ភ្នំពេញ ៖ កម្មវិធីដកពិន្ទុប័ណ្ណបើកបរ និងការបង់ប្រាក់ពិន័យអន្តរការណ៍ ចំពោះអំពើ ល្មើសច្បាប់ស្ដីពីចរាចរណ៍ផ្លូវគោក គ្រោងនឹងដាក់ឱ្យដំណើរការអនុវត្ត សាកល្បងនៅទូទាំងប្រទេស ចាប់ពីថ្ងៃទី០១ ខែកញ្ញា ឆ្នាំ២០២២ ខណៈដែលការអនុវត្តន៍ពេញលេញ គ្រោងចាប់ផ្តើមពី ថ្ងៃទី០១ ខែមករា ឆ្នាំ២០២៣។ ថ្លែងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅ ការងារឆមាសទី២ ឆ្នាំ២០២២ កាលពីថ្ងៃទី១៨ ខែសីហា ឆ្នាំ២០២២ នៅទីស្តីការក្រសួង ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានគណៈកម្មាធិការ សុវត្ថិភាពចរាចរណ៍ផ្លូវគោក(គ.ស.ច.គ.) បានមានប្រសាសន៍ ថ្លែងការកោតសរសើរយ៉ាងជ្រាលជ្រៅ ចំពោះមន្ត្រីពាក់ព័ន្ធទាំងអស់របស់ក្រសួងសាធារណការ និងដឹកជញ្ជូន និងក្រសួងមហាផ្ទៃ ដែលបានខិតខំ ប្រឹងប្រែង ក្នុងការសម្រេចបានប្រព័ន្ធដកពិន្ទុប័ណ្ណបើកបរនេះ។ ឯកឧត្តមទេសរដ្ឋមន្រ្តីបញ្ជាក់ថា ការតភ្ជាប់ប្រព័ន្ធស្វ័យប្រវត្តិកម្មរបស់ក្រសួងសារធារណការនិងដឹកជញ្ជូន និងក្រសួងមហាផ្ទៃបានធ្វើរួចរាល់ ដោយការដកពិន្ទុបានប៉ុន្មាន? ផាកពិន័យបានប៉ុន្មាន? ហើយផ្លាស់ប្តូរ ទិន្នន័យបានទាំងអស់ ខណៈដែលការពិនិត្យមើលពិន្ទុក៏បានធ្វើចប់សព្វគ្រប់ផងដែរ ។ ឯកឧត្តម បន្តថា ក្រសួងបានបញ្ជាទិញប្រព័ន្ធដកពិន្ទុប័ណ្ណបើកបរ ចំនួន៣០០គ្រឿង ហើយបានផ្តល់ជូនខាងមន្ត្រីនគរបាល និងបណ្តុះបណ្តាលចំនួន៤លើក ដល់មន្ត្រីចំនួន៣០០នាក់ផងដែរ។ ឯកឧត្តមបាន បន្តទៀតថា ក្រោយពីចុះសាកល្បងប្រើប្រាស់ប្រព័ន្ធដកពិន្ទុប័ណ្ណបើកបរ មានការពិបាក ក្នុងការប្រើប្រាស់ ក្រសួងក៏បានធ្វើការកែច្នៃឱ្យមានភាពងាយស្រួលក្នុងការប្រើប្រាស់ផងដែរ។ ឯកឧត្តម បានឱ្យដឹងទៀតថា ប្រព័ន្ធដកពិន្ទុប័ណ្ណបើកបរត្រូវបានអភិវឌ្ឍរួចរាល់ និងគ្រោងដាក់ឱ្យដំណើរការ សាកល្បងផ្លូវការចាប់ពីថ្ងៃទី០១ ខែកញ្ញា ឆ្នាំ២០២២ និងដាក់ឱ្យអនុវត្តពេញលេញជាផ្លូវការ នៅដើមឆ្នាំ ២០២៣ ខាងមុខ ដោយរង់ចាំការសម្រេចលើ ពេលវេលាសមស្របពីសម្តេចក្រឡាហោម ។ « ថ្ងៃនេះខ្ញុំបាទគណៈកម្មាធិការសុវត្ថិភាពចរាចរណ៍ផ្លូវគោក សុំការអនុញ្ញាតដ៏ខ្ពង់ខ្ពស់ ពីសម្តេច ដើម្បីអនុវត្តសាកល្បងផ្លូវនៅថ្ងៃទី០១ ខែកញ្ញាខាងមុខនេះ ហើយសាកល្បងផ្លូវការចប់សព្វគ្រប់ហើយ នឹងចាប់អនុវត្តន៍ជាផ្លូវការតែម្តងនៅថ្ងៃទី០១ខែមករា ឆ្នាំ២០២៣។ ដោយសារច្បាប់យើងតម្រូវវឱ្យយើងអនុវត្តតាំងពីថ្ងៃទី០១ ឆ្នាំ២០២២ មកម្ល៉េះ ក្នុងការដកពិន្ទុ ក៏ប៉ុន្តែ ដោយសារយើងមិនបានធ្វើឱ្យបានចប់សព្វគ្រប់ ឥឡូវយើងធ្វើចប់សព្វគ្រប់ហើយ សុំការអនុញ្ញាតដ៏ខ្ពង់ខ្ពស់ ពីសម្តេចយកទៅអនុវត្តសាកល្បងផ្លូវការ ហើយនឹងឈានទៅរកការអនុវត្តន៍ផ្លូវការតែម្តងនៅឆ្នាំ២០២៣ នេះជាការងារទាក់ទងនឹងការងារដកពិន្ទុ »។ សូមជម្រាបជូនថា កម្មវិធីដកពិន្ទុប័ណ្ណបើកបរ និងពិន័យលើបទល្មើសចរាចរណ៍ផ្លូវគោក គឺជាកម្មវិធី បច្ចេកវិទ្យា ដែលអនុញ្ញាតឱ្យមន្ត្រីនគរបាលចរាចរណ៍ ធ្វើការដកពិន្ទុលើប័ណ្ណបើកបរ និងពិន័យលើ បទល្មើសចរាចរណ៍ផ្លូវគោក ដើម្បីពង្រឹងការអនុវត្តន៍ច្បាប់ចរាចរណ៍ផ្លូវគោក ដោយមានលក្ខណៈ ពិសេសដូចជា ស្គាល់ទម្រង់ប័ណ្ណរួមមាន ប័ណ្ណបើកបរ លិខិតឆ្លងដែន អត្តសញ្ញាណប័ណ្ណ និងប័ណ្ណសម្គាល់យានយន្ត និងអាចដឹងថាប័ណ្ណបើកបរត្រឹមត្រូវ ឬក្លែងក្លាយ ដឹងពីប្រតិបត្តិការនៃការ កាត់ពិន្ទុ និងពិន័យលឿនរហ័ស ដឹងទីតាំងភូមិសាស្ត្រ និងប្រវត្តិនៃការដកពិន្ទុ និងពិន័យ និងអាចកត់ត្រារាល់ ទិន្នន័យដែលអាចប្រើប្រាស់ជាយុទ្ធសាស្រ្តសម្រាប់កាត់បន្ថយគ្រោះថ្នាក់ចរាចរណ៍៕