យោងតាមសេចក្ដីជូនដំណឹងរបស់រដ្ឋបាលខណ្ឌពោធិ៍សែនជ័យ កាលពីថ្ងៃទី២៣ ខែមិថុនា ឆ្នាំ២០២២ បានឲ្យដឹងថា អាជ្ញាធរ នឹងធ្វើការផ្អាកចរាចរបណ្ដោះអាសន្នលើកំណាត់មហាវិថីឈ្នះ ឈ្នះ ត្រង់ចំណុចមុខរោងចក្រប៊ឺរី ស្ថិតនៅក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រយៈពេល ៤៥ ថ្ងៃ។ យោងតាមសេចក្ដីជូនដំណឹងរបស់រដ្ឋបាលខណ្ឌដដែលឲ្យដឹងទៀតថា នៅថ្ងៃទី២៤​ ខែមិថុនា មានការបើកការដ្ឋានសាង់សង់ស្ពានអាកាស លើកំណាត់មហាវិថីឈ្នះ ឈ្នះ ចាប់ពិចំណុចមុខរោងចក្រប៊ឺរី ឆ្លងកាត់ផ្លូវជាតិលេខ៤ ឆ្ពោះទៅផ្លូវក្រវាត់ក្រុងទី៣ ដែលមានទីតាំងស្ថិតនៅតំបន់ខាងលើ។ ដូច្នេះដើម្បីរក្សាបាននូវសុវត្ថិភាព និងសណ្ដាប់ធ្នាប់សាធារណៈ ពិសេសបញ្ចៀសបាននូវការកកស្ទះចរាចរណ៍រដ្ឋបាលខណ្ឌពោធិ៍សែនជ័យ បានជម្រាបជូនដំណឹងដល់ពលរដ្ឋ និងសាធារណៈជនទាំងអស់ ដែលមានដំណងធ្វើចរាចរណ៍ឆ្លងកាត់ត្រង់ចំណុចខាងលើ សូមបញ្ចៀសចរាចរណ៍តាមផ្លូវដូចខាងក្រោម៖ ១ ចំពោះយានយន្ដគ្រប់ប្រភេទ ដែលធ្វើដំណើរពីមហាវិថីឈ្នះឈ្នះ ឆ្ពោះទៅកាន់ស្ពានអាកាសចោមចៅ សូមបញ្ចៀសបត់ឆ្វេង ចូលទៅផ្លូវមុខស្ថានីយ៍ប្រេងឥន្ធនៈតេលា រហូតដល់ផ្សារឯករាជ្យ២ បត់ស្ដាំ ដើម្បីឆ្ពោះទៅដល់មុខស្ដុបវិទ្យាល័យជម្ពូវ័ន ផ្លូវជាតិលេខ៤ រួចបត់ឆ្វេងទៅរកស្ពានអាកាសចោមចៅ។ ២. ចំពោះយានយន្ដគ្រប់ប្រភេទ ដែលធ្វើដំណើរពីស្ពានអាកាសចោមចៅ ឆ្ពោះទៅកាន់ផ្លូវជាតិលេខ៤ សូមបញ្ចៀសបត់ស្ដាំត្រង់ចំណុចស្ដុបមុខវិទ្យាល័យជម្ពូវ័ន ទៅផ្សារឯករាជ្យ២ បត់ឆ្វេងឡើងទៅកាន់មហាវិថីឈ្នះ ឈ្នះ រួចបត់ស្ដាំរហូតដល់មុខផ្សារបឹងបៃតង បត់ឆ្វេងទៅតាមផ្លូវផ្សារសាមគ្គីដើម្បីឆ្ពោះទៅផ្លូវជាតិលេខ៤។ ៣. ចំពោះយានយន្ដគ្រប់ប្រភេទ ដែលធ្វើដំណើរពីផ្លូវជាតិលេខ៤ ឆ្ពោះទៅស្ពានអាកាសចោមចៅ សូមបញ្ចៀសបត់ឆ្វេងចូលតាមក្លោងទ្វារវត្ថុអរុណវត្ដី ឡើងទៅដល់ផ្សារសាមគ្គី រួចបត់ស្ដាំមករកមហាវិថីឈ្នះ ឈ្នះ រួចបន្ដបត់ស្ដាំរហូតដល់មុខរោងចក្រប៊ឺរី ចូលទៅផ្លូវមុខស្ថានីយ៍ប្រេងឥន្ធនៈតេលា រហូតដល់ផ្សារឯករាជ្យ២ បត់ស្ដាំ ដើម្បីឆ្ពោះទៅដល់មុខស្ដុបវិទ្យាល័យជម្ពូវ័ន ផ្លូវជាតិលេខ៤ រួចបត់ឆ្វេងទៅរកស្ពានអាកាសចោមចៅ។ តាមការបញ្ជាក់ពីរដ្ឋបាលខណ្ឌពោធិ៍សែនជ័យ ការបញ្ចៀសការធ្វើដំណើរនេះមានរយៈពេល ៤៥ ថ្ងៃ គិតចាប់ពីថ្ងៃទីចុះហត្ថលេខាតទៅ៕