ក្រុមការងារ ស.ស.យ.ក វិស័យសាធារណការ និងដឹកជញ្ជូន បន្ដបើវគ្គបណ្តុះបណ្តាលស្តីពី សុវត្ថិភាពចរាចរណ៍ ដល់សមាជិក សមាជិកា ស.ស.យ.ក ខេត្តរតនគិរី ចំនួនប្រមាណ ១០០នាក់ រតនគិរី៖ ថ្ងៃព្រហស្បតិ៍ ១៥រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែកក្កដា ឆ្នាំ២០២២ ក្រុមការងារ ស.ស.យ.ក វិស័យ សាធារណការ និងដឹកជញ្ជូន សហការជាមួយ ស.ស.យ.ក ខេត្តរតនគិរី បានបើកវគ្គបណ្តុះបណ្តាលស្តីពី សុវត្ថិភាពចរាចរណ៍ ដល់សមាជិក សមាជិកា ស.ស.យ.ក ខេត្តរតនគិរី ចំនួនប្រមាណ ១០០នាក់។ វគ្គបណ្តុះបណ្តាលនេះគឺរៀបចំឡើងក្នុងគោលបំណងអប់រំផ្សព្វផ្សាយអំពីសុវត្ថិភាពចរាចរណ៍ ដើម្បីចូលរួមចំណែកកាត់បន្ថយបញ្ហាគ្រោះថ្នាក់ចរាចរណ៍ និងជាចំណេះដឹងសម្រាប់យុវជនក្នុងការផ្សព្វផ្សាយបន្តដល់បងប្អូនប្រជាពលរដ្ឋទូទៅ។ វគ្គបណ្តុះបណ្តាលនេះគឺផ្ដោតលើប្រធានបទសំខាន់ៗដែលរួមមាន៖ ស្ថានភាពទូទៅនៃគ្រោះថ្នាក់ចរាចរណ៍ផ្លូវគោក ការប្រើប្រាស់មួកសុវត្ថិភាព ការប្រើប្រាស់ល្បឿន និងហានិភ័យនៃការបើកបរក្រោមឥទ្ធិពលនៃគ្រឿងស្រវឹង។ ក្នុងនោះដែរក្រុមការងារក៏មានការចែកជូនមួកសុវត្ថិភាពចំនួន ៥០មួក ដល់សិក្ខាកាមដែលបានចូលរួមឆ្លើយសំណួរត្រឹមត្រូវផងដែរ។ ក្រោយបញ្ចប់វគ្គបណ្ដុះបណ្ដាល សិក្ខាកាម ដែលជាសមាជិក ស.ស.យ.ក ខេត្ត បានយល់ដឹងកាន់តែទូលំទូលាយអំពីប្រធានបទនីមួយៗ ដើម្បីធ្វើការផ្សព្វផ្សាយបន្ដសំដៅកាត់បន្ថយបញ្ហាគ្រោះថ្នាក់ចរាចរណ៍ឲ្យបានជាអតិបរមា។ សូមបញ្ជាក់ជូនថាវគ្គបណ្តុះបណ្តាលនេះរៀបចំដោយ ផ្នែកដឹកជញ្ជូន នៃក្រុមការងារ ស.ស.យ.ក វិស័យសាធារណការ និងដឹកជញ្ជូន សហការជាមួយមន្ទីរសាធារណការ និងដឹកជញ្ជូន និង ស.ស.យ.ក ខេត្តរតនគិរី៕