ក្រសួងសាធារណការ និងដឹកជញ្ជូន ពិគ្រោះយោបល់ស្ដីពីការសិក្សាសេវាគ្រប់គ្រងសំណល់ភក់បង្គន់ក្នុងក្រុងសៀមរាប ក្រោមគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WASSIP) នៅថ្ងៃពុធ ទី០១ ខែមិថុនា ឆ្នាំ២០២២ លោក ចៅ សុភៈភិបាល នាយកគម្រោងផ្នែកទី២ និងជាអគ្គនាយករងនៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន និងជាតំណាងដ៏ខ្ពង់ខ្ពស់ឯកឧត្តម កឹម បូរី អនុរដ្ឋលេខាធិការទទួលបន្ទុក បាន ជាអធិបតីក្នុងពិធីបើកសិក្ខាសាលាពិគ្រោះយោបល់ស្ដីពីការសិក្សាសេវាគ្រប់គ្រងសំណល់ភក់បង្គន់ក្នុងក្រុងសៀមរាប ដោយមានការអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីក្រុមការងារពាក់ព័ន្ធនៃគម្រោង ភាគីពាក់ព័ន្ធ និងជំនាញការនៃធនាគារពិភពលោកផងដែរ។ សិក្ខាសាលានេះរៀបចំឡើងដោយអគ្គនាយកដ្ឋានប្រព័ន្ធចម្រោះទឹកកខ្វក់ តាមរយៈគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WASSIP) ក្រោមហិរញ្ញប្បទានសម្បទានរបស់ធនាគារពិភពលោក សិក្សាដោយអង្គការ GRET ជាទីប្រឹក្សាមួយដែលកំពុងអនុវត្តការសិក្សាលើសេវាគ្រប់គ្រងសំណល់ភក់បង្គន់ ក្នុងក្រុងសៀមរាប និងជាផ្នែកមួយគាំទ្រដល់ផែ្នកទី ២ នៃគម្រោងផ្តួចផ្តើមការគាំទ្រដល់រាជរដ្ឋាភិបាលក្នុងការអភិវឌ្ឍសេវាកម្មគ្រប់គ្រងភក់បង្គន់។ ការសិក្សាមានគោលបំណងដូចខាងក្រោម៖ (ទី១) សិក្សាលើស្ថានភាពបច្ចុប្បន្ននៃការផ្គត់ផ្គង់ និងតម្រូវការសេវាកម្មគ្រប់គ្រងភក់បង្គន់ នៅក្រុងសៀមរាប (ទី២) ធ្វើបច្ចុប្បន្នភាពដ្យាក្រាមលំហូរភក់បង្គន់ (SFD) និងប៉ាន់ប្រមាណតម្រូវការនៃសេវាគ្រប់គ្រងភក់បង្គន់ (ទី៣) រៀបចំផែនការអនុវត្ត និងការកសាងសមត្ថភាពសម្រាប់ការិយាល័យលូទឹក និងស្ថានីយចម្រោះទឹកកខ្វក់ខេត្តសៀមរាប (SR-SWTPU) និង (ទី៤) របាយការណ៍ទិដ្ឋភាពទូទៅនៃប្រព័ន្ធវិក្កយបត្រប្រមូលថ្លៃសេវាប្រើប្រាស់ទឹក ដែលប្រើប្រាស់ដោយរដ្ឋាករទឹកស្វយ័តសៀមរាប (SRWSA)។ សិក្ខាសាលានេះមានគោលបំណង (ទី១) បង្ហាញពីលទ្ធផលបឋមនៃការសិក្សា និងសំណើអនុសាសន៍ក្នុងការកែលម្អសេវាអនាម័យក្នុងក្រុង និង(ទី២) ទទួលយកមតិយោបល់ត្រឡប់មកវិញដើម្បីធ្វើការកែតម្រូវចុងក្រោយពីភាគីពាក់ព័ន្ធសំខាន់ៗ។ ក្នុងអង្គសិក្ខាសាលាក៏មានការចែកជូនសម្ភារ: បរិក្ខារសុវត្ថិភាព (PPE) ផងដែរដល់អង្គភាពគ្រប់គ្រងប្រព័ន្ឋលូ និងប្រព័ន្ឋចម្រោះទឹកកខ្វក់នៃមន្ទីរសាធារណការ និងដឹកជញ្ជូនខេត្តសៀមរាប និងមន្ទីរសាធារណការ និងដឹកជញ្ជូន ខេត្តបាត់ដំបង៕ រូបភាព៖ ក្រសួងសាធារណការ និងដឹកជញ្ជូន