(បាត់ដំបង)៖ ឯកឧត្តម សុខ លូ អភិបាលខេត្តបាត់ដំបងបានស្នើឲ្យអាជីវករ និងពាណិជ្ជករដែលមានឃ្លាំងស្តុកទំនិញនៅក្នុងក្រុងបាត់ដំបង ផ្លាស់ប្តូរទីតាំងមកនៅក្រៅក្រុងវិញ។ អភិបាលខេត្តបានស្នើបែបនេះ ដើម្បីចង់ថែរក្សាផ្លូវថ្នល់ឲ្យកាន់តែយូរអង្វែងសម្រាប់បម្រើផលប្រយោជន៍ដល់ពលរដ្ឋ។ឯកឧត្តម សុខ លូ អភិបាលខេត្តបាត់ដំបងបានសង្កេតឃើញថា កន្លងមកអាជីវករ ពាណិជ្ជករ និងអ្នកប្រកបអាជីវកម្មផ្សេងៗ បានដឹកជញ្ជូនទំនិញលើសទម្ងន់កម្រិតកំណត់ចូលនៅក្នុងក្រុងបាត់ដំបង​ ដែលជាហេតុនាំឲ្យខូចខាតផ្លូវ។ លើសពីនេះ រងមតិរិះគន់មកលើអាជ្ញាធរមានសមត្ថកិច្ចថាពុំបានទប់ស្កាត់ ឬហាមឃាត់ទៅលើការដឹកជញ្ជូនរថយន្តធុនធ្ងន់ទាំងនោះ។ ដើម្បីរក្សាផ្លូវថ្នល់ឲ្យគង់វង់យូរអង្វែង ឯកឧត្តម សុខ លូ​ បានស្នើឲ្យអាជីវករ ពាណិជ្ជករប្តូរទីតាំងស្តុកទុកទំនិញរបស់ខ្លួនដែលស្ថិតក្នុងក្រុងបាត់ដំបងទៅផ្លូវក្រៅក្រុងវិញ ហើយត្រូវផ្លាស់ប្តូរឲ្យរួចរាល់ក្នុងរយៈពេល១ឆ្នាំ ដោយគិតចាប់ពីថ្ងៃជូនដំណឹងរហូតដល់បំណាច់ខែមេសា ឆ្នាំ២០២៣។ឯកឧត្តមអភិបាលខេត្តបាត់ដំបងបានសង្កត់ធ្ងន់ថា រដ្ឋបាលខេត្តនឹងមានវិធានការផ្លូវច្បាប់យ៉ាងម៉ឺងម៉ាត់នូវរាល់ការដឹកជញ្ជូនរថយន្តធុនធ្ងន់ ចូលមកក្រុងបាត់ដំបង។ អភិបាលបានអះអាងដូច្នេះថា៖«ក្នុងរយៈពេលទុកឲ្យប្តូរទីតាំងឃ្លាំងចេញទៅក្រៅក្រុងនេះ សូមម្ចាស់ឃ្លាំងស្តុកទំនិញពុំទាន់់បានប្តូរទីតាំងទៅផ្លូវវាងក្រុង ស្នើឲ្យមានការផ្ទេរទំនិញពីរថយន្តធុនធ្ងន់ មករថយន្តតូចៗ និងហាមឃាត់រថយន្តធុនធ្ងន់គ្រប់ប្រភេទ ដែលមានទម្ងន់លើសពី១៦តោន(ទម្ងន់សរុប) ធ្វើចរាចរណ៍ក្នុងក្រុងបាត់ដំបង»។ ការអំពាវនាវនេះ ក៏ស្ថិតនៅក្នុងគម្រោងរបស់រដ្ឋបាលខេត្តបាត់ដំបងក្នុងការរៀបចំសណ្តាប់ធ្នាប់សាធារណៈឲ្យមានរបៀបរៀបរយ និងមានសោភ័ណភាពក្នុងទីក្រុងផងដែរ។ រដ្ឋបាលក្រុងបាត់ដំបងកន្លងមកបានស្នើឲ្យម្ចាស់អាជីវកម្មរុះរើសំយ៉ាប ផ្ទាំងប៉ាណូពាណិជ្ជកម្មដែលបិទបាំងអគារបុរាណដែលមានអាយុកាលរាប់សិបទស្សវត្ស៍នៅក្នុងក្រុងបាត់ដំបងចេញ ដើម្បីឲ្យទីក្រុងមានសោភ័ណភាពស្រស់ស្អាត និងអាចស្រូបទាញនូវភ្ញៀវទេសចរជាតិ និងអន្តរជាតិមកទស្សនារូបរាងពេញលេញនូវអគារបុរាណដែលបន្សល់ទុកពីសម័យអាណានិគមនិយមបារាំង និងដើម្បីប្រកួតប្រជែងជាទីក្រុងស្អាតអាស៊ានផងដែរ។ គិតត្រឹមបច្ចុប្បន្ននេះ មានម្ចាស់អាជីវកម្មមួយចំនួនបានរុះរើសំណង់ដែលបានបិទបាំងអគារបុរាណនោះចេញជាបណ្តើរៗហើយ៕