ផ្លូវក្រវាត់ក្រុងទី៤ គឺជាគម្រោងធំមួយទៀត របស់រាជរដ្ឋាភិបាល បន្ទាប់ពីគម្រោងផ្លូវក្រវាត់ក្រុងទី៣ ដែលបាននឹងកំពុងដំណើរសាងសង់យ៉ាងមមាញឹក។ ហើយគិតមកដល់ពេលនេះគម្រោងក្រវាត់ក្រុងទី៣ បានសម្រេចការសាងសង់ជាង ៧៦ ភាគរយហើយ។ ជាមួយគ្នានេះដែរ តាមការលើកឡើងពីឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដី ក្រសួងសាធារណការ និងដឹកជញ្ជូនកាលពីពេលកន្លងទៅបានឲ្យដឹងថា នៅពេលគម្រោងផ្លូវក្រវាត់ក្រុងទី៣ សាងសង់រួចរាល់ពេលណា រាជរដ្ឋាភិបាលនឹងចាប់ផ្ដើមធ្វើការសាងសង់ក្រវាត់ក្រុងទី៤ម្ដង។ថ្លែងក្នុងកម្មវិធីផ្សាយផ្ទាល់ពិសេសកាលពីពេលកន្លងទៅឯកឧត្ដមទេសរដ្ឋមន្រ្ដីបានថ្លែងថា «យើងកំពុងសាងសង់ក្រវាត់ក្រុងទី៣ ក៏ប៉ុន្ដែយើងកំពុងសិក្សាក្រវាត់ក្រុងទី៤ អ៊ីចឹងយើងសាងសង់ទី២ សិក្សាទី៣ សាងសង់ទី៣ សិក្សាទី៤។ យើងត្រៀមហើយពេលសិក្សាហើយ យើងនឹងរកថវិកាមកសាងសង់ក្រវាត់ក្រុងទី៤ ប៉ុន្ដែមុនឈានទៅរកការសាងសង់ក្រវាត់ក្រុងទី៤ យើងត្រូវបញ្ចប់កាសាងសង់ក្រវាត់ក្រុងទី៣ឲ្យក្លាយជាក្រវាត់សិន»។ សូមជម្រាបផងដែរថា តាមការសិក្សាក្រវាត់ក្រុងទី៤ នេះមានប្រវែងសរុប ១៩៥ គីឡូម៉ែត្រ ដែលនឹងត្រូវសាងសង់ឆ្លងកាត់ខេត្ដចំនួន ៤ រួមមានខេត្តកំពង់ស្ពី ចំនួន៣ស្រុក ខេត្តតាកែវចំនួន១ស្រុក ខេត្តកណ្តាល៨ស្រុក និងខេត្តព្រៃវែង២ស្រុក។ ចំពោះចំណុចសំខាន់ នៃការសាងសង់ផ្លូវក្រវាត់ក្រុងទី៤នេះ គឺដើម្បីចូលរួមចំណែកកាត់បន្ថយការកក់ស្ទះចរាចរណ៍ និងជួយសម្រួលដល់ការដឹកជញ្ជូនទំនិញរបស់បងប្អូនប្រជាពលរដ្ឋ ទៅកាន់ផ្លូវជាតិផ្សេងៗ និងទៅកាន់ព្រំដែនប្រទេសវៀតណាម និងប្រទេសថៃ បានកាន់តែលឿន ចំណេញពេលវេលា កាត់បន្ថយការចំណាយបានមួយកំរិតទៀត៕