កិច្ចប្រជុំអន្តរក្រសួងស្តីពីអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ដឹកនាំដោយឯកឧត្តមរដ្ឋលេខាធិការ រស់ វណ្ណា ថ្ងៃអង្គារ ៨កើត ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៧ ខែមិថុនា ឆ្នាំ២០២២ នៅទីស្តីការក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំអន្តរក្រសួង ដើម្បីពិភាក្សាលើអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ដោយមានការចូលរួមពីថ្នាក់ដឹកនាំក្រសួង ឯកឧត្តម ម៉ក់ ស៊ីដេត អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ តំណាងអគ្គនាយកដ្ឋានរដ្ឋបាល និងហរិញ្ញវត្ថុ តំណាងនាយកដ្ឋាននាវាជំនួញសមុទ្រ តំណាងនាយកដ្ឋានព័ត៌មានវិទ្យា និងទំនាក់ទំនងសាធារណៈ តំណាងអគ្គនាយកដ្ឋានអន្តោប្រវេសន៍ តំណាងអគ្គនាយកដ្ឋានគយ និងរដ្ឋាករកម្ពុជា តំណាងអគ្គនាយកដ្ឋានបច្ចេកទេសសុខាភិបាលនៃក្រសួងសុខាភិបាល តំណាងកំពង់ផែស្វយ័តក្រុងព្រះសីហនុ និងតំណាងកំពង់ផែស្វយ័តភ្នំពេញ។ កិច្ចប្រជុំនេះមានគោលបំណងពិនិត្យពិភាក្សា និងផ្តល់យោបល់ ក៏ដូចជាប្រមូលធាតុចូលពីក្រសួង-ស្ថាប័នពាក់ព័ន្ធដែលមានសមាសភាពនៅក្នុងគណៈកម្មការគ្រប់គ្រងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ សំដៅរៀបចំអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI) ឱ្យបានគ្រប់ជ្រុងជ្រោយ និងធានាបាននូវការអនុវត្តប្រកបដោយភាពរលូនពីគ្រប់ភាគីពាក់ព័ន្ធ។ សូមជម្រាបជូនថា៖ ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) គ្រោងនឹងដាក់ឱ្យដំណើរការនៅចុងខែសីហា ឆ្នាំ២០២២ខាងមុខ ដែលនេះជាសមិទ្ធផលថ្មីមួយទៀតដែលកើតឡើងក្រោមការដឹកនាំរបស់ឯកឧត្តមទេសរដ្ឋមន្ត្រី ស៊ុន ចាន់ថុល៕