[Reasmey Kampuchea] - សូមក្រសួងសាធារណការជួយមើលផ្លូវមួយខ្សែនៅក្រុងស្ទឹងត្រែងផង!
2018-04-06
ទៅកាន់ទំព័រចុះផ្សាយក្នុង Reasmey Kampuchea
ស្ទឹងត្រែង: ផ្លូវមួយខ្សែមានប្រវែងជាង២.០០០ម៉ែត្រនៅក្នុងក្រុងស្ទឹងត្រែងខូចស្ទើទាំងស្រុង បង្កការលំបាក ដល់អ្នកដំណើរ ឆ្លងកាត់ ទៅមករាល់ថ្ងៃតែពុំទាន់ឃើញមានការជួសជុល ឬក៏ស្ថាបនាឡើងវិញនោះទេ។
ហេតុនេះសូមក្រសួងសាធារណការនិងដឹកជញ្ជូនមេត្តាចុះមកពិនិត្យមើលជាក់ស្តែង។ បើគ្មានលោករដ្ឋមន្ត្រីក្រសួងសាធារណការនិងដឹកជញ្ជូនទេនោះ ផ្លូវមួយខ្សែនេះ ប្រហែលជាដោះស្រាយមិនចេញ។ ក្រុងស្ទឹងត្រែង ក៏មិនសមជាទីក្រុងស្អាតទទួលភ្ញៀវទេសចរបានដែរ។
ប្រជាពលរដ្ឋ ក៏ដូចជាមន្ត្រីរាជការក្នុងខេត្តស្ទឹងត្រែង តែងតែនិយាយរិះគន់ទៅលើផ្លូវមួយខ្សែ ដែលជាផ្លូវលេខ៥៤សំខាន់មួយ តភ្ជាប់ពីកែងផ្ទះសំណាក់មេគង្គគីឡូម៉ែត្រពីរ សង្កាត់ស្ទឹងត្រែង ទៅស្ពានមេគង្គ សង្កាត់ព្រះបាទ ក្រុងស្ទឹងត្រែង។
បើនិយាយឱ្យចំទៅ ផ្លូវមួយខ្សែនោះ គឺជាផ្លូវសំខាន់ណាស់សម្រាប់ប្រជាពលរដ្ឋនិងមន្ត្រីរាជការរួមទាំងភ្ញៀវទេសចរអន្តរជាតិចង់មកកាន់ខេត្តស្ទឹងត្រែងឬក៏ឆ្លងកាត់ពីប្រទេសឡាវ ទៅកាន់ខេត្តសៀមរាប តំបន់អង្គរជាដើម។រាល់ថ្ងៃផ្លូវនេះទោះបីជាផ្លូវក្រាលកៅស៊ូមែន ប៉ុន្តែជាផ្លូវដីហុយ អស់ទៅហើយ។អ្នកធ្វើដំណើរឆ្លងកាត់ទៅមកត្អូញត្អែរថា ជិះកាត់ផ្លូវនេះម្តងៗ ចង់ធ្លាក់ថ្លើម។បើមិនចង់ជិះតាមផ្លូវនេះគឺទាល់តែទៅតាមផ្លូវផ្សេងវាងកុងកាច់បត់បែនឆ្ងាយណាស់។
ម្យ៉ាងទៀតអ្នកធ្វើដំណើរតាមម៉ូតូត្រូវប្រុងប្រយ័ត្នបើពុំនោះទេ អាចនឹងធ្លាក់ជង្ហុកគ្រោះថ្នាក់ជាយថាហេតុ។
បើតាមការបញ្ជាក់ពីមន្ទីរជំនាញក៏ដូចជាអាជ្ញាធរខេត្តស្ទឹងត្រែងបានឱ្យដឹងថាមូលហេតុផ្លូវលេខ៥៤ដែលតភ្ជាប់ពីសង្កាត់ស្ទឹងត្រែងទៅសង្កាត់ព្រះបាទក្រុងស្ទឹងត្រែងប្រវែងជាងពីរគីឡូម៉ែត្រខូចគ្មានការជួសជុលដោយសារគ្មានលុយ។ផ្លូវនោះខាងមន្ទីរ បានរាយការណ៍ទៅក្រសួងសេដ្ឋកិច្ច និងហិរញ្ញវត្ថុនិងក្រសួងសាធារណការនិងដឹកជញ្ជូន ច្រើនដងរួចមកហើយ ប៉ុន្តែត្រូវបានកាត់ចោលមិនបានទទួលស្គាល់បញ្ជូនទៅក្នុងគម្រោងកញ្ចប់ថវិកាចាយប្រចាំឆ្នាំនោះឡើយ។
ផ្លូវខូចដល់ដំណាក់កាលនេះ ទៅហើយគឺមានតែក្រសួងពាក់ព័ន្ធទេ ទើបអាចដោះស្រាយចេញ។ សង្ឃឹមថាលោក ស៊ុន ចាន់ថុលទេសរដ្ឋមន្ត្រីនិងជារដ្ឋមន្ត្រីក្រសួងសាធារណការ និងដឹកជញ្ជូននឹងមានឱកាស បានចុះមកពិនិត្យមើលកំណាត់ផ្លូវមួយខ្សែនេះជាក់ស្តែង ធ្វើការជួសជុលឬស្ថាបនាឡើងវិញ ដើម្បីជាចំណងដៃដល់អ្នកខេត្តស្ទឹងត្រែង៕
