គម្រោងផ្លូវល្បឿនលឿនភ្នំពេញ-បាវិត គឺជាគម្រោងធំមួយ ដែលរាជរដ្ឋាភិបាលបានដាក់ចូលទៅក្នុងគម្រោងអភិវឌ្ឍន៍នាពេលខាងមុខ ខណៈកន្លងមកគម្រោងផ្លូវមួយនេះបានដាក់ឲ្យក្រុមហ៊ុនឯកជនធ្វើការសិក្សាហើយដែរ។ យ៉ាងណាការស្ថាបនាផ្លូវតភ្ជាប់ពីភ្នំពេញទៅដល់ព្រំដែនប្រទេសវៀតណាមនេះ ក៏អាចនឹងភ្ជាប់ជាមួយនឹងផ្លូវល្បឿនលឿនរបស់វៀតណាមថែមទៀតផង។ ជាក់ស្ដែងនៅជំនួបពិភាក្សាការងារអំពីកិច្ចសហប្រតិបត្តិការ និងការគាំទ្រលើគម្រោងអភិវឌ្ឍន៍ហេដ្ឋារចនាសម្ព័ន្ធនាពេលអនាគតបន្ថែមទៀតរបស់កម្ពុជា ជាមួយគណៈប្រតិភូនៃទីភ្នាក់ងារសហប្រតិបត្តិការអន្តរជាតិជប៉ុន(JICA)ប្រចាំតំបន់អាស៊ីអាគ្នេយ៍ និងប៉ាស៊ីហ្វិក កាលពីថ្ងៃទី២២ ខែកក្កដា ឆ្នាំ២០២២ ឯកឧត្ដម ស៊ុន ចាន់ថុល ទេសរដ្ឋមន្រ្ដីរដ្ឋមន្រ្ដីក្រសួងសាធារណការ និងដឹកជញ្ជូន ក៏បានលើកឡើងពីគម្រោងមួយនេះដែរ។ យោងតាមករចេញផ្សាយដោយក្រសួងសារធារណការ ឯកឧត្ដមទេសរដ្ឋមន្រ្ដីលើកឡើងថា គម្រោងផ្លូវល្បឿនលឿនរបស់ប្រទេសវៀតណាមជាមួយនឹងគម្រោងផ្លូវល្បឿនលឿនភ្នំពេញ-បាវិត ស្ថិតនៅចំណុចឯកភាពសម្រាប់តភ្ជាប់រគ្នា។ គួបញ្ជាក់ផងដែរថាផ្លូវល្បឿនលឿនភ្នំពេញ បាវិត គឺជាគម្រោងផ្លូវល្បឿនលឿនទី ២ ក្នុងប្រទេសកម្ពុជាបន្ទាប់ផ្លូវល្បឿនលឿនភ្នំពេញ ក្រុងព្រះសីហនុ ខណៈផ្លូវនេះគឺជាផ្លូវថ្មីទាំងស្រុងដែលមានប្រវែងសរុបប្រហែល ១៣៥ គីឡូម៉ែត្រ។ ហើយត្រូវសាងសង់ជា ០៤គន្លង តួផ្លូវមានទទឹង ២៥,៥ ម៉ែត្រ។ ខ្សែផ្លូវនេះ នឹងចេញពីភ្នំពេញនៅចំណុចផ្លូវខ្សែក្រវ៉ាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាមតែម្ដង ដោយគ្រោងចំណាយថរិការសាងសង់ប្រហែល ២ ពាន់លានដុល្លារ។