កិច្ចប្រជុំបិទវគ្គសវនកម្មលើរបាយការណ៍ហិរញ្ញវត្ថុរបស់ក្រសួងសាធារណការ និងដឹកជញ្ជូន រវាងនាយកដ្ឋានសវនកម្មផ្ទៃក្នុងក្រសួង និងគណៈប្រតិភូអាជ្ញាធរសវនកម្មជាតិ ដឹកនាំដោយឯកឧត្តមរដ្ឋលេខាធិការ ប៉េង ពោធិ៍នា ថ្ងៃចន្ទ ៦រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២០ ខែមិថុនា ឆ្នាំ២០២២ នៅទីស្តីការក្រសួង ឯកឧត្តម ប៉េង ពោធិ៍នា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំបិទវគ្គសវនកម្មលើរបាយការណ៍ហិរញ្ញវត្ថុរបស់ក្រសួង រវាងនាយកដ្ឋានសវនកម្មផ្ទៃក្នុងនៃក្រសួងសាធារណការ និងដឹកជញ្ជូន និងគណៈប្រតិភូអាជ្ញាធរសវនកម្មជាតិ ដែលដឹកនាំដោយ ឯកឧត្តម សំរិត សាត ដោយមានការចូលរួមពីមន្ត្រីជំនាញពាក់ព័ន្ធក្រោមឱវាទក្រសួង។ អង្គប្រជុំបានលើកថា៖ របាយការណ៍ហិរញ្ញវត្ថុរបស់ក្រសួងសាធារណការ និងដឹកជញ្ជូន សម្រាប់ការិយបរិច្ឆេទ២០២១ បានរៀបចំគ្រប់ទិដ្ឋភាពជាសារវន្ត ស្របតាមច្បាប់ស្តីពីប្រព័ន្ធហិរញ្ញវត្ថុសាធារណៈ និងក្របខណ្ឌគោលការណ៍គណនេយ្យរបស់រាជរដ្ឋាភិបាលនៃព្រះរាជាណាចក្រកម្ពុជា។ អង្គប្រជុំក៏បានពិភាក្សាផងដែរអំពីលទ្ធផលសវនកម្មពាក់ព័ន្ធនឹងប្រព័ន្ធត្រួតពិនិត្យផ្ទៃក្នុងរបស់ក្រសួងមួយចំនុចម្តងៗ និងជាលទ្ធផលក្រសួងបានទទួលយកចំនុចខ្វះចន្លោះ ដើម្បីធ្វើការកែលម្អតាមអនុសាសន៍សវនកម្ម សំដៅពង្រឹងប្រសិទ្ធភាពការងារលើការគ្រប់គ្រងហិរញ្ញវត្ថុ ទ្រព្យសម្បត្តិរដ្ឋ ការប្រើប្រាស់ប្រព័ន្ធបច្ចេកទេសព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ(FMIS) និងបន្តខិតខំប្រឹងប្រែងអនុវត្តតាមអនុសាសន៍សវនកម្ម៕