កិច្ចពិភាក្សាលទ្ធភាព​ កិច្ចសហប្រតិបត្តិការ​ជាមួយក្រុមហ៊ុនVISA ដេីម្បីពិនិត្យលទ្ធភាពជាដៃគូផ្ដល់ជម្រើសទូទាត់​សេវាសាធារណៈជូនបងប្អូនប្រជាពលរដ្ឋក្នុងវិស័យសាធារណការ និងដឹកជញ្ជូន ថ្ងៃសុក្រ ១កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៩ ខែកក្កដា ឆ្នាំ២០២២ នៅទីស្តីការក្រសួង លោក ហ៊ាង សុទ្ធាយុត្តិ តំណាងអគ្គនាយកដ្ឋានបច្ចេកវិទ្យា​ និងទំនាក់ទំនងសាធារណៈ​ នៃក្រសួងសាធារណការ និងដឹកជញ្ជូន បានដឹកនាំក្រុមការងារ ពិភាក្សាជាមួយក្រុមហ៊ុនVISA និងធនាគារកម្ពុជាសាធារណៈ ដើម្បីពិនិត្យលទ្ធភាពលើការសហការតភ្ជាប់ប្រព័ន្ធទូទាត់ប្រាក់​ លើសេវាសាធារណៈ​ របស់ក្រសួងសាធារណការ និងដឹកជញ្ជូន។ ជំនួបពិភាក្សានេះធ្វើឡើងក្នុងគោលបំណងបង្កើតកិច្ចសហការរវាងក្រុមហ៊ុនVISA និងក្រសួងសាធារណការ និងដឹកជញ្ជូន ក្នុងការផ្ដល់ជម្រើសទូទាត់សេវាសាធារណៈ​ ជូនបងប្អូនប្រជាពលរដ្ឋ នៅក្នុងព្រះរាជាណាចក្រកម្ពុជា ដើម្បីរួមចំណែកជំរុញសេវាសាធារណៈឲ្យបានឆាប់រហ័ស តម្លាភាព និងប្រសិទ្ធភាពខ្ពស់។ គួរបញ្ជាក់ថា ចាប់តាំងពីឆ្នាំ២០១៧ មក ក្រសួងសាធារណការ និងដឹកជញ្ជូន បានប្រើប្រាស់ប្រព័ន្ធស្វ័យប្រវត្តិកម្ម ដើម្បីផ្តល់សេវាសាធារណៈក្នុងវិស័យសាធារណការ និងដឹកជញ្ជូន ជូនប្រជាពលរដ្ឋ និងបានសហជាមួយគ្រឹះស្ថានធនាគារ-ហិរញ្ញវត្ថុដៃគូ លើការបង់កម្រៃសេវាសាធារណៈ ដែលអាចបង្កភាពងាយស្រួល និងចំណេញពេលវេលាសម្រាប់បងប្អូនប្រជាពលរដ្ឋក្នុងការទូទាត់ថ្លៃសេវាសាធារណៈទាំងនោះ៕