ភ្នំពេញ៖ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន នាថ្ងៃចន្ទ ទី៣០ ខែឧសភា ឆ្នាំ២០២២ បានអញ្ជើញចូលរួមជាអធិបតី ក្នុងវគ្គបណ្តុះបណ្តាលផ្ទៃក្នុង ដើម្បីលើកកម្ពស់សមត្ថភាព និងចំណេះដឹងមន្រ្តីរាជការ ដោយមានការចូលរួមពីថ្នាក់ដឹកនាំ មន្រ្តី បុគ្គលិកនៃវិទ្យាស្ថានតេជោសែន សាធារណការ និងដឹកជញ្ជូន និងគ្រូឧទ្ទេស លោក ទេព សុផេង សាស្ត្រាចារ្យវិទ្យាស្ថានតេជោសែន សាធារណការ និងដឹកជញ្ជូន។ ជាមួយគ្នានោះ ឯកឧត្តម ហឿន សំនៀង បានថ្លែងឲ្យដឹងថា វគ្គបណ្ដុះបណ្ដាលនេះ រៀបចំឡើងដោយវិទ្យាស្ថានតេជោសែន សាធារណការ និងដឹកជញ្ជូន ក្នុងគោលបំណងលើកកម្ពស់សមត្ថភាពចំណេះដឹងរបស់ថ្នាក់ដឹកនាំ និងមន្រ្តី បង្កើនសមត្ថភាពលើការងារដឹកនាំ និងគ្រប់គ្រង ការកំណត់គោលនយោបាយ និងរៀបចំផែនការឱ្យបានត្រឹមត្រូវទៅថ្ងៃអនាគត និងធានាឱ្យបាននូវកិច្ចដំណើរការវិទ្យាស្ថានប្រកបដោយភាពជោគជ័យ។ ឯកឧត្តមបន្តឲ្យដឹងទៀតថា ក្នុងវគ្គបណ្តុះបណ្តាលនេះ ក៏មានកិច្ចពិភាក្សាជាក្រុម ដើម្បីធ្វើការវិភាគ និងឆ្លុះបញ្ចាំងពីភាពខ្លាំង ភាពខ្សោយ និការរៀបចំផែនការ គោលនយោបាយ និងការអនុវត្តការងារជាក់ស្តែងក្នុងអង្គភាពផងដែរ។ ឆ្លៀតក្នុងឱកាសនេះ ឯកឧត្តមនាយក ក៏បានថ្លែងអំណរគុណយ៉ាងជ្រាលជ្រៅដល់លោកគ្រូឧទ្ទេស ដែលបានចំណាយពេលវេលាដ៏មានតម្លៃក្នុង ការបណ្ដុះបណ្ដាលដល់សិក្ខាកាមជាថ្នាក់ដឹកនាំ មន្រ្តី បុគ្គលិកវិទ្យាស្ថានប្រកបដោយជោគជ័យ។ នាឱកាសនោះ ឯកឧត្តមនាយកវិទ្យាស្ថានតេជោសែន សាធារណការ និងដឹកជញ្ជូន បានសំដែងនូវការគាំទ្រឱ្យមានការរៀបចំវគ្គបណ្ដុះបណ្ដាលបែបនេះបន្តទៀត ដើម្បីជាផលប្រយោជន៍ដល់ការពង្រឹងសមត្ថភាពរបស់មន្ត្រីជំនាញវិទ្យាស្ថានឱ្យកាន់តែទូលំទូលាយ។ សូមជម្រាបជូនថា វគ្គបណ្តុះបណ្តាលនេះមានការចូលរួមពីសិក្ខាកាមជាថ្នាក់ដឹកនាំ មន្រ្តី និងបុគ្គលិកនៃវិទ្យាស្ថានសរុបចំនួន៤៧នាក់៕