មានផ្លូវល្បឿនលឿនទេ គឺមានតែផ្លូវជាតិធម្មតា។ សូមជម្រាបជូនថា បើតាមការបញ្ជាក់របស់ ឯកឧត្តម គួច ចំរើន នៅក្នុងឆមាសទី ១ ឆ្នាំ ២០២២ ខេត្តព្រះសីហនុមានគ្រោះថ្នាក់ចរាចរណ៍កើតឡើងសរុប ១១១លើក ៕